時間好快就過左兩年,呢段日子我同HELEN差唔多每日都一齊。
  每日既七點,我都會送HELEN搭車返屋企。而每日送完HELEN返屋企既我,都會搵一班豬朋狗友,晚晚都玩到兩,三點先返屋企。有時更會通宵達旦,第二朝就返屋企換校服返學,然後行屍走肉般返到學校…訓教。HELEN經常因為咁而同我嘈交。
  第一,因為我完全無心向學,日日吃喝玩樂,成績一落千丈。
  第二,每日HELEN同我一齊既時候,我都唔夠精神。有時上黎我屋企搵我,仲可能見到我成條屍咁攤係張床,寧願搵周公捉棋,都唔陪佢。HELEN每次向我投訴,我都敷衍了事,有時我更會向佢發脾氣。佢一見我發脾氣,佢都會識趣地收聲。HELEN一直都好珍惜我地呢段愛情,反而我就一步一步咁挑戰佢既底線…..
  每逄特別日子,例如大家既生日,聖誕節,情人節或者紀念日等,我地都會一齊食飯,然後送一份花盡心思既禮物俾對方。
  呢兩年,HELEN都一樣唔可以出夜街,即使除夕倒數都唔可以。我地只可以係電話裡面陪住對方倒數。我係街外,HELEN就係屋企,倒數完之後即刻做對方第一個講新年快樂既人。
  直至2011年既除夕。HELEN呢一年好想同我一齊出去倒數,因為佢身邊好多朋友都同另一半又或者一大班朋友相約一齊見證2012年既來臨。但HELEN既家規咁嚴,佢屋企人又點會俾佢出夜街丫……所以HELEN除夕果日,佢一返到屋企就即刻換衫然後偷偷地出街搵我。佢屋企人一發現佢出左街,就瘋狂式轟炸佢手機,要佢返屋企。HELEN不斷地同佢屋企人交涉,希望可以有一次例外。佢屋企人當然堅持唔肯讓步,但HELEN亦都冇去理會。隔左一陣,我電話都突然響起,來電顯示竟然係HELEN老豆既電話號碼。我當場嚇到個心離一離,因為我同HELEN拍拖呢兩年,HELEN都冇同屋企人提及過我既存在。因為佢知道佢屋企人一定強烈反對。點解佢屋企人會知道我既存在既?直到多年後既今日,呢個問題仍然係一個謎。不過以我推測,我諗應該係HELEN既朋友洩漏風聲。
  最後我選擇左逃避呢個電話,因為我同HELEN都完全唔知道應該如何面對。之後有關HELEN屋企人既電話,我地都一律唔聽,將佢屋企人既問題拋諸腦後,開開心心咁迎接2012年。呢一日,我同HELEN,仲有一班朋友,個個都一對對,拖住自己既另一半上山BBQ,係山上面倒數2012年。
  山上既風景特別好,一望就全維港,可以清楚望到煙花既美景。倒數既時候差唔多到喇!我地一行十幾人望住維港大嗌:「10﹑9﹑8﹑7﹑6﹑5﹑4﹑3﹑2﹑1..」之後煙花就不斷係天空中綻放,而我就同HELEN講:「新一年,新既開始。我地一定要幸福落去!我愛你。」最後再加多下錫錫基本野啦!啜~!
倒數完之後,HELEN係時候要返屋企喇!我地睇返自己部手機,我地各自都有好多未接電話同留言。而呢啲未接既來電同埋留言,全部都係屬於HELEN既屋企人。


  我同HELEN逐一聽來自佢屋企人既留言。HELEN既留言:「曉霖,你好同我即刻返屋企喇下!」「聽電話呀,衰女!」「你同啲咩人一齊呀?係咪果個咩家洛呀?你幾多歲呀!學人拍拖?書都未讀完呀你,你返黎你就知死!」「果個咩家洛咩料呀!橫睇掂睇都成個古惑仔咁,佢呢啲係社會敗類,垃圾黎嫁咋!你唔好再同佢一齊喇下!」
  而我既留言:「家洛,我知你同曉霖拍拖,佢而家係唔係同你一齊?你聽到留言即刻覆我。」「你帶曉霖去撚左邊呀?聽電話啦!仆街。」「你唔好再同曉霖拍拖呀!你廢柴垃圾黎嫁咋!屌你老母!」
  誰人無父母,何必屌老母呢?UNCLE……大部份既留言,主要都係叫HELEN返屋企,叫佢唔好再同我一齊,同埋話我係廢柴,垃圾……我廢柴?我垃圾?其實我聽到真係好嬲,好有衝動打電話回敬返佢。但奈何,呢位不斷係言語上侮辱我既人係HELEN既爸爸。如果我真係咁做既話,只會令到HELEN同俜屋企人既關係更加惡劣。加上當時我真係以為可以同HELEN一生一世,組織家庭,結婚生仔,白頭到老。至少,當時我係咁諗……所以我同佢屋企人既關係更加唔可以再差落去。HELEN知道我係一個好重視尊嚴既人,聽到佢屋企人不斷侮辱我,佢知我一定唔開心,所以不停氹我,同我講對唔住。但我好清楚知道,HELEN一定比我更加難受,更加唔開心,佢返到屋企仲要獨自面對佢既屋企人。
  我送到佢屋企附近,臨走時佢叫我呢段時間都唔好打電話比佢。因為佢屋企人一定斷絕哂佢同所有朋友既聯絡。佢話一有機會就會即刻搵方法同我聯絡。雖然真係萬個唔想,但呢個環境下,只可以接受。
  新一年,新既新始。呢個開始,感覺完全唔良好,惡劣到一個點。呢一日,我同自己發誓,我有朝一日,一定要出人頭地,唔可以俾人睇死,我要HELEN既屋企人對我刮目相看,覺得我係一個出息既人,要贏得其他人荒我    既尊重,要HELEN屋企人放心俾佢個女同我一齊,只要擁有一樣野就可以滿足哂我既願望。果樣野就係….錢!好多好多既錢!

  只要有錢,人地就會尊重你。
  只要有公,人地就會討好你。
  只要有錢,你講咩都係道理。
  你冇錢,冇人會理你。


  你冇錢,冇人會覺我你有用。
  你冇錢,屎都冇得你食。冇錢,唔洗旨意可以同HELEN一齊,因為你冇能力,冇出息。

  當時既我,因為HELEN屋企人一段段激勵我既留言既關係,我既思想完全錯哂,諗既野錯哂方向。只要有錢,我乜都做。
  HELEN返到屋企之後.冇打過電話比我,不過呢個狀況係我既預計之內。第二日,我成日留意住電話,以免錯過關於HELEN既所有電話或者信息。不過始於都係冇消息……
  呢日,我乜野都諗唔到,我淨係知道我好掛住HELEN,好想好想聽到佢把聲……
  到第三日,元旦過左,我要如常咁起身返學,不過就冇左HELEN每朝早既MORNING CALL叫我起身,感覺好唔自在,唔知點咁。即使返到學校,我都一直留意住部電話,希望HELEN可以搵到機會聯絡我。終於,皇天不負有心人。HELEN係LUNCH既時候,佢借左佢同學既電話打俾我。佢一聽我把聲,佢就即刻喊出黎,同我講野果陣既聲音不斷抽蓄。而另一邊電話既我不斷氹佢,希望佢可以冷靜落黎。HELEN既情緒稍為平伏後,佢話佢倒數果晚返到屋企,俾佢全屋人鬧,鬧到無地自容,再難聽既說話都俾佢屋企人講哂。佢屋企人收左佢部手機,真係斷絕哂佢同所有朋友既聯絡,要佢放學即刻返屋企,放假唔可以出街……同埋,一定要同我分手,唔可以再有任何接觸。
  HELEN問點算好。點算好?我都唔知,我淨係知道我地唔可以屈服!你要我同你個女分手,咁同謀殺我有咩分別呀?即使過左幾年後,我諗返起呢一幕,我都好想當面親口對住AUNTIE講「HI!AUNTIE」

 
已有 0 人追稿