在補習班上遇到一生最愛（真人真事改篇）: 第六章

分別的一刻始終都要來臨，一大早我們便到了機場。

「今日唔好走堂啦，送完機好返去學校啦。」姐姐撫摸著我的頭髮。

「嗯嗯……」我只能點點頭。

「咁……半年後見啦。」姐姐用力地抱了我，我能感受到她的淚水在我的臉龐劃過。

數秒後，她放開了我，轉身離去。





名為「離別」的淚水在眼眶中打轉著，卻始終沒有落下。

我望著天花板，試圖不讓淚水掉下來。

送個機而已，又不是生離死別。

待淚水收回後，我便穿著校服回到學校。

但一踏進班房，就造成了轟動。





「哇，阿輝佢返咗嚟呀！」程希穎的眼神就好像看到頻臨絕種動物一樣，其他同學亦然。

「使唔使呀……走咗一個禮拜堂啫……」我無奈地看著班上的同學。

「你已經俾幾個老師落咗通緝令，只要你一返學你就要補返四十七份功課。」程希穎幸災樂禍道。

「四……四十七份？」傻的嗎？

「你走咗五日堂喎~」程希穎一臉欠打。





「我開始有啲後悔走咗咁多日堂……」我無奈地說。

果不其然，每個老師看到我後，除了問我翹課的原因，還有要我補交發下的功課。

生無可戀了……

幸好程希穎早已把功課答案都複製一次，否則我肯定會死無全屍。

回到補習班後，我看到星瑤悶悶不樂地坐在位子上。

「做乜咁頹呀？」我輕拍她肩膀問。

「你呢個禮拜去咗邊呀？日日都唔見人……」星瑤伏在桌上敲打著桌面。

「我家姐要去挪威，咁咪陪佢玩足一個禮拜囉~做咩呀？掛住我呀？」我輕佻地說。





「先唔得閒掛住你呀！」星瑤別過頭，不再理會我。

但很快，她又把頭轉回來，並遞了一些東西給我。

我定睛一看，才發現是巧克力。

「請你食㗎！」星瑤笑著看著我。

不想巧克力融化的我，連忙把包裝拆掉並吃下。

頓時，一陣苦澀的味道瞬間充滿了我的口腔。

「好……苦……呀……」我口齒不清地說。





「唔好浪費食物呀，食咗佢啦~」星瑤奸笑著。

「你陰我……」我吞下後便不停灌水。

「就當係你失蹤一個禮拜嘅懲罰啦！」星瑤從口袋中再拿出另一粒巧克力，並隨手撕開包裝吃下。

但她的臉上並無半點難色，反而享受地咀嚼著。

「唔苦咩？」我問。

星瑤搖頭。

我把整瓶水喝下後，仍暗暗感受到苦澀的味道。

整整一個星期沒有上補習班，有很多內容都開始跟不上。





幸得星瑤會跟我講解課堂的內容，使我成績能追貼一點。

「星期六要考試呀……」休息時間時，星瑤向我抱怨。

「考咩呀？」我問。

「古箏演奏級。」星瑤輕描淡寫地說。

「演奏級係咩玩法……」我仿佛看到了神。

「由細練到大，差唔多啦~」星瑤說。

「有冇得現場演奏返首river flows in you俾我聽呀？」我問。





「有機會先啦~」星瑤笑說。

「做我生日禮物啦~我九月七號生日。」我說。

「仲有成幾個月喎……」星瑤無奈地說。

「提提你~五月十七號係我生日~記住我份禮物呀~」星瑤話題一轉。

「咁就想屈我餐生日飯同禮物？想錯你個心呀！」其實我腦袋裡已經不停思考著應該送什麼禮物。

嗯……毛公仔？

不了，她家裡應該已經有一大堆了。

嗯……送飾物？

她應該不會喜歡吧……

到底送甚麼好啊。

我看看手機，今天已經是五月十號，只剩下一星期的時間準備。
––––––––––––
又要UT又要準備比賽
聽日覺得5月之前完故嘅機會又渺茫咗QAQ
都係改成星瑤生日前完故算啦~
P.S.其實我覺得都係冇乜機會