終於到咗5月2號,上庭嘅日子。
渡過呢14日嘅時間,就好似要過14年嘅時間咁。
喺裏面,度日真係如年,好難捱。
今日上庭,我全家都有黎睇我判決。
開庭時,又好似上次上庭咁,控方講案情。
控方講完之後,就輪到我嘅代表律師講求情說話。
最後都係不出我所料,我比法官大人判入教導所,為期六至三十六個月嘅訓練。
不過話就話六至三十六個月姐,但其實最起碼都要但其實最起碼都要18個月左右。
雖然我已經同左阿媽講我好大機會判入教導所
好俾佢有個心理準備。


但法官大人宣判完果刻,阿媽都係喊咗出嚟。我阿媽就係咁眼淺。
去到教導所,呢度比壁屋攞報告嘅時候好好多。
每一朝早步操一陣,之後就學技能同工作。
呢道你唔會一無是處,最起碼都有一技之長。
呢度有好多技能俾你學,有關於電子,水喉,髮型,銀樂,餐飲,廚房,洗衣,車房等等。
但你冇得選擇,學乜嘢全部有阿Sir編排。
呢度有咁多樣嘢,最辛苦就係銀樂隊。
而我偏偏就被編排到去銀樂隊學音樂,我係負責樂隊裏面嘅伸縮號。
銀樂隊點解辛苦呢?
因為入得黎嘅人,大多數都未接觸過銀樂。


但呢度就要你係三個月來學識指定要你學嘅樂器,仲要三個月內背熟百幾首銀樂歌曲,要熟到一講首歌歌名出嚟,你就要即刻演奏到出嚟。
最辛苦,真係莫過於銀樂隊。
工作到12點左右,就會好似壁屋中午嘅食粥食提子包。
食完就伏低張枱度休息一個鐘左右。
休息完就會安排到去書房上堂,學返平時出邊嘅中英數同通識
上堂嘅時候會分兩個課室,一個課室係比有心讀書,即將會應考文憑試嘅人;一個課室就俾啲無心向學嘅人。
我當然係後者啦!
我哋呢一班,個個入到課室就即刻趴係張枱瞓覺,當老師透明咁,佢有佢嘅教書,我哋有我哋嘅瞓覺,河水不犯井水。
上完堂,五點左右就食飯,食完就有半個鐘日子有時間睇吓電視,捉下象棋或者睇吓報紙。
而我就多數都係選擇捉象棋。


我受靶之前,我對象棋完全零接觸,但我入到黎之後,我見冇嘢做就學吓捉象棋。
我同人捉咗幾場之後,我就已經開始掌握到象棋玩法。
捉下捉下,我慢慢由象棋白癡,變成象棋屈機。
真係唔係自誇,我學識捉象棋兩個星期之後,就已經冇人贏到我,我同其他人講我啱啱學咗無耐都無人信。
個半鐘嘅自由時間完咗,就會安排返倉。
返到倉,你想睇書就睇書,想寫信就寫信,想瞓覺就瞓覺。
我返到倉多數都訓係張床到諗嘢,諗下出到去有咩方法搵大錢,諗下屋企人,諗下Helen ,同埋掛住Helen。
我無時無刻都掛住Helen ,夜晚發夢見到佢已經成為每日基本動作。
我成日諗,如果我當時唔係同Helen分手,而家又會點呢?仲等緊我?定抑或已經冇再等我?
全部都係未知數。
呢度有好多有另一半系出邊等佢嘅人喺度,但好多都受受下,另一半就再等。
因為淨係靠書信聯絡,其實真係好難維繫感情。
呢度嘅探訪只可以屋企人探得,朋友冇得探,所以喺呢度,連見吓自己女朋友嘅機會都無。
加上佢係出邊唔開心時,你唔可以喺佢身邊安為慰佢。
如果佢寫信同你講唔開心,你會寫信氹番佢嘅時候,可能已經有人氹左佢,已經開心返。


佢想身邊有人陪嘅時候,你又喺裏面「left right left」緊,慢慢你就會喺佢心目中,變得可有可無。
之後就會演變成分手。
喺裏面, 10個有九個嘅女朋友都係等等下就有新男朋友,唔係就寂寞難奈,然後偷食。
呢度個個人嘅經歷都大同小異,結果都係分手。
教導所每個月只有四次探訪,我阿媽每個星期都探我一次,咁樣一個月四次就啱啱好。
入咗嚟個半月,有時我阿媽嚟探我,我忍唔住同阿媽講我好掛住Helen。
阿媽:「唉,你無啦啦同人分手做咩姐?Helen對你咁好,你就對人咁差,佢都仲咁愛你,一開始你地兩個拍拖嗰陣時已經叫你珍惜佢㗎啦!
我:「咁我人都入咗嚟,仲一齊嘅話點照顧佢姐,同埋要佢等都唔知佢等唔等到啦!即使等到又唔知道佢做過啲咩。咁嘅環境,好似分手好啲吖嘛!」
阿媽:「你地一齊左兩年幾喇喎!你仲唔信佢咩? Helen咁乖囡,點會瞞住你做啲唔俾得你知嘅事呀!講咁多,你咪又係唔信人。你照顧唔到佢姐,仲有你阿媽吖嘛!同埋Helen咁叻女,駛乜你照顧姐,你自己都未顧掂自己啦!」
係,冇錯。我由始至終都信唔過Helen。
Helen同我一齊嘅時候,不時都有男仔溝佢,我一直都好驚有一日Helen真係會離我而去。
我又唔係特別靚仔,又唔高大,仲要冇錢, Helen大把選擇,總有一個好過我。
所以每逢有男仔想識Helen ,我唔理個男仔目的係真係純粹想認識新朋友定係想溝Helen。我都一定趕盡殺絕,唔俾佢哋同Helen有太深嘅認識。
我對Helen嘅唔信任,其實只係因為我嘅自卑。
阿媽繼續講:「你如果唔係同Helen分咗手,我信佢真係等到你㗎!唉,你真係失敗!依家終於知道後悔啦?」


比阿媽咁樣講完,我開始覺得自己做錯決定,我話:「就算後悔又可以點呀。」
阿媽:「等我出去幫你搵下Helen啦!」
我:「搵佢做咩啊?」
阿媽:「睇吓佢對你仲有冇感情啊!放心啦!你阿媽知點做㗎啦!」
我:「咁真係靠你啦!阿媽。」
阿媽:「得啦!有咩消息下次探訪同你講啦!」
探完訪之後,我求神拜佛,希望阿媽下次探我嘅時候,同我講關於Helen嘅嘢係好消息。
時間過得好快,又到左阿媽探我嘅日子。
探訪嘅第一句,我就問阿媽:「Helen嗰度有啲咩消息啊?」
阿媽:「我約咗佢星期日飲茶,到時我再慢慢同佢傾吓計啦!佢問我你點,我同佢講你係入面,佢好似對你入咗去有少少驚訝咁嘅?」
我:「我都冇同佢講過我受靶,唔知都好正常呀!咁佢有冇講啲咩啊?」
阿媽:「冇講啲咩喎!傾左一陣姐嘛!不過我諗佢對你仲有感情嘅,我約佢飲茶,佢都肯。話晒你哋一齊左咁耐呀!應該冇咁易放得低嘅!」
我:「望就咁望啦!我好掛住佢呀!」
阿媽:「唉,我會幫你講吓好說話㗎啦!你喺裏面點啊?」
我:「入咗嚟差唔多兩個月,都慣咗呢度嘅生活模式啦!不過慣還慣,都係覺得好唔舒服,最難捱就係張木板床,真係瞓唔到條腰痛㗎 !好掛住屋企張床啊!」


阿媽:「衰仔,終於知道屋企幾好未?你出到嚟生生性性啊!唔好再入返嚟,你有冇諗過出返嚟返工定讀書啊?」
我:「得啦得啦!出到嚟再算啦!」
阿媽:「次次同你講正經野,你就淨係識講得啦得啦。就算Helen肯同返你一齊,到佢大個咗都唔要你啦!你做乜都唔嗲唔吊,我係佢屋企人更加唔放心交個女俾你啦!」
我越聽越心煩:「得啦得啦!我自己啲嘢有分數啦!你唔好煩啦!」
阿媽又再講:「又係得啦得啦!我為你好咋!你冇錢,邊個要你姐!」
我知我阿媽係為我好,不過我真係覺得好煩,講咁多嘢咪又係話我冇錢,要我搵錢。
冇錢,無人要我。
咁我有錢, Helen係唔係就唔會離開我?
之後嘅對話,我全程任得阿媽講,我就選擇唔出聲,用沉默是金黎賺下錢,應付阿媽。
因為冇錢,我講乜都冇用。
又到左第二個星期嘅探訪。
我對住阿媽講嘅第一句說話,依然係「Helen嗰度有啲咩消息呀?」
今次阿媽講:「上次星期日同佢飲茶,我同Helen講你好掛住佢,但佢話你有女朋友啦喎!搞到我都唔知點答佢。」
我:「我同嗰個女仔一齊左一個月咋嘛!個眼雲煙嚟㗎咋!」
阿媽:「咁你都係衰嘅!無啦啦又多個女朋友。」


我:「我一開始諗住狠心啲,想佢放低我丫嘛!但點知依家就輪到我放低姐!」
阿媽:「你今次真係做錯晒!佢叫我同你講,出到嚟要生生性性,重新做人啦!」
我:「冇喇?淨係講呢啲咋?」
阿媽:「冇喇!Helen真係好女仔,你咁樣對佢,佢都仲為你好。」
Helen ,你真係一個好好嘅女仔。
對唔住。
阿媽:「我會同佢保持聯絡㗎啦!家姐又會得閑上網睇吓佢嘅近況,你喺度乖乖地,快啲出嚟最追番佢囉!」
我:「唯有係咁啦!」
之後嘅每次探訪,我阿媽同家姐都會同我講下Helen嘅近況。
Helen冇咗我之後,生活好充實。
佢喺學校課外活動參加左田徑組;放假嘅時候就同D朋友行下街,有時仲會搵我阿媽飲茶又或者行街買衫。
我諗我出返去嘅時候,我同Helen仲有機會掛⋯⋯
我成日幻想,我出返去點樣溝返Helen。
成日幻想出返去營做一個好浪漫嘅氣氛感動Helen,成日幻想我同Helen好幸福咁一齊生活。成日幻想,幻想,再幻想,期待有一日會發生。
直至入咗教導所嘅第三個月,我嘅幻想恐怕永遠只屬於幻想,甚至係妄想。
入咗兩三個月之後,有次阿媽嚟探我,我嘅第一句都係冇變過,同樣都係問Helen嘅近況。
今次阿媽迴避我嘅問題,佢轉移呢個話題,問我啲無關痛癢嘅問題,例如問我:「喺裏面過成點呀?」「銀樂隊啲歌背熟未啊?」⋯⋯呢類嘅問題。
我開始唔耐煩:「你肯答我未啊? Helen點啊?」
阿媽又想再次逃避:「唔使理人啦!顧好自己先啦!」
我聽完阿媽咁講,我都感覺到有少少古怪,平時阿媽都會同我講Helen呢個星期點點點,但今次就不斷耍太極,唔想答我。
我估到Helen一定有啲事發生,我同阿媽講:「咩唔使理佢啊?佢發生咩事呀?講啦!」
阿媽:「你冷靜啲先。」
我:「講啦!」
媽媽好凝重咁同我講:「Helen有咗男朋友。」
我呆一呆,俾唔到任何嘅反應,但我兩行嘅淚水不自覺咁不停湧出嚟。
自從我懂事之後,我都未試過喺我屋企人面前喊過。
今次係第一次⋯⋯因為Helen。
雖然我有如果呢一日嘅發生,但當真係發生嘅時候,個心一樣會痛,好似比把刀捅嘅痛。
阿媽見我喊,佢都唔知可以點好,唯有不停安慰我。
不過阿媽講咩都入唔到我隻耳度,我成個腦淨係只有Helen。
我真係唔想失去Helen ,但明明係我飛佢,不過種感覺就好似係佢飛我,完全相反左。
我諗當初我同Helen分手,然後又同Winnie一齊嘅時候,Helen都係呢種感覺⋯⋯一種生不如死嘅感覺。
成程探訪,我淨係喊,喊,喊,同埋喊,冇再講過任何野。
阿媽見我咁,十分之擔心,但無奈,半個鐘嘅時間過咗,呢度唔會因為我喊而比探訪者傾耐啲,阿媽唯有憂心重重咁離開。
探完訪,我心情仲係未平伏,不停咁喊,探訪室嘅阿Sir見我咁,帶咗我去心理輔導。
心理輔導阿sir問我咩事,我都唔知點答佢。
講分手嘅話,但我同Helen一早分咗手,邊度算係分手? 
唔通我同佢講,我同女朋友分左手幾個月,但啱啱先開始唔開心咩?
講出嚟,唔知案情嘅話,真係𢱑晒頭,成頭問號。
加上,其實我都唔太清楚自己點解要喊,我淨係知道我好想喊,將我抑壓多年嘅感情同壓力喊晒出嚟。
我同個心理輔導講:「我同女朋友發生左啲感情問題,我喊完就OK 㗎啦!」
我講完,佢亦都冇放棄追問我,仲講咗句好低能嘅說話出嚟,佢話:「不如你講出嚟俾我聽吓,睇吓我幫唔幫到你。」
呢句野真係好反感,我:「我條女有新仔啊!你可唔可以放我出去一兩個星期,比我溝翻條女先呀?唔得呀嘛!你幫到我啲咩啊?你淨係可以同我吹水廢嗡,幫到條春咩你。」
當然,我咁樣講嘢完全係唔啱規矩啦!
但個心理輔導見我情緒咁激動,都冇再講野刺激我,佢:「咁你喊完,我再帶你走啦!有咩需要同我講。」
我諗懲教署,稍為稱得上算好人嘅,應該係呢個心理輔導嘅阿Sir啦!
我喊多一陣,我見差唔多到食飯時間,我抹眼淚咁同個阿Sir講:「我冇嘢啦!帶返我走啦!」
阿Sir就帶我返飯堂食飯。
離開心理組間房嘅一刻,我就忍住我嘅淚水,唔再比眼淚流出嚟。
因為我唔想比其他囚犯見到,呢度十個有九個都係古惑仔,我唔可以肉酸比佢哋睇。
返到飯堂,我喺呢度認識嘅朋友都知道我去咗心理組。
佢哋關心我發生咩事,我都只係輕描淡寫咁講:「同之前個女朋友發生咗啲事,小事黎姐。」
佢哋知我唔想講,都冇再追問落去。
返到倉,我即刻訓係張床度,塊面向牆,扮瞓覺。
但其實,我喺度喊緊。
瞓喺度忍住唔出聲咁喊好辛苦,就好似俾人強姦嘅時候,發出唔到任何聲音咁。
童年時跌得最痛嘅一次,都唔及今次嘅痛;整個童年嘅淚總和,都唔及我為你流淚嘅今日。
喊到攰攰地,我瞓着又發左一個關於Helen嘅夢。
喱個夢,係惡夢,比妖魔鬼怪嘅惡夢更可怕。
夢裏面, Helen同個男仔拖住手,重複做緊我之前同佢做嘅事情,而Helen比之前笑得更開心。
我不斷大叫Helen ,但佢都無理
突然,佢一個轉身指住我講:「係你自己攞嚟㗎 !」我比夢裏面的Helen嘅一句說話嚇醒咗,但呢句說話的而且確冇講錯。
Helen ,我好想同你解釋呢一切,但你願意聽我解釋嗎?
我醒咗之後,我個腦每一刻都播放着我同Helen嘅每一個畫面,淚水亦不受控制咁,一滴一滴流落嚟。
究竟腦海裏嘅畫面,還有機會再發生嗎?
呢一夜,我都冇再瞓唔着,成晚比淚水沾濕兩眼。
第二日,阿媽擔心我諗唔通,佢同家姐一齊嚟探我。
阿媽同家姐不斷安慰我,但我心情咁低落嘅時候。根本講乜都冇用。
最好嘅方法就係由時間慢慢沖淡。
阿媽話唔使為咗一個女仔咁傷心,我仲細個,仲有大把靚女等住我。
呢個世界就係有大把女,但都要鍾意先得架!
如果我只係鍾意靚女,咁我唔使咁傷心,求其溝番個靚女就得啦!
重點係我淨係鍾意Helen,無人可以代替佢呀嘛!
我問阿媽同家姐:「Helen親口同你地講佢有男朋友架?」
家姐:「唔係呀!我睇佢Facebook近況,佢上載左一張同個男仔喺迪士尼錫嘅相,Facebook關係仲由單身轉做交往中。」
我聽家姐咁講,已經知Helen 有男朋友呢件事,十成十係真㗎啦!
但我仲係唔肯去相信,我話:「你cap張圖寄入嚟俾我睇吓先吖。」
家姐:「唔使睇啦!睇嚟做咩唧?」
我:「總之我要睇啦!」
我家姐好唔願意,但見我咁執着要睇張相都唔想刺激我情緒之後,唯有應承。
阿媽話:「細佬,你仲細個,遲啲大個搵到錢,大把女仔撲向你度啦!到時你要邊個,邊個都同你一齊啦!」
錢,真係咁萬能?
我心諗,我一定要搵到好多嘅錢,到時Helen就會重投我嘅懷抱,到時乜問題都解決晒!
今日嘅探訪,我冇再好似尋日咁情緒不穩,因為第一,我唔想屋企人咁擔心我;第二,我唔可以肉酸比其他人睇,有咩肉酸野,留返得返自己一個嘅時候先慢慢肉酸。
陳小春有首歌—《獻世》,裏面有句歌詞係呢個時候對我好應景:
「寧願失戀亦不想失禮」
探完訪就好似平時咁如常生活,但心裏面好唔舒服,我好想有人充當我的聆聽者。
但另一方面,我又好唔想比其他人知道我嘅事。
做人就係咁矛盾,就好似我同Helen咁,我想Helen走嘅時候,佢唔走;到我想Helen唔好走嘅時候,佢已經走咗。
呢幾日,我係其他人面前都冇表露過任何負面嘅情緒。
不過係夜晚,我會趁所有人訓着嘅時候,流晒眼淚流晒鼻水咁喊。
食到一個星期之後,我終於收到我家姐寄入嚟嗰張cap圖,我家姐連埋張相嘅留言一併cap埋落嚟。
我望住張相,我始終忍唔住喺其他人面前留下眼淚,張相個男主角,我認得佢係Helen學校嘅男仔黎。
相裏面,佢同Helen係迪士尼樂園嘅門前⋯⋯攬住錫。
而相下面,Helen有句留言寫住一首歌叫《他約我去迪士尼》這,其中一句歌詞。
「畢生也願記起 香港迪士尼」
我未同Helen分手嘅時候,經常叫我陪佢去迪士尼,我每次都敷衍佢話好,但就冇一次有計劃。
直到而家,Helen終於去咗迪士尼,但佢身邊嘅人已經唔再係我。
係其他人眼中,呢張相好浪漫,好甜蜜。
但係我眼中,只有百般嘅心酸。
我身邊嘅朋友見到平時硬淨,堅強嘅我,竟然望住張相流眼淚,佢哋關心我,問我咩事。
我冇答佢哋,直接比張相佢哋解釋一切。
佢哋問:「呢個係你女朋友?」
雖然唔係,但我唔想解釋咁多,我點頭回答。
樂仔:「唔使咁灰喎!我入到黎之後,我條女都唔等我啦!女人係咁㗎啦!」
肥博:「男人老狗有咩好喊姐,我出到去帶你去溝女啦!」
樂仔同肥博,係我教導所呢度同我最要好嘅朋友。
佢哋不斷安慰我,但佢哋越安慰,我就越想喊。
我叫佢哋比我一個靜吓,然後就行入廁所洗洗面。
洗完面就搵張枱伏低,自己一個靜吓。
我伏咗喺度,乜都唔想諗。
但越係迫自己唔諗,就越係諗住Helen。
究竟Helen嘅生活係點㗎?
我諗起臨入嚟嘅時候,Jerry明明話會幫我睇實Helen,唔俾任何男仔接近佢,尤其係佢學校嘅男仔。
但點解, Helen依家會有男朋友,偏偏仲係佢學校嘅人?
究竟Jerry係出面有冇幫我睇住Helen ?
我返到倉,同倉嘅倉友見我今日收完相,情緒就好低落,佢哋又問我發生咩事。
不過佢哋問我並唔係出於關心,只係純粹八卦。
我唔想比咁多人知道我嘅嘢,我同佢哋講冇嘢發生,只係有少少唔舒服。
佢哋當然就唔信啦!
其中一個叫阿光嘅倉友,隨手就攞起我放喺床上面張相,我想制止都制止唔着。
出名口臭嘅阿光,睇完張相就話:「喔~原來比女飛,條女仲要拖住條新仔去迪士尼打茄輪。」
佢講完仲要加一兩聲難聽嘅笑聲。
我即刻攞返張相,講:「收爹啦!臭口光,你係咪想打架啊?」
佢:「唔講咪唔講囉!」
我本身都冇同佢計較咁多,諗住靜地瞓係張床諗下野又或者瞓覺。
但個臭口光無啦啦訓係佢自己張床度唱歌,一開始我都冇乜為意。
聽下聽下,原來佢唱緊個首歌就係《他約我去迪士尼》:「畢生也願意記起香港迪士尼⋯⋯」
我火都嚟埋,你未睇過張相嘅話,我唔怪你。
但你睇過張相,明知首歌就係想裏面留言句歌詞首歌,咁即係擺明挑釁我姐。
我話:「臭口光,你個撚樣係咪黎野啊」
臭口光:「黎咩嘢啊?我唱歌有得罪你呀?使唔使入紙同你申請啊?」
我當場跳咗掣,我聽完佢句野,我冇再回應佢。
我跳落床,沖去臭口光嘅床度扯佢落嚟,然後同佢扭埋一舊打架。
我不斷捉住佢個頭撼落牆度,打到佢訓落地下,我不斷當佢個頭係波咁踼。
而佢就用手暗住自己個頭,個口就嗌:「對唔住,對唔住⋯⋯」
我踢到佢流晒鼻血,好腫面腫,我都未有想停手嘅意欲。
因為我真係好唔開心,我好需要盡情發洩。
臭口光做咗我嘅出氣沙包,完全係佢自己唱歌申請。
想當年,巴士阿叔講過一句金句,好適合我宜家呢個時候嘅心情⋯⋯
你有壓力,我有壓力,做咩要挑釁我呀?
我打到臭口光連暗住個頭嘅力都冇,其他倉友現我仲係未有想停手嘅意思,佢哋過嚟拉住我,叫我停手。
呢個時候我先至停手,再同臭口光講多句:「你可以試吓再唱,你唱一次,我打一次, 知吾撚知啊?」
臭口光口窒俐窒:「係,係⋯⋯」
我一巴就摑落佢塊面度:「我問你知唔撚知啊!」
臭口光:「我知,知道⋯⋯」
你嗰度每日嘅朝早到例行身體檢查。
我望一望臭口光塊面滿面都傷痕,啲阿Sir聽朝一定會發現。
啲阿Sir睇返倉裏面嘅閉路電視紀錄,在問吓倉裏面嘅人一定知道發生咩事。
不過我唔諗咁多啦!除咗Helen之外,我乜嘢都唔想諗。
第二朝,臭口光嘅傷痕比琴晚更加瘀,更加腫。
未到朝早嘅例行身體檢查,當值嘅阿Sir就發現咗。
個阿Sir問臭口光發生咩事,臭口光冇答佢。
之後個阿Sir就帶走臭口光,單獨問佢。
隔咗一陣,個阿sir入嚟我個倉,帶走埋我。
佢好嚴肅咁問我:「尋晚發生咩事?」
我知道佢一定知道咗發生咩事,佢問完臭口光之後就搵我。
咁多人唔搵,係都要搵我先?
加上佢睇返閉路電視紀錄,一定知咩事啦!」
我如實同阿sir講:「係我打佢架!」
Sir說:「點解要打佢?」
我:「佢尋晚睇完我之前女朋友同佢新男朋友張相,就串我比女飛。我叫佢唔好再講,佢唔停口繼續講,我嬲嬲地咪拉佢落床打攞!」
阿sir聽完就不斷對我訓話,之後帶咗我同臭口光過去教導所嘅值日官辦公室,請求上級的指示處理呢件事。
值日官望一望好臭口光塊面嘅傷勢,然後再叫佢除衫睇吓佢個身嘅瘀痕。一路細細聲:「哇⋯⋯哇⋯⋯哇⋯⋯」
值日官了解完件事就同我講:「我都知係條友口臭先,雖然係抵打,但你打到條友豬頭喇叭嘴咁,去探訪佢屋企人見到點算?點交代?你打到佢咁,我哋一定要報警處理㗎啦!」
之後值日官就報警同埋叫白車黎送臭口光出去出面嘅醫院驗傷。
半個鐘後,警察到咗。
值日官帶警察入咗間房幫我落口供。
落完口供,值日官話要單獨囚禁我21日。
我都冇得話唔好㗎啦!唯有接受。
單獨囚禁就好似困「臭格」咁,困係一個倉度,四面都係牆,一張床,再加個踎廁。
不過單獨囚禁同困臭格有少少分別,有好有唔好。
好就係每日都會有一個鐘時間係一個好細嘅空地曬下太陽,散步;臭格就成日困係裏面冇得出嚟,出面有冇落雨都唔知。
唔好就係單獨囚禁一定要夜晚八點開始先俾訓覺,其他時間就唔可以訓;臭格就二十四小時任你訓,瞓到你驚,瞓到你慌。
呢21日嘅囚禁,對我來講都唔算係一件壞事,反而俾咗時間我靜下,諗下野。
呢21日我個腦都圍繞着Helen ,不斷回憶我之前同佢嘅所有事。
諗起開心嘅時,我會自己一個成個傻仔咁傻笑。
諗起傷心嘅事,我會不自覺流眼淚。
我發覺冇咗Helen ,從前好難先會喊嘅我,依家即使好少嘅傷心事,都會觸動我嘅神經,有時甚至係莫名其妙咁,好想喊。
我成個腦都係Helen ,Helen , Helen , Helen , Helen同埋都係Helen。
Helen ,你係我心裏面消失一陣好冇?
我日日咁樣諗住你,真係好煎熬,好辛苦!
我阿媽如常咁一個星期探我一次,但我冇同佢講過打架呢件事。
我唔想阿媽擔心我同Helen嘅事,又要擔心我喺度打架嘅事。
因為我知道阿媽一知道,佢一定會好緊張發生咩事,擔心我擔心到佢自己都瞓唔着。
苦,自己一個受咪算囉!
我唔想屋企人要陪我一齊受。
三個月之後,我同臭口光單嘢判決左,法官大人同樣都係判我教導所受訓。
教導所受訓期間再次判入教導所,咁我嘅刑期就會再加3個月。
我有冇後悔打臭口光,打到要加監?
我冇後悔過,即使再次發生同樣嘅事,我都會用返同樣嘅做法。
攞我自己嘅野黎講笑唔緊要,但一關係到Helen ,我一定唔會放過你!
打架加監件事告一段落,我好似之前咁,正常過返教導所嘅生活。
唔經唔覺都入咗去三個幾月,我對Helen嘅思念都冇因為時間而沖淡,反而越嚟越掛住佢。
有一次食完飯之後嘅自由時間,電視播左首方力申同鄧麗欣合唱嘅《十分愛》MV。
分手後1分鐘 便有後悔聲音
能傷我最深的人 應得我心
應該漠不關心 然而還着緊
當攬緊他人 想起跟你熱吻
聽完第一段,我就比首歌吸引住,引起我嘅共鳴。
我傷心,唔係因為其他人令到我咁,而係我自己做錯一個決定,能夠傷得我最深嘅人,就係我自己。
我同Helen分咗手,應該各不相干,漠不關心,但我仲係好着緊佢嘅事。
我當初分手,然後同左Winnie一齊,我拖住Winnie隻手,但心裏面係諗緊Helen。
首歌嘅最後:
愛滿分竟是換來痛亦滿分 可否錯一次以後一直愛
我望住部電視,又留下我嘅眼淚。
自從知悉Helen有男朋友之後,我就開始變得眼淺。
之前嘅我聽歌聽到喊,根本係冇可能發生嘅事。
人經歷某啲令你傷心欲絕嘅事,總會有少少嘅變化。
變化可以係好,亦可以係壞。
好嘅話,可能你會從中明白珍惜嘅重要,唔再令自己後悔。
唔好嘅話,可能會令你性格變得孤僻,唔願意同其他人講心事,又可能令你生活變得頹廢。
Helen嘅離開,令我明白到珍惜嘅重要,同埋讓我認識悲傷嘅心情。
不過我絕對唔會俾自己變到成個廢柴咁。
我今次跌低咗,我就唔可以再俾自己跌得再低,我要出去用盡方法搵好多好多嘅錢;我要用我一切嘅方法追返Helen;我要用錢追返我失去嘅嘢。
冇人會笑你跌低咗,只會有人笑你爬唔翻起身。
我唔可以俾人睇唔起我,人哋越睇我吾起,我就越要彈得起!
 Helen嘅離開,雖然令我生不如死,但傷心過後嘅我,Helen就成為我一切的動力。
因為我所做嘅一切,都係為咗Helen。
失去Helen嘅我要再次得到Helen ,就要更加努力,為咗追番Helen ,我更加唔可以放棄自己!
兩年零五個月,即係29個月之後,我終於喺教導所受訓完畢。
我比我同期入教導所嘅人,出冊嘅時間足足遲左一年有多。
點解要咁遲先出冊?
自從我打臭口光單嘢之後,啲阿Sir就標籤左我係搞事分子。
只要我做錯少少事,啲阿Sir就比張警告信我。
而一張警告信就會加監兩個星期。
我呢29個月總共收咗10封警告信,困左我兩次單獨囚禁,我諗我都算經典㗎啦!
當啲阿Sir比第八封警告信我嘅時候我真係收到嬲嬲地。
我本身都差唔多出冊㗎啦!有一次阿Sir入倉檢查氈席,個阿Sir無啦啦話我摺得唔好,話要比警告信我。
我望一望自己份氈,再望一望其他人份氈,其實我嗰份都唔算差,某幾份仲衰過我。
不過我冇同個阿Sir頂撞,我即刻好有禮貌咁死狗道歉:「sorry sir !唔會再有下次,比次機會。」
我係呢段時間,我嘅依EQ之前好咗好多,唔會因為少少野就發曬脾氣。
忍一時風平浪靜 退一步海闊天空
受靶時時刻刻都要記住呢句野,如果唔係,受靶這生涯就會雪上加霜,更加難受。
我本身都修心養性,緊記呢句金石良言⋯⋯但我最終都係破左戒。
個阿Sir見我死狗,唔單止冇俾機會我,仲變本加厲,得寸進尺,挑戰我EQ嘅底線。
 阿Sir :「你摺到咁,仲要我比「走盞」你?你係咪未瞓醒,要開返份氈瞓下啊?機會唔係你要就有架!係我俾你先有架!收警告信啦!」
我:「阿Sir ,唔會再有下次㗎啦!大人有大量啊。」
佢繼續佢嘅難聽說話:「你之前衰咗又係話唔會有下次,今次你又係話唔會有下次,下次又係話唔會有下次,下次下次,我仲俾機會你做咩啊?」
都唔知係咪個阿Sir個老婆之前曾經偷食,一樣係同佢講唔會有下次;之後又發生左同樣事情,又係話唔會有下次。
搞到個阿Sir一聽到「唔會有下次」咁敏感。
我:「我第一次衰氈咋喎!走盞啊阿Sir!我就快出冊,放條生路行下。」
阿Sir:「就快出冊都仲未識摺氈呀?即係你喺度受訓仲未夠啦!啱啦!喺度留多兩個星期,我搵人慢慢教你啦!」
我最後一次好聲好氣:「阿Sir ,真係冇走盞,冇得傾啊?」
佢語氣依然係鳩撚屎屎:「係呀!收警告信啦!」
我真係忍佢唔到,咁即係擺明搞我,阻我返屋企姐!
我自問我嘅紀錄表現中規中矩,之前啲阿Sir俾咗七張警告信我,我都吞聲之前啲阿Sir俾咗七章警告信我,我都吞聲忍氣。
而家我仲有兩個星期就返屋企,你都要搞我,我嘅怒火真係淋水都淋吾熄啊!
我嘅態度360度轉變同個阿Sir講:「收警告信?收皮啦你!扮嘢好啦!唔好扮撚晒野呀嘛!着撚着套制服就串柒柒,你扮乜撚嘢唧?除咗套制服,喺條街度你咪又係一個傻閪!我俾面你係呀sir ,好聲好氣同你𢱑走盞,你就三分顏色上大紅,見好就收啦!係都要我大大聲咁多人面前落你面,你係都要咁撚犯賤嘅,你尋晚腎虧痾唔撚到屎,谷撚住啖氣,定係你食屎食撚懵左你呀?」
個阿Sir嬲到講唔到一句完整句子:「你⋯⋯你⋯⋯」
我繼續唔理後果,窒佢:「你⋯⋯你⋯⋯你⋯⋯你⋯⋯你老母咩?你口窒俐窒,你你你,你傻㗎?
個阿Sir嬲到㩒緊急內部警鐘總制要求支援。
緊急內部警鐘一響起,十幾20個阿Sir沖過嚟支援。
我心諗使唔使咁大陣仗啊?我有冇咁大威脅,咁大影響力啊?
成班阿Sir押我走,帶左我去值日官辦公室。
一到值日官辦公室,成班阿Sir圍住我對我訓話同埋教導我。
教導完我之後,值日官就話我唔使收警告信啦!因為直接鎖我28日,即係我單獨囚禁28日,再加我兩個月監。
今次嘅事件真係令我獲益良多,原來懲教所嘅阿Sir真係唔得罪得。
寧得罪小人,莫得罪阿Sir⋯⋯得罪咗真係好危險。
就係咁,我比值日官鎖我第二次。
本身仲有兩個星期就可以飲到阿媽煲嘅靚湯,因為呢件事,我由原本嘅兩個星期,變咗兩個月。
所以監房幾時都要記住「忍一時風平浪靜 退一步海闊天空」。
冇記性就⋯⋯好⋯⋯危⋯⋯險!
28日之後
又過返正常生活,但比我衝擊嗰位阿Sir依然懷恨在心。
之後嘅日子,佢總共俾咗三封警告信我。
二三封警告信嘅原因都一樣,都係話我份氈唔整齊。
呢三次,我都冇再頂撞佢,亦都冇求佢俾機會。
經過上次件事,我真係怕左佢,有啲咩事,硬食算數。
辛辛苦苦終於捱多三個半月,計埋之前嗰啲一次,總共捱咗29個月。
2014年10月24日,我終於釋放啦!
已有 0 人追稿