訓導主任仲要問我:「真係冇講大話,老師真係冇俾個機會你地就要你哋落嚟?」
我俾佢問到滾滾地,講左咁多次都仲要問,雖然我講出嚟嘅嘢對比事實嘅全部少咗啲啲,但我真係冇講大話,冇呃佢呀嘛!
我只不過講少咗我哋攞個枕頭出嚟瞓覺啫!
我粗聲粗氣咁同訓導講:「呃你把撚咩!冇咩冇啦!你問多100次我哋都係咁答㗎啦!」
明明係我哋做錯事,但我都可以咁理直氣壯咁同訓導講野,我都算犀利得啦!
訓導見我開始發脾氣,佢同我講:「你坐喺度冷靜下等等我先,我去了解下件事先。」
訓導走咗之後,我哋又從我哋嘅書包攞個枕頭出嚟再瞓過。
我哋真係好似落訓導處玩咁,見訓導如嬉戲。
不過鬼叫個老師九唔搭八,收咗Helen送俾我嘅愛心枕頭仔咩!
10分鐘之後,訓導攞住我個枕頭仔返嚟。


佢一返到嚟訓導處見我哋每人一個枕頭伏左係張床度,佢話:「你哋真係造反喎!你哋當呢度係邊度啊?避寒中心呀?」
我得得戚戚咁講:「係就係避寒中心,不過係扯鼻鼾果隻鼻鼾中心。」
訓導塊面黑到成個包青天咁,不過佢額頭冇包青天嘅月亮圖案。
訓導嘅額頭亦都唔配有包青天嘅月亮,反而有一個字更加襯佢。
就係一個「柒」字。
如果有個「柒」字係佢個頭度,簡直係絕配。
訓導叫咗我入去訓導處裏面間細房單獨見面。
一入到去,訓導叫我坐低之後,佢將我個枕頭放喺張枱度,然後同我講:「家洛,你之前已經試過攞呢個枕頭出嚟上堂瞓覺㗎啦喎!老師俾咗次機會你,你就得寸進尺,變本加厲,今次仲攞埋個大枕頭出嚟瞓覺。」
我:「你俾返個細枕頭我,我咪唔攞個大枕頭返學囉!」
訓導:「呢度係學校呀!上堂要聽書,唔係瞓覺。今次我記你一個缺點,你再係咁我就記你小過。」


我:「咁個細枕頭俾得返我未啊?」
訓導:「唔得,個枕頭我會俾你班主任保管,直到學期尾嘅家長日,你班主任就會交俾你家長。」
我:「你都九唔搭八嘅,你一日唔俾番我,我就日日同你玩串班房,你即管既我缺點啊,你到你手軟我都仲玩緊啊!」
訓導見我唔受硬,之後佢就改用語重心長咁同我講道理。
但我仍然堅持初衷,唔俾返我,乜都冇得傾!
訓導講到喉嚨乾口渴,佢又叫我坐喺度等佢一陣,之後佢就行出去飲水。
佢行出去飲水嘅時候,個枕頭就放喺房裏面張枱度。
咁大個機會俾我攞返個枕頭仔,你覺得我會放過咩?好多人都話,機會係要自己爭取;機會一𣊬即逝,唔珍惜就冇。係呀所以我即刻攞返個枕頭收落自己個書包度,然後孭返住個書包遠走高飛,離開學校呢個鬼地方。
一踏出間房門,我見唔到訓導,唔知佢行咗去邊度飲水,我見到嘅係,同我一齊共同進退嘅同學伏係佢哋自己個枕頭度訓教。
我快手拍醒佢哋,然後一齊逃離校園。


為咗一個枕頭,你可以去到幾盡?
第二日我冇再攞枕頭返學,我將枕頭仔放返係屋企。
返到學校,訓導主任已經係學校門口迎接我。
我一早已經預料到訓導會咁做只係唔知佢想點樣懲罰我。
不過佢點樣罰我都無所謂,我根本就唔想讀書,返學只不過係應酬屋企人。
即使佢要記我幾多個缺點,對我根本冇傷害力。
一返到學校,訓導就捉我去訓導處。
一到訓導處,我就見到尋日有份參與是次行動嘅戰友。
我問訓導:「捉晒我哋嚟想點?」
訓導:「尋日我冇叫你地走,你哋做咩走?邊個俾你地走架?」
我態度極之惡劣咁講:「我哋有手有腳鍾意走咪走囉!你唔俾我哋走,攞條鐵鏈鎖住我地呀嘛!」
訓導:「我都未話你啊!你做咩先至攞走個枕頭?我有話過批准你攞返咩?」
聽到佢咁講,我有一刻真係以為個枕頭仔唔係我嘅野,而係屬於學校嘅嘢嚟。
我:「哇!你講到個枕頭好似你咁嘅,我就真係未話你呀!你學校D老師做咩擅自攞走我個枕頭?我有話批准你哋攞走咩?」
訓導嚴厲咁講:「因為你上堂嗰陣攞個枕頭出嚟瞓覺,所以我哋收咗佢。」


我:「攞出黎瞓覺你就可以收咗佢?咩道理呀?平時我伏喺張枱度瞓覺,咁你唔收埋張枱?」
訓導:「因為你攞個枕頭出嚟瞓覺破壞班上秩序,影響其他同學上堂。
我強詞奪理:「你個樣夠樣衰,影響市容,破壞我返學嘅心情啦!咁你唔帶面具遮返住你個衰樣出街?
我講完之後自己都忍唔住笑,隔離嘅同學更加唔使講啦!
訓導俾我窒到冇聲出,包青天嘅黑面又再出現係佢塊面度,呈現係我眼前。
訓導:「你哋做錯事都仲係咁嘅態度,今次我記你地每人一個小過,在校內停課一個星期。」
我:「校內點停課呀?即係你要我返學但又唔俾我上堂?」
訓導:「你哋今日起計七日,一返到學校就去圖書館停課。」
我:「早講啦!我帶埋個枕頭返嚟瞓覺吖嘛!」
訓導:「係圖書館停課唔係叫你地瞓覺!你哋呢七人喺圖書館抄書,好好反省下!」
抄書?反省?
唔撚好玩啦!五寶!
我哋喺圖書館停課,唔係瞓覺,就係瞓覺。
停課嘅第二日開始,我哋索性攞個枕頭返學瞓覺。七日之後停完課,我哋變返之前咁返課室上堂。
不過我返到課室上堂,我照樣攞個枕頭仔出嚟瞓覺。


老師們亦都冇再捉我瞓覺或者收我個枕頭,我諗班老師應該已經放棄咗我啦!
往後我嘅讀書生涯,都有Helen送俾我嘅枕頭仔陪伴。
有一次, Helen從我銀包攞咗張100蚊出嚟。
張100蚊紙比其他100蚊都舊得多,連張紙嘅圖案都唔同,一睇就知係舊鈔。
我同Helen都覺得張$100遲早會升值,有保留嘅價值。
我同Helen都話呢一張$100要留住, Helen怕我用左呢張$100 ,所以佢就將$100接成一個心,然後放喺我銀包裏面。
係Helen將張$100摺成心果刻,張100蚊已經係我心入邊瞬間升值。
我冇哂錢嘅時候,我都唔會拆開張$100黎用,因為一拆開,張$100只不過係$100 ,唔會再係我心目中嘅價值—無價。

Helen送俾我嘅野,全部都唔可以用金錢來衡量,全部對我來講都係無價。
呢啲回憶,即使有再多嘅錢都冇可能買到。
我清潔完,抹走晒呢個盛載着我同Helen回憶嘅紙箱嘅塵,我就將個紙箱放返入衣櫃。
無聊之際,我開着屋企久違嘅電腦,我出返嚟一個幾星期,第一次開着屋企部電腦用。
我上網離唔開都係上Facebook,所以平時係用電話上網。
用電腦上Facebook ,睇嘅嘢都多啲,範圍都大啲。


我禁入自己嘅Facebook,Facebook嘅左排全部一列都係顯示關於自己嘅嘢。
有我嘅基本個人資料、朋友、相片、影片等。
我Facebook嘅相簿入邊有幾百張相,唔使禁入相簿,我Facebook左排果一列都已經顯示左十幾張相出嚟。每一張相都差唔多有Helen嘅存在。
科技嘅進步,進步得Helen走咗,但好似冇離開過咁。
我Facebook裏面只得一段影片,段影片係我花足心思係Helen同我渡過第二年生日時,送俾佢嘅生日禮物。
Helen生日前,成日有意無意咁睇其他情侶製作記錄佢哋拍拖嘅點滴嘅影片,做咩搞然後再有意無意咁比說話我聽:「如果有人送段咁嘅片俾我就好啦!真係好浪漫呀!」
我完全明白Helen講呢句說話背後嘅意思,但我對製作短片呢科野,完全係白癡。
不過Helen咁想要,我唯有硬着頭皮上網搵教學,然後下載咗一個製作短片嘅程式。
我研究左個程式成日先開始略略知道點運作。
第二日,我瞞住Helen秘密開工。
我將我同Helen嘅合照,逐張逐張擺落段片段度。
每張相我都會寫一啲我想對Helen講嘅嘢,每張相都會停5秒左右俾Helen睇吓我寫嘅嘢。
段片嘅背景音樂就係鍾一憲同麥貝夷合唱嘅勾手指尾。
成段片只係得30秒,但整呢條片就差唔多用左六粒鐘。
Helen生日當日,佢一放學就上嚟我屋企搵我。


佢差唔多到我屋企嘅時候,我就送第一份生日禮物俾佢,一個肚腩咁大嘅笑哈哈公仔。
呢份禮物雖然好普通,但Helen收到照樣係好開心。
送完個笑哈哈公仔之後,我再叫佢上Facebook。
Helen問我做咩無啦啦要佢上Facebook。我答佢,上咗就知㗎啦!
Helen一上Facebook就見到我送俾佢嘅第二份生日禮物。
我望住Helen嘅表情有疑惑瞬間轉為驚喜,再感動。
見到女朋友有咁嘅反應,我相信大家嘅諗法都會同我一樣—再辛苦都值得。
我問Helen :「鍾唔鍾意呢份生日禮物啊?」
Helen:「好鍾意呀!你幾時整架?」
我:「呢幾日開始研究,尋日先整架咋!原來整段片真係唔係咁簡單,呢段片整左我六粒鐘。我見你成日同我講呢啲片好浪漫,我都知你想要㗎啦!」
Helen:「多謝你呀!但點解段片剩係得30秒嘅?點解唔整晒成首歌嘅?」
我:「30秒都用咗我六粒鐘啦!成首歌差唔多4分鐘,整晒佢咪差唔多要用我48粒鐘?不過你想要嘅話都冇辦法嘅...」
Helen:「唔使啦!咁已經夠啦!我好鍾意呀!」
今時今日, Helen同我已經唔係男女朋友嘅關係,就連Facebook亦都唔係好友關係。
唔知Helen仲記唔記得,曾經有個男仔喺Facebook送個一段靚到浪漫感動嘅短片呢?


睇完呢段片,我禁入HelenFacebook睇... Helen張大頭照隔離依然顯示住「取消交友邀請」,即係Helen依然唔接受我嘅交友邀請。
諗下諗下, Helen同我一齊嘅時候,成日用呢部電腦上Facebook ,而Helen亦都保存左個密碼係呢部電腦。
我諗都唔諗就即刻登出我Facebook ,然後再喺輸入電郵地址果一欄輸入「h」呢個英文字母。
不消半秒,我部電腦即刻彈出HelenFacebook嘅電郵地址,我輸入完Helen嘅電郵地址之後,密碼嗰一欄就自動顯示左好多個黑色點。
啲黑色點就係Helen Facebook嘅密碼。
我已經唔記得咗啲黑色點係代表啲咩英文字母又或者啲咩數目字,但我部電腦依然咁有記性。
Helen千算萬算,應該都算唔到佢係我部電腦度遺下左佢Facebook嘅密碼。
雖然偷睇人哋嘅Facebook好仆街,但如果有件咁嘅事發生係你地身上,我相信你地都會做一個仆街。
我做定心理準備將會見到Helen同其他男仔嘅照片,同埋曖昧嘅訊息。
我懷着忐忑嘅心情按下登入。
登入成功。
我禁入相簿睇Helen嘅相,我見到Helen有時同成班朋友行街,有時做運動,有時夜晚拖住佢嘅愛犬喺佢屋企附近散步。
唔知揸機幫佢影相嘅係佢朋友,定係佢男朋友呢?
一諗起佢而家嘅男朋友,我就諗究竟Helen之前嘅日子係唔係比啲賤男傷得太深,深到令佢對男人失去信心,搞到鍾意啲擁有男人樣貌,女人器官嘅...男人?女人?
如果係嘅話,我諗我應該要負最大嘅責任。
因為對Helen來講,我就係最賤嗰個。
睇完Helen嘅相之後,我轉去第二個介面,睇Helen同其他人嘅inbox。
一㩒入去,我就見到好多狗公同Helen講同一句野—「hi」。
而我,亦都係呢班狗公嘅其中一位,因為我一樣有send咗個hi俾Helen。
Helen大部份都唔理,我亦都唔例外。
我㩒入Helen同佢現任男朋友嘅inbox。
裏面嘅內容真肉麻, BB前BB後,睇到我妒忌到不得了。
點解男主角唔係我?
我睇其他男仔同Helen嘅inbox紀錄,好多都係諗辦法搵Helen呃水吹,有啲就約Helen一齊跑步。
我回想起當年我做Helen男朋友嘅不濟,容易發脾氣,容易呷醋, Helen身邊一有男性朋友出現就立即戒備,甚至要求佢唔可以再同啲男仔聯絡。
回想返,真係覺得好慚愧。
係我令Helen同我一齊嘅時候,默默承受一段不太愉快嘅經歷。
如果Helen返嚟我身邊嘅話,我一定要變得更好。
我要以更成熟嘅態度,更細心嘅照料及更體諒嘅處事方式,去做一個更稱職嘅男朋友,唔再辜負Helen對我嘅愛。
除咗要為佢帶來快樂,仲要有陪佢走過憂傷嘅耐心。
不過Helen會返嚟我身邊嗎?
我一直睇Helen同其他男仔嘅inbox,由近期睇到好耐以前。
我睇睇下,我見到Jerry有同Helen inbox。
Jerry同Helen雖然同一間學校,但佢哋應該唔係好熟。
點解Jerry會同Helen inbox?
我一㩒入去就由最頂開始睇,我一路睇,一路漸漸覺得唔對路。
我越睇越㡳,越睇越嬲。
Jerry同Helen嘅inbox內容,大致係叫Helen嘗試同佢個朋友拍拖。
其中一段, Jerry問Helen係咪未放低我。
Helen答佢,係。
之後Jerry就開始開解Helen ,叫佢忘記我,然後再講佢個friend有幾好,講到佢個friend好似絕世好男咁。
佢哋最後嘅inbox對話係2012年嘅七月,即係我入咗去受靶嘅第三個月,我媽同我講Helen有新男朋友嗰個月份。
睇到佢哋嘅對話,我又傷心又嬲。
我傷心係因為當初Helen比我傷得好深,但佢仲愛我,仲因為我放棄其他男仔追求。
我真係好後悔,如果當初我坦白同Helen講發生咩事,Helen分分鐘真係會等到我出嚟。
如果當初我唔係對Helen嘅唔信任,唔係他自己受傷害, Helen分分鐘唔使比我傷害得咁痛心,最後亦都可能係大團圓結局。
但依家先知錯,有用咩?
而我嬲係因為Jerry嘅出賣同背叛。
雖然睇返紀錄, Helen最後都冇同Jerry個朋友一齊,反而同左另一個學校嘅同學一齊。
但Jerry始終係有唆擺過Helen忘記我,佢同我食最後一餐嘅時候仲口口聲聲叫我放心,話會幫我睇住Helen,唔俾其他男仔埋佢身。
但事實係,佢冇幫我睇住之餘,仲企圖為佢個朋友同Helen牽上紅線。
Helen分分鐘係有想等我嘅諗法,就係因為Jerry呢啲人搞到Helen下決心忘記我,然後先重新開始一段戀愛。
枉我咁錫Jerry,佢有啲咩事我幫到佢盡,佢竟然食碗麵返碗底,係我唔喺度嘅時候出賣我。
反轉豬肚原來真係屎嚟。
唔識我嘅人叫Helen忘記我嘅話,我唔怪佢。
但Jerry唔單止識我,佢仲要係跟我,佢仲要答應過我會睇住Helen。
Jerry呢個仆街仔,我對住佢仲有理由放過佢咩?
如果呢一刻, Jerry係我面前,我諗到時我唔係打佢咁簡單。
睇完Jerry同Helen嘅對話,我即刻打電話比班「兄弟」,問佢哋有冇人知道Jerry幾時返香港。
但答案係冇人知道。
班「兄弟」係我哋WhatsApp嘅群組問我,做咩事搵得Jerry咁急。
我影咗段Jerry同Helen嘅對話出嚟然後send出去比班「兄弟」睇。
我話:「睇完就明㗎啦!」
兄弟們睇完之後,個個都知道咩事。
佢哋個個都清楚我性格,知道我最討厭兄弟之間嘅出賣,即使再親嘅「兄弟」,我都唔會心軟。
Jerry ,你最好一世都唔好俾我見到你,見到你真係會痴線㗎 !
個個都知道我最愛嘅就係Helen ,你仲夠膽叫Helen同你個朋友一齊,你係當我傻仔定挑戰我底線啊?
好兄弟!係你教識我乜嘢係「人在人情在」,係你身上我深深體會到。
出賣兄弟,有朝一日我相信你會深深體會到會有咩結果。


我出冊嗰日,我大佬叫我等兩個星期,之後就開始比野我做。
今日,就係大佬所講嘅兩個星期後,做嘢嘅日子。
大佬前幾日已經打咗電話俾我同我講大概有啲咩要做,再確定我係咪想做。
我當然答係啦!
呢份工作,有我未受靶前已經想做,依家終於有機會,我點會放過呀?
今日,我一早就出門口,依照大佬所下嘅指示去到佢所講嘅地點。
去到目的地,嗰度有個垃圾桶,二上頭亦都準備咗一個紅白藍嘅大膠袋放左係垃圾桶隔離俾我。
我一攞起,重到不得了,要我用雙手先拎得起。
大佬叫我一攞起就即刻上隔離已經準備好載我嘅私家車。
大約15分鐘左右,架車載咗我到另一個地方嘅垃圾桶,大佬叫我將袋野放係垃圾桶隔離之後就走人。
我放低左之後,我就打電話俾大佬:「大佬,我放低左啦!但你就叫我走人,係走去邊呀?」
大佬笑住答我:「走返屋企囉!你完成任務,搞掂曬㗎啦!收工啦!」
我愕言:「下?淨係咁咋?」
大佬:「係呀!搞掂㗎啦!今晚出嚟飲酒,我再出糧畀你啦!」
我仲有少少反應唔切:「哦!好!今晚見面再傾啦!」
我冇預料到一個朝頭早,唔使一粒鐘就可以收工,撈偏真係唔同啲。
到咗夜晚,我同成班兄弟去CEO唱歌飲酒,而我就有一個更重要嘅任務,就係搵大佬出嚟。
去到CEO見到我大佬,大佬即刻帶咗我入去隔離間無人嘅房。
我今日做嘢之前,大佬冇同我講過會有幾多報酬,直到佢依家從佢個袋拎咗一大疊$1000紙出嚟,我呆左。
一切來得太突然,我真係有少少招架唔住。
今日淨係拎野上車再落車擺低啲嘢,成個過程由出門口開始計,一個鐘嘅時間都冇,咁就15萬?
我以為頂到盡都係得幾千蚊,估唔到咁誇張。
咁就15萬,完全不費我吹灰之力。
經過今日,我仲有咩理由唔撈偏?
有啲人打成年工都未必有十五萬,我用一個鐘嘅時間都唔使就搵咗人哋成年嘅錢。
撈偏搵錢,即方便又快捷,唔怪得班大佬有源源不絕嘅財源。
我要成為佢哋嘅下一代,我要有滔滔不絕嘅金錢,我要全世界嘅人對我刮目相看,我要Helen返嚟。
呢段日子,我晚晚同成班兄弟成班大佬出去飲酒,夜夜笙歌。
慢慢,我組織左自己嘅人際關係網絡,有越來越多大佬認識囉,甚至係賞識我。
我嘅工作量又越來越多,慢慢亦擁有自己嘅生意。
同我同期出道兄弟,都冇乜幾個比我之上。
人有錢左,講嘅嘢都唔同啲,口氣都大啲。
我受靶之前,仲係一個只顧打打殺殺嘅古惑仔嘅時候,曾經有個叫子健嘅「同輩兄弟」經常對我不瞅不睬。
但因為我同佢屬於同一個社團,唔係有啲咩踩上心口嘅事,我都會忍到就忍,免傷和氣。
有次,我同班兄弟飲酒,咁岩子健又係呢個酒局。
子健一見到依家身光頸靚嘅我,佢即刻熱情咁同我講:「喂!家洛哥,好耐冇見!你入咗去之後我好掛住你啊!」
之前嘅佢,只會係叫我家洛,從來唔會有個「哥」字係我個稱呼後邊。
不過大前提係,我同佢根本唔熟,我哋就連最基本嘅電話號碼都冇交換,我受靶佢又點會掛住我呢?
我冇理佢,淨係同佢講左兩隻字「係咩?」,之後我就繼續同其他人猜枚飲酒。
個子健不斷搵話題同我吹水,佢出名係擦鞋仔黎,今次見識到,果然名不虛傳。
佢不斷講啲低能野,一有位入佢,我就猛咁窒佢。
例如佢同啲女仔吹水,吹到自己一個打10個,天下無敵咁,我就話我細個同佢一齊去嘈交,佢冇一次唔係企喺最後,打架嘅時候冇一次唔係最先跑嗰個。
佢成晚比我單單打打,佢扮醉同我講啲九唔搭八野。
佢用醉酒佬嘅語氣同我講:「家洛哥,我由細到大當你阿哥咁睇,你撐唔撐我先?」
我一睇就知佢扮嘢啦!
成晚佢淨係飲少少酒,依家就喺度扮酒後吐真言擦我鞋。
不過最好笑係,點睇佢都大我幾年,我哋仲要由細到大都唔熟,唔講嘢咁滯。
而家我有錢就話由細到大都當我係阿哥,佢都真係我識咁多個擦鞋仔當中,最厚顏無恥嗰個。
我同佢講:「你想做我契弟,你都未夠班啦!」
子健繼續佢嘅酒態盡現:「家洛哥,我得架!你係咪睇我唔起先?」
我同佢講:「子健,我唔係睇你唔起呀!我係睇你唔到啊!你收下皮啦!」
佢扮到聽唔到,成個人訓落梳化度攤屍扮醉。
但我好肯定,佢一定聽到,佢只不過係唔想再係咁多人面前繼續肉酸落去,佢又唔夠膽開口回敬我,所以唯有攤屍,扮到醉酒乜都唔知。
有錢,果然唔同啲。
你好打,人哋會驚你,見到你就掉頭走。
但你有錢,人哋唔單止驚你,仲會對你恭恭敬敬。
所以古惑仔,有錢比好打,更為重要。
我有咗自己嘅生意之後,我啲時間越嚟越空閑,每日基本上我想去邊就去邊,只需要攞住部電話不斷打出打入。
我每晚我都會同成班兄弟去CEO,我除咗唱歌飲酒之餘,幫我做嘢嘅夥記都會上嚟同我對數,然後我再出糧畀佢。
我差唔多每日去CEO之前,我都會做一樣人哋眼中睇唔通,猜唔透嘅事。
我每日大約六點半,我都會攞住支花到屋企樓下嘅電車站搭叮叮到北角。
點解要咁做?
因為Helen曾經同我講過,如果我有一日做錯事,佢唔再理我,只要我哋各自搭叮叮,各自嘅方向都唔同,一個去西環方向,一個去筲箕灣方向,我哋兩架丁丁都可以相遇並排嘅話,即使我做錯咩事都好,佢都會原諒我。
雖然呢件事會發生嘅機率係等同於海底撈針,但只要有一絲嘅機會可以令到Helen原諒我,即使我做錯咩事都好,佢都會原諒我。
雖然呢件事會發生嘅機率係等同於海底撈針,但只要有一絲嘅機會可以令到Helen原諒我,我唔會放過。
即使真係要我海底撈針,甚至係撈條毛,我都會去嘗試。
當然,戲劇中嘅情節冇發生過我身上,天公冇庇佑我。
不過失敗一次又一次,我都冇放棄,每次我都會以最佳嘅狀態,懷着希望嘅心情上車,希望奇蹟會降臨係我身上。
每次搭叮叮去北角,我都會喺Helen溜狗嘅地方兜一圈,再周圍行吓。
我真係好想見返Helen,哪怕係只有一眼。
喺北角遊蕩半個鐘左右,我就會搭返回程叮叮返銅鑼灣,繼續等奇蹟嘅發生。
Helen ,我真係無時無刻都諗起你,掛住你。
我喺條街周圍行,見到嗰間唔起眼嘅餐廳,諗起曾經同你兩個人溫馨撐枱腳嘅夜晚;我企起車廂,聽到隔離情侶打情罵俏,諗起曾經同你甜蜜嘅你追我逐;返到屋企訓係張床,合埋眼睛輾轉反側,諗起曾經一擘大眼就可以見到你嘅時光。
我成日諗,點樣可以唔再諗起你,但偏偏就不斷諗起你。
你教我,我點可以唔再諗起你,唔再掛住你?
已有 0 人追稿