【奇幻/異世界/冒險】我在這世界會不會強了一點: 第三章 初到異世界(三)
「請問呢，我要點樣登記做冒險者架?」阿新搵左個櫃檯既姐姐問。
「你想登記做冒險者?唔係下話，你睇落都幾瘦弱，冒險者好危險架，你遲D先登記啦......」櫃檯既姐姐講一大串野叫阿新唔好登記住。
(乜櫃檯姐姐係咁樣倒公會米架咩......)
「拿，一於咁話啦，我叫米雪兒，你遲D登記再搵我啦，拜拜。」
「咪住先咪住先，但我好需要做冒險者架，不如你測試下我先再決定啦。」阿新似乎就抵抗唔住米雪兒既連珠發炮。
「都唔係唔得既，我都有相熟既朋友係附近，我叫佢同你切磋下啦。」
(又黎?不過都好，淨係同老闆打過都唔太準。)
「貝克芬!過黎阿，我有野要你幫手阿。」米雪兒揮住手，大聲咁叫。
「米雪兒~」遠方傳黎好大聲既回應。
一個棕短髮，相貌皎好既青年跑過黎，佢既耳朵同一般人類唔同，係尖耳，好似精靈咁。
(睇黎同遊戲好似，有好多種族。)
「你同佢切磋下阿，佢都話想做冒險者喎。如果順利，佢就係你後輩架啦。」米雪兒好似有小小想貝克芬盡力咁打擊阿新咁。
「你唔好彩啦，係米雪兒面前，我一定唔會留手架，準備受傷啦。」貝克芬細細聲咁提醒阿新。
「即管黎啦，不過點到即止啦，我唔想受傷。」阿新有小小興奮咁講。
貝克芬拎住劍套就即刻衝向阿新。
(直衝?睇黎係想吸引女仔注意啦。)
阿新好敏捷咁避開，並且全力打向著住皮鎧既貝克芬。貝克芬就即刻訓低左。
(好似......大力過岩岩咁多既?速度都快左)
「貝克芬!你冇事下話?」米雪兒走出櫃檯。
仔細一睇，米雪兒既五官精緻，身材比例完美，如果參加選美，拎冠軍都唔會令人震驚。
「冇......冇事，岩岩我唔小心姐，黎多次就冇事架啦。」貝克芬掩住個肚，有小小辛苦咁講。
「米雪兒小姐，唔知我咁樣足唔足夠做一個冒險者呢?」阿新拉返到正題。
「應......應該冇問題既，你同我去果邊做登記啦。」米雪兒見識今阿新既力量之後，就帶阿新去登記。
米雪兒摸住個水晶球既物體，開始講一D阿新聽唔明既語言，聽落好似係咒語咁既野。
「阿新，你伸隻手出黎啦，一間你既手背會有小小熾熱既感覺，跟住就登記完成架啦。」米雪兒仔細咁解釋。
「好啦~完成啦。你已經成為左D級冒險者。咁你就會多左個魔法，當你講『Call』果時，一張印有你既名同能力既公會證就會出現，再講多次『Call』就會消失。放心，公會證上面你既能力只有你自己睇倒，其他人無論用咩方法都唔會睇倒。每一次你接受委託同拎委託報酬果時都要出示公會證，你仲有冇咩唔明?」米雪兒又連珠發炮。
「我想問下呢，咁係咪每次都要搵你架?」
「理論上黎講係架，除非你指名要換人，如果唔係我就好似係你既負責人咁既角色啦。由於我分到小小冒險者委託報酬既抽成，姐係我既薪金其實都係出自你身上架，所以你有咩問題都可以搵我，一D文件手續上面既野我都可以幫倒你架。」
(竟然有抽成，不過都唔錯，有個靚女OL幫手。)
「米雪兒，我想問下要點樣升級冒險者等級架，同埋升級有咩好處架?」
「升級冒險者黎講呢，要滿足2個條件。一，需要完成指定既委託數量或者有相約難度既任務。例如D級可以做1000個採集任務又或者做30個護送任務。三，完成指定數量之後，就可以黎公會申請冒險者升級考試，完成考試就可以升級架啦。咁升級既好處都好多既，一黎可以接受更難既委託啦，二黎B級以上既冒險者可以免費享用所有國家既公共建施、可以自由出入所有國家、裝備修理7折、食野8折、免費感情查詢、尿道炎免費醫生檢查等等唔同既福利。」
(最後果幾野係咩事阿，不過都好多好處，睇黎要快D升級先得。)
「咁有冇D比較快同簡單少少既任務阿，因為我都幾等錢洗，連住宿都未搞好。」阿新摸住頭，唔係幾好意思咁講。
「咁阿，咁我建議你做左呢個討伐獨角狼呢個委託先啦，D級委託黎講都算係一個比較中等既委託，只要收集30個狼角再拎返黎就得架啦。阿仲有，你岩岩登記做冒險者，我地會送個地圖比你架，一D長期任務會自動登錄係地圖上面架。」米雪兒遞左個地圖比阿新。
阿新睇完地圖，就好順手咁就將地圖放落布袋度，一個睇落裝唔曬個地圖既布袋，居然放得曬成個地圖，而且重量仲要冇乜點變。
(真係同遊戲差唔多啵，連呢D連接第四空間既包包都有。)
「喂，你同我企係度。」阿新後面傳黎貝克芬既聲音。
「你叫......阿新下話，同我組隊!」貝克芬帶有命令既語氣。
「下?點......點解既?」阿新一面疑惑。
「你唔好理啦，我要確認下你係咪適合做米雪兒既冒險者。」
(米雪兒既冒險者?一般黎講唔係我既協助人咩?)
「你係咪好想知道我點解咁講呢?」貝克芬好似欲言又止。
「um......其實唔係幾想。」阿新帶有苦笑咁講，因為聽起黎好長篇大論。
「......我同米雪兒係一年前認識，佢係第一個接納我既公會專員。」貝克芬停左停，好快又無視阿新咁講。
「果時我仲係一個岩岩出道既弓手，一個缺乏近戰能力，又唔識魔法輔助既弓手，實在唔太受人歡迎，我自己做委託又好乏力。但米雪兒見倒咁樣既我，反而好盡力咁幫我搵缺人既隊伍組隊，仲做埋我既負責人。咁樣既天使，我絕對唔會比壞人接近佢!」貝克芬帶有敵意咁望住阿新。
(哈......點解佢好似好自豪咁既，不過知道有魔法，呢個故事都聽得唔蝕，這波不虧。)
「喂，唔好行，企係度，有D唔對路......」貝克芬伸手攔住阿新，細細聲咁講。
「本黎呢度應該會出現幾多哥布林，不過依家一隻都冇，空氣仲有少少血味，好唔對路。」貝克芬直接講出佢覺得怪既地方。
話音未落，距離阿新同貝克芬唔遠既地方就出現左一隻滿口鮮血既狼，呢隻狼散發既氣場，直接令到佢地打冷震，銳利既牙齒好似連鋼鐵都咬得碎，粗壯既四肢就睇得出速度非凡，灰色既毛都比血染到好似黑色咁，絕對係殺生無數。加上好似有D暗紫色既氣場包圍住隻狼，就算幾唔敏銳既人都會知道呢隻狼絕對好危險。