Helen話好想見到我,問我放學到太古地鐵站等好唔好,我當然話好啦!
但佢話唔可以太耐,只可以見10分鐘左右。
10分鐘總好過見都冇得見,我一放學就即刻搭車去太古搵Helen。我一去到就見到Helen 。
Helen對眼好腫,好明顯係因為喊而搞到咁。
見到佢對眼咁樣,我個心真係好似穿左個窿。
我哋拖住手行到去一個冇乜人嘅公園,Helen攬住我一路喊一路向我訴苦,而我就唯有不停安慰佢。
但咁嘅情況,我都不禁攬住Helen流下我嘅男兒淚。我喊唔係因為佢屋企人施吓嘅壓力,因為我知道我同Helen唔會比外界影響到我哋嘅感情。
我喊係因為心痛Helen要為我受咁多苦。
呢10分鐘基本上我哋都係淚水中渡過。
我同Helen都唔知點應對佢屋企人唯有過得一日得一日。




一個月之後Helen屋企人開始續啲續啲咁解封對Helen嘅限制。
俾返電話Helen、每日嘅六點前要返到屋企等⋯⋯
點解佢屋企人肯解除限制?
因為呢一個月Helen都表現得好乖好聽話。不過最主要係因為Helen呃佢屋企人已經同我分咗手。
Helen曾經說服過佢屋企人接受我嘅存在,但結果只有一個。就係叫佢諗都唔使諗。
呢段日子,我哋唯有返學嘅時候同對方WhatsApp溝通,放學嘅時候就見一見面,然後Helen就要返屋企,繼續接受佢屋企人嘅洗腦。
而我就每晚同一班豬朋狗友周街流連,有時就等班黑社會大佬吃喝玩樂。
我成日都諗,點解呢班大佬可以晚晚吃學玩樂,夜夜笙歌,啲錢好似用極都用唔完咁嘅?


我都好想可以好似佢哋咁有錢⋯⋯
所以佢哋每逢有啲咩活動玩,有啲咩事要打架,我都一定係第一個到,打架亦都會比其他人更加狼死。務求班大佬會留意到我。
因為我要上位我要搵大錢!
但有一次我闖禍了⋯⋯
有次,大佬落order吹雞,要去柴灣打架。
我二話不說學都唔番,叫埋個𡃁仔jerry,即刻搭的士去柴灣集合。
一到柴灣我同Jerry就即刻同班兄弟會合。
計埋我哋在內,我哋只有六個人,而其他人就趕緊過嚟。面對面,略略估計,至少有15個人。
佢哋見我哋人少,不斷叫囂,粗口橫飛,屋企人不斷起佢哋把口徘徊。
說話沒有最侮辱只有更侮辱。


我身邊嗰幾位兄弟知道我性格特別衝動,佢哋見我面色唔多對路,同我講:「唔好亂嚟住,等埋其他人到咗先。我哋宜家得六個人,人哋十幾個,同佢地打好洩底,比佢哋打死都似。」
呢個兄弟講嘅嘢雖然有道理,但好明顯佢同我嘅諗法差天共地。
俾人打死,仲好過俾人笑死。
對面班人不停向我哋嘴砲攻擊,突然比我聽到句:「吹唔到雞呀,垃圾?」
垃圾?
上次俾Helen老豆話我垃圾,我忍!
單憑你班MK仔都話我垃圾⋯⋯點忍?咁都忍得,有身分證都屌得啦!
今日唔係你死,就係我返唔到屋企!我見隔離個垃圾桶有支木棍,我諗都唔諗就隨手攞起支木棍,沖去對面啱啱話我地垃圾嗰條友度。
我沖去對面嘅時候,我隔離兄弟見到我咁,唯有跟着我一齊附和。
而對面班人竟然俾我哋六個人嘅氣勢嚇親,不由分說咁四散。
我全程淨係瞄住一個人,就係好囂張咁話我垃圾嗰條友
果條友走唔甩,俾我手起刀落咁用木棍打到瞓咗係地下挨打。
垃圾?
如果我係垃圾,咁你連狗屎都不如呀!
我發狂咁用木棍不停打佢,打到木棍都斷埋,就改用腳踢。


我隻腳好似開咗turbo咁,不停咁對住佢個頭當足球踢。
我一路打,一路嗌:「垃圾吖嗱⋯⋯垃圾吖嗱⋯⋯」
打打下,無啦啦有成隊警察衝過黎,我即刻拔腿就跑。
但最終我對腳嘅turbo,吾夠警察們對腳嘅turbo快。咁多人裏面,只有我一個走唔甩。
我被逮捕了⋯⋯
俾警察拉咗返差館之後,由於我仲未夠16歲的關係,法例規定要有家長嘅陪同下先可以錄口供。
差館通知左我阿媽黎,我阿媽一見到我就猛咁鬧我:「有學吾返,有書吾讀,群埋班唔三唔四𡃁仔打架⋯⋯」
類似嘅說話不斷湧入我隻左耳度,然後再從右耳湧出。
好多嘅父母淨係識叫自己嘅仔女要做咩咩咩,做到點點點,佢哋覺得佢哋為我地好,我哋感覺都會良好。
但就從來唔諗下,我哋其實都會有自己嘅諗法,會有自己嘅心事,我有自己壓力。
即使同你地講,你地會點?
相信大部份嘅父母會話:
「現階段讀書最緊要,兒女私情,拍拖呢啲嘢唔好諗咁多!」
現階段讀書好緊要?
係,的確好緊要。


但當你好愛一個人嘅時候,唔好話現階段,就算你去到邊個階段都係嗰位愛人最緊要。
我好愛好愛李䁱霖⋯⋯
我好想有好多嘅錢,多到足以令全部人覺得我有成就,有出息;多到足以令Helen屋企人都覺得我唔係垃圾!
各位父母可能會話:
「讀書讀得叻,搵份好工咪大把錢囉!」
呢句說話的而且確係有道理,不過又吾係啱晒!讀得書叻,唔代表可以搵得多錢。
大把大學生畢業之後搵唔到工,要做外賣仔;有啲更加慘嘅,要大熱天時着住套制服,攞住把掃把,推住架車仔,周街掃垃圾⋯⋯
唔通你哋會話佢哋周街掃地,服務社會,清潔香港,好友大志?
咁有大志,幫我洗埋條底褲呀嘛!我條底褲黃黃地呀!唔該!
當然,成功畢業之後搵到錢嘅大學生都有好多嘅。
但如果我要好似佢哋咁,要等幾多年?五年?十年?定要再耐啲呀?
一個唔好彩,加入左失敗嘅大學生行
列咪仆街?
到時香港嘅衛生清潔沒有最差,只有更差。
唔好同我講「邊會咁慘」呢啲廢話!


乜都俾你估到,你做埋李嘉誠吖嘛!
跟住佢嘅人生歷程嚟行,你做到李嘉誠㗎啦!做唔到?邊會咁慘呀?
加上,要我等咁耐先搵到多錢,年少氣盛嘅我,點等得切呀?
我要令全世界嘅人對我刮目相看!
但邊有咁易吖⋯⋯咁易嘅話,我即刻坐李嘉誠個位啦!到時全世界嘅人真係對我刮眼耳口鼻相看都似。
錄完口供,警察話要扣留我48小時,考慮俾唔俾我保釋。
今日,俾我打個條友冇死,但我就真系返唔到屋企⋯⋯
被扣留嘅期間,我腦海只得三個字—李曉霖。
我真係好掛住佢!
唔知佢做緊咩呢?
唔知佢呢兩日搵唔到我會點呢?
唔知佢知道我衰左,佢有會點呢?
我好驚啲差佬唔俾我保釋。
我好驚保釋唔到就見唔到Helen。
呢48小時,每分每秒都十分煎熬,每分每秒都係精神折磨。


四面都係牆,一張連住牆嘅長凳,同埋一個踎廁⋯⋯呢個就係被扣留人士嘅房間,俗稱「臭格」。
一日三餐,大小二便,瞓覺⋯⋯呢48小時都要係臭格做以上嘅所有野。
呢段時間絕對唔係同坐監冇分別!呢段時間絕對係比坐監更難捱!
好彩法例有規定唔可以扣留超過12小時,如果唔係,困你耐啲,個人癲都似。
如果你唔癲,我諗係因為你個人本身就已經癲癲地㗎喇!
48小時過咗,有差佬過嚟開咗個門鎖,同我講可以保釋,叫我出去坐,之後等我屋企人嚟保釋我。
我屋企人喺度搞晒啲手續,啲差佬同我講下個月要返嚟差館報到轉擔保,然後就放我走。
一踏出差館門口第一步,我即刻開手機。
一睇⋯⋯嘩!百幾個未接來電同未讀訊息。
大部份嘅未接來電都係來自Helen ,而大部份嘅訊息內容都係:
「聽電話啊!」
「做咩事呀?」
「見到即刻覆我!」
而愈新嘅訊息就係:
「你係咪避我?」
「你係咪想分手?」
Helen,我掛住你都黎唔切,我又點會想同你分手啊?
我即刻打電話俾Helen ,但可能因為佢上緊堂嘅關係,佢無聽。
收咗線之後,我即刻收到佢嘅WhatsApp。
Helen :「你呢兩日做咩事?做咩依家先搵返我?」
我:「sorry」
Helen:「點解道歉?發生咩事?」
我:「我前日打架衰咗,比差佬拉左返差館,啲差佬困左我係差過兩日,啱啱先放返我出嚟。」
Helen send咗個驚訝嘅emoji公仔樣俾我。
Helen:「我依家返緊學,我放學上嚟你屋企搵你好唔好?」
我:「好,我好掛住你!」
Helen :「我都係,你返屋企瞓覺抖下先啦!」
我:「好。」
之後我就同阿媽搭車返屋企。
阿媽一路搭車一路對我訓話。
其實真係好煩,我已經夠煩㗎啦!呢嗰啲時候比我靜下其實更加好。
即使阿媽你幾苦口婆心,我始終聽唔入耳,你咁樣只會搞到我越嚟越煩躁。
面對佢一輪又一輪嘅訓話,我嘅答案永遠都係標準嘅官方答案:
「得啦,得啦!」
困完臭格,個人都變臭人,兩日都冇沖涼,有冇換衫,臭到不得了。
返到屋企,我即刻沖返個靚涼。沖完涼,我就訓係張床瞓覺,等Helen放學黎搵我。瞓瞓下,電話鈴聲響起。
來電顯示:Helen。
我望一望個鐘,原來唔經唔覺已經瞓到Helen放學㗎啦!我即刻聽電話:「喂,放咗學啦?」
Helen :「係呀!我依家係你屋企門口啦!出嚟開門啦!」
估唔到Helen嘅速度咁快,我即刻從睡床爬起身開門俾Helen。
一開門, Helen就即刻上前攬實我話:「呢兩日一直搵唔到你,嚇死我啦!」然後佢就開始喊:「我仲以為你唔要我,避開我。」
我:「傻妹,我點會唔要你呀!我咁愛你,唔好亂諗野啦!」
Helen:「你真係好愛我?」
我:「當然啦!我唔愛你又點會同你一齊兩年咁耐啊!我愛你一生一世嫁啦!我哋大個仲要一齊結婚生仔,組織我哋嘅家庭㗎嘛!」
Helen開始笑返:「我都愛你一生一世,我大個淨係嫁俾你一個!」
我:「我都淨係娶你一個做老婆!」
Helen ,我當時所講嘅一切都係發自內心㗎 !我真係好愛你,好想同你組織屬於我哋嘅家庭。我,梁家洛,還有機會嗎?
氹返Helen開心之後,佢就開始問我點解要打架,點解又會衰之類嘅問題。
我同佢講係因為啲兄弟吹雞,所以去幫手,但當中嘅情節,同埋我諗過嘅嘢,我都冇講得咁詳盡。
因為我知道都唔好同佢講等於你飲多幾日俾佢,我唔想Helen因為我而更加唔開心。
我愛Helen,所以我希望佢係因為我而幸福快樂,而唔係因為我而愁眉苦臉。
我諗無人會想自己嘅愛人因為自己而愁眉苦臉掛!?
除非,真係不得已啦⋯⋯
Helen問我,會唔會因為呢單野而入去坐監。
我話:「我都唔知呀!而家仲轉緊擔保,Helen問我,會唔會因為呢單野而入去坐監。
我話:「我都唔知呀!而家仲轉緊擔保,差佬嗰邊點做都未知。」
Helen好擔心但佢知道追問落去都無結果,所以冇再問。
Helen問嘅問題,其實我都好擔心,所以我決定一陣送完Helen返屋企就去搵班兄弟,問吓佢哋當中有經驗嘅人。
Helen係我屋企陪到我五點半左右,我就送咗佢返屋企,之後我就去搵班兄弟。
Jerry一見到我就即刻問我:「大佬你單嘢點啊?」
我:「咪衰咗囉!可以點呀?」
Jerry :「咁你係差館點呀?」
我:「昆左臭格兩日,冇啖好食囉!唉,得我一個咁吾好彩,走唔甩。」
Jerry :「咁你有冇講我哋出嚟啊?」
哈⋯⋯以為你班兄弟真係咁關心我,原來講咁耐都提醒問你樣嘢姐。
我:「我冇講你哋出嚟啊!啲差佬都有問過你哋嘅野,我乜都冇講,我一個人攬晒啦!」
佢哋憂心重重嘅樣即刻冇晒,我我仲以為佢哋因為擔心我先咁嘅樣,原來又係我諗多咗。
人性真現實⋯⋯
我問佢哋知唔知我衰咗呢單野,使唔使入去受靶。
佢哋都話唔清楚。
咁我唯有打電話俾上級諮詢意見啦!
嘟⋯⋯嘟⋯⋯
我:「喂,大佬。」
大佬 :「家洛,困完48喇?你單嘢點啊?」
我:「係呀!依家啲差佬告我「傷人17」,下個月就返差館報到轉擔保。係喎大佬,我想問吓你我單嘢會點,使唔使入去受靶?」
大佬:「你單嘢都唔少野㗎喎!對家個傷者傷成點啊?」
我:「啲差佬話條友個頭骨比我踢裂咗。」
大佬:「嘩!如果係咁嘅話,你十成九都要入去受嫁喇喎!」
我:「下⋯⋯唔係啩?咁要入去受幾耐架?」
大佬:「咁就要睇個法官判你幾耐啦!不過你咁細個,我諗可能判你入教導所。」
我:「咁即係大約要受幾耐㗎?」
大佬:「大約年半左右啦!唔使咁灰喎,細佬,出返嚟咪又係一條好漢!做古惑仔,預咗會有呢一日㗎啦!」
之後嘅對話,我都係「嗯」、「哦」回應,最後就講咗聲拜拜。
我一聽到要入去受年半,我嘅世界靜晒,心情好似跌咗落谷底咁,好灰,好灰⋯⋯好撚灰。
啲兄弟不斷安慰我:「唔好咁開心啦!我哋實等你喎!我哋而家去飲餐酒,放鬆下心情,開心下先啦!」
我:「唔去啦!冇心情呀!你哋慢慢玩,我返屋企先。」
唔開心就話去飲酒開心吓;開心又話去飲酒慶祝下⋯⋯開唔開心都去飲酒,咁樣有意思咩?
我返到屋企就入房訓係張床度,不斷諗「受靶」呢兩個字。
如果我受靶,咁Helen點啊?
諗來諗去,我都係唔知點應對呢個問題。
真係好難諗⋯⋯
我班兄弟有個WhatsApp聊天群組,我係群組問佢哋有咩睇法。
賢仔:「家洛,你入去受靶,你條女都等你唔到㗎啦,駛乜諗姐,入得去就預咗冇㗎啦!你唔係入去一兩日啊!你入去差唔多年幾兩年呀!兄弟,緣份嘅嘢,個天注定使乜唔開心呀。」
兄弟,你講嘅嘢真係難聽過粗口。睇你個款好似看破紅塵咁,有朝一日你老母死咗,我諗你應該都唔會開心㗎啦!緣份嘅嘢,個天注定吖嘛!
你不如唔好做古惑仔啦!你唔做和尚真係嘥哂!
阿麒:「出返嚟再溝過囉!呢個世界大把女,驚咩冇咗條女姐!」
兄弟,呢個世界係就係大把女,但李曉霖就得一個,唔係條條女都係Helen嚟㗎喎!
咁唔通係條街見到有對奶嘅,就可以做你老母咩⋯⋯
阿宗:「家洛,決絕啲,同你條女講分手,咁樣你同佢都好過啲。佢等你嘅話,你又唔知佢係出邊會做啲咩,佢又辛苦,你又辛苦,如果真係注定係埋一齊嘅,你哋點都會一齊番嘅!」
阿宗,咁多個兄弟,你講嘅嘢最啱聽,感覺上最有道理,雖然最後結論都係叫我分手,不過你冇講啲九唔搭八嘅嘢。
如果可以頒過奬俾你,大條道理獎一定非你莫屬!
我好愛Helen ,所以唔想失去佢;但愛佢,又想佢生活得開心啲,過返屬於佢嘅生活,唔通真係得分手呢條路行得通?
唔分手嘅話, Helen喺出邊等我一定好辛苦,佢都有佢嘅自由,唔應該因為我以束縛住,更何況我受緊靶。
分手嘅話,雖然一定好難受,但之後嘅日子,佢應該會好過啲⋯⋯加上,正如阿宗所講,注定一齊嘅話,點都會一齊返。
兩者,我選擇咗後者,不過我想同Helen過埋距離仲有個幾禮拜就到嘅情人節先同佢分手,因為我想留多啲美好回憶俾大家。
我想貪多一起,我同Helen嘅日子⋯⋯
呢個禮拜, Helen好似之前咁,每日都上嚟我屋企搵我。不過佢每日嘅五點半就要返屋企,有時佢呃佢屋企人,學校要佢留堂遲啲返屋企。
應我就有事我都唔返到朝早起身就出門口去朋友屋企瞓覺或者打機。
因為我阿媽唔俾我唔返學,所以我叫朋友加班係我屋企人幫我打電話去學校申請病假之後等到Helen放學,我先同Helen一齊返屋企。
知道自己即將要入去受靶,仲邊有心情返學。
讀萬卷書,不如食萬寶路啦!
Helen不時都會問我,我單嘢點,使唔使坐監。我每次都會話唔知,我唔想俾Helen知道我要坐監而唔開心,我想開開心心過埋如下嘅日子。
差唔多時辰到,我就會同Helen分手,所以佢根本唔需要知呢啲嘢。
即使知道左,只會令大家更加唔開心,而我亦都唔會改變我嘅決定。



情人節前幾日,我一直都諗緊情人節應該點同Helen過。
上年嘅情人節,我同Helen只係求求其咁兩個人撐枱腳,連花都冇送,乜驚喜都冇。
雖然Helen半句怨言都冇,但我相信每個女仔都希望可以同自己嘅另一半過一個浪漫又甜蜜嘅情人節。
今年嘅情人節一定唔可以咁馬虎,一定要佢難忘⋯⋯但我成副身家只得$1500,點樣先可以好好運用呢千蚊呢?
呢個問題真係好難諗,諗極都諗唔通。情人節嗰日, Helen要翻學,又要早返屋企,究竟點樣做先方為上策啊?
我打電話俾Helen,情人節嗰日佢要幾點返屋企, Helen話情人節嗰日佢會同屋企人講學校要佢留堂,然後再同佢地講放學同同學食埋飯先返屋企,佢話大約九點半要返到屋企。
由Helen放學直到夜晚九點,要用千五蚊唔到佢擁有一個浪漫,甜蜜又難忘嘅情人節,我個腦冇用咁耐,今次用盡佢啦!
情人節,錢唔係重點,但最緊要係心意。
第二個女仔我唔清楚,但Helen一定係!



終於到咗情人節正日,我好似平時咁,冇返學,等到Helen放學先一齊返屋企。
Helen一見到我就滿面笑容同我講:「
情人節快樂呀!」
應我就好似平時咁,但都冇乜特別咁回應佢:「哦,情人節快樂。」
Helen :「今日我哋去邊呀?」
我表現到有少少愕然:「去邊?咩去邊啊?返屋企囉!」
Helen嘅表情更加愕然:「吓?情人節喎!」
我:「今晚出去求其食餐飯咪算囉!返屋企先啦!」
我見到Helen個樣好開心好失望,對眼仲泛起陣陣嘅淚光。
但我係心裏面歡呼起來,因為我計劃嘅第一步應成功。我相信一個女仔充滿期待咁迎接佢另一半為佢準備嘅情人節,點知佢另一半令佢超級失望,而最後佢嘅另一半又突然送上驚喜,佢一定唔會忘記一個咁嘅情人節。
因為佢充滿期待,然後有極度失望,最後有彈個浪漫驚喜,佢一定格外深刻!
我就係要製造一個咁嘅效果。
見到Helen咁開心嘅樣,雖然有少少心痛,差少少有一刻想同佢講個事實出嚟,但呢日可能係我同佢最後嘅一個情人節,我幾心痛丟人住,因為我想Helen永遠記得呢一日。
Helen ,你仲記唔記得2012年2月14日,呢日嘅情人節係點過嗎?
我從來都冇忘記過,之後都唔會,一世都唔會。
我同Helen返到屋企就好似平時咁,用下電腦傾吓計。
Helen用電腦上Facebook嗰陣,佢不斷睇人哋嘅情人節點過,有時會有意無意咁望下我。
佢嘅舉動就好似向我暗示,佢都想有一個浪漫嘅情人節。
我扮到毫不在乎咁,但其實我已經計劃好晒。
Helen你即管唔開心啦!
你要失望,我越興奮呀!哈哈⋯⋯
差唔多六點半,我同Helen講:「差唔多食飯啦!我哋出去行下,睇吓有咩食啦!」
Helen個樣真係失望到極點:「今日情人節,邊度都無位啦!」
我表現得唔耐煩:「行吓睇吓先啦!大不了咪食茶記或者M記。」
我諗Helen聽完呢句,心情應該直達崩潰㗎啦!
Helen嘅語氣冇晒感情咁講咗句「哦」,之後就同我落樓周街行行。
我一路行,一路自言自語講:「究竟食M記好唔好呢?」
Helen聽到都冇乜反應,我諗佢應該已經對今日嘅情人節死心㗎啦!
不過我一陣一定會令佢死灰復燃!
我一直帶着Helen行嚟行去,我行到一間係我計劃裏面選好咗嘅屈臣氏停低,之後同Helen講我想入去睇啲嘢。
間屈臣氏都幾大,有兩層,我諗熟灣仔嘅人應該都知我所講嘅屈臣氏喺邊,因為灣仔的一間屈臣氏係有兩層咁大。
我拖住Helen行咗上2樓, 2樓冇乜人,啱晒一陣落嚟我想做嘅嘢⋯⋯人少冇咁怕羞嘛!
我同Helen行左上2樓之後,我扮晒搵嘢咁款,然後我同Helen講:「你喺度等我一陣先,我落樓搵一樣野先,唔好行開喎!我電話冇晒電,驚搵你唔到啊!」
當然,電話冇電係假㗎啦!
佢答我好之後,我就用最快嘅速度跑去樓下屈臣氏隔離花舖。
我一跑到去花舖,我就從褲袋攞出一張訂單,因為我前一日已經訂咗一紮有11隻公仔嘅花。
如果11隻公仔都係Helen最鍾意嘅迪士尼公仔。
這公仔叫甘仔,甘仔係史迪仔套卡通片出現過嘅公仔嚟,我係因為Helen先知道甘仔野存在。
呢紮公仔用咗我差唔多成副身家,盛惠$1280。雖然真係貴咗啲,但為咗Helen開心,錢算得係咩?
拎完紥花之後,又用最快嘅速度跑返屈臣氏,以免Helen等得太耐。
我行到2樓, Helen一見到我拎住紥花,就即刻露出一個驚喜嘅表情,嘴角亦都慢慢向上翹起,同啱啱扁晒咀嘅表情,簡直天同地嘅分別。
我閑錢同Helen講:「情人節快樂呀!今日係我同你嘅第二個情人節,我點會冇準備啊!傻妹,今次係我第一次送花比女仔架咋!鍾唔鍾意呢紥花?」
Helen:「好鍾意呀!上面仲有我鍾意嘅甘仔,我仲以為今日情人節你乜都冇準備,我啱啱真係想喊架!」
我:「咁你而家唔會嬲我吖嘛?」
Helen:「唔會,多謝你家洛!我愛你一生一世。」
我:「我都愛你一生一世!」
見2樓冇咩人,只有一個職員係收銀處,我同Helen就⋯⋯啜。
啜完之後,Helen即刻攞部手機出嚟影相,影完之後就擺上Facebook放閃。
我同Helen講:「行喇!去食嘢啦!」
Helen :「但去食咩呀?」
我:「周圍行吓睇吓有咩食啦!」
之後我就拖住Helen行, Helen就好風騷咁揸住紮花行,個樣好陶醉。
我拖住Helen行到去一間火鍋店,我問Helen想唔想打邊爐,佢話:「梗係想啦!平時叫你陪我打邊爐,你又唔去。今日情人節咁多人你先來,一定無位啦!」
佢講完,我對佢瀟灑咁笑一笑,然後拖住佢行入火鍋店。
我同火鍋店嘅店員講:「唔該,性梁嘅,訂咗7:00兩位。」
個職員同我核對身份就帶咗我哋上去坐,Helen個樣好似仲未相信眼前發生嘅一切咁。
見到佢嘅表情,我就知道,我嘅情人節「驚喜再驚喜計劃」,已經成功左啦!
我:「Helen ,我同你嘅情人節點會咁馬虎,淨係送紥花就算呀!我知你一直都好想打邊爐,但我都冇陪你去,所以我前兩日就訂咗位,今日同你黎食,係咪好驚喜好感動呢?」
Helen:「多謝你呀!我好似發緊夢咁呀!」
我:「好啦好啦!快啲點野食啦!食到九點,你要返屋企㗎啦!」
如果呢一個真係夢,我希望永遠都唔會醒⋯⋯
你一餐邊爐,我幫Helen涮下,佢又幫我涮下,好溫馨。
但⋯⋯我哋仲可以溫馨幾耐?
今日⋯⋯或者就係最後一日⋯⋯
食完飯之後,我送Helen返屋企嘅途中,我諗起Helen係呃佢屋企人覺喎!佢返到屋企攞住紥花咪穿煲?
我問Helen點算,佢話一定唔會扔咗紥花,佢話佢會諗辦法帶返屋企。
之後我都冇追問佢,直到多年後嘅今日,佢點樣帶返屋企呢個問題,都仍然係一個謎。
只知道,佢成功帶咗返屋企。

 
已有 0 人追稿