【奇幻/異世界/冒險】我在這世界會不會強了一點: 第四章 初到異世界(四)

  「呢......呢隻咩黎?」阿新有少少震住問貝克芬。
  「睇樣個，似係獨角狼，不過冇理由獨角狼有咁既氣場架......」貝克芬塊面冇曬血色，佢都好唔相信面前見倒既野。
  「唔通係魔狼......」貝克芬只係諗倒呢個可能。
  所謂魔狼，其實係魔化既獨角狼。獨角狼原本並唔係個體強大既生物，佢地通常係以群體作為戰鬥單位，以數量取勝。但係阿新佢地眼前既魔狼，就係特殊個體，係成長階段有飛躍一般既成長，最後有同種無可比擬既強大，就叫魔化物種。
  正當貝克芬想拉阿新走既時候，魔狼就以閃電一樣既速度衝向佢地，睇黎要令佢地都成為佢血盆大口既祭品。
  阿新馬上向後推開貝克芬，自己係魔狼既左邊避開。不過魔狼既反應都遠超阿新既估計，將阿新右手咬左一部分落黎，傷口唔深，但疼痛感絕對唔係冇耐之前仲係平常人既阿新可以忍耐倒。
  (哇......好痛，而且貝克芬好似仲未回神咁......瀨野啦呢次......)
  阿新腦袋急速轉動，首先最緊要既係點樣可以走倒，不過受左傷既阿新加上未回神既貝克芬，係分秒必爭既情況下，真係可以成功全身而退?答案應該係唔得。
  (咁姐係要打敗佢啦，不過戰力差太多，要有一口氣縮短差距或者改變戰況既招。)
  (白卡?要用白卡?)




  阿新係袋入面拎出神比佢既白卡。冇錯，係呢種情況下，神既獎勵似乎係唯一既突破口。
  (不過要咩能力?直接消滅隻魔狼既能力?唔得，神講過能力會隨我成長，我依家既能力明顯打唔贏隻狼。最壞情況係，白卡比我既所有攻擊防禦技能全部都冇用，姐係要功能型既招?)
  阿新好需要時間去思考，但現實係殘酷既，魔狼並唔會比時間比阿新，對比起已經受傷既阿新，魔狼對貝克芬既興趣明顯更大，魔狼馬上拔腿衝向惶恐不安既貝克芬。魔狼衝向貝克芬既時間，遠遠比阿新衝上去支援快。
  (冇時間啦......隨便啦!!)
  阿新向白卡許願，白卡好似回應阿新既要求，發出白光，白光雖然憑空出現，但一D都唔刺眼，反而比人既感覺好安心，好溫暖。
  「神的步伐!」阿新講出技能既名。
  係一剎那間，阿新就出現係貝克芬面前，唔係，係魔狼既位置同阿新調轉左。阿新係用既時候同時向後跑，雖然幫助唔大，但的確爭取左更多既時間。
  (要講一句鼓勵倒佢既野，當頭一棒咁樣先得。)
  「振作D阿，我同你都死左，米雪兒會好傷心架。」
  (頂，我果然唔太識講呢D野。)




  不過貝克芬既反應出乎阿新意料，貝克芬既眼明顯比岩岩集中好多，雖然佢既身體仲係因為驚而顫抖緊，但明顯已經有戰意。
  「聽住，時間唔多，你就做你擅長既野，走唔走倒就睇你啦。」阿新指住貝克芬身邊既弓。
  冇錯，阿新自己做倒既野唔多，要同比自己強既野戰鬥，實力不足，只好由數量補上。
  阿新拎起貝克芬既劍，就等緊一個反擊既時機。
  (忍住阿，忍住阿，要再近小小。)
  要等到魔狼係阿新同貝克芬距離差唔多既情況下，令到魔狼選擇其中一個黎攻擊，另一個人就落殺手。
  (係依家啦!)
  「神的步伐!」阿新再次怒吼。
  今次調轉既並唔係魔狼，而係魔狼身邊既草，阿新同魔狼既距離唔遠，只係得1至2米。
  (冷靜D，好似打機咁，依樣葫蘆，做差唔多既野啦。)




  阿新黎到呢個世界後戰鬥經驗唔多，唔好話招式技能，連似樣D既動作既冇。唯一可以聯想倒類似既野，就淨係得遊戲。
  與此同時，貝克芬都發起左進攻，蓄力拉弓既貝克芬射出速度幾快既一箭，不過箭只係落係魔狼既面前，可能係因為貝克芬今日第一次出招，加上恐懼無比既佢，令到箭射唔中。雖然打唔中魔狼，不過都令到魔狼既動作停左落黎，表現出一絲遲滯。
  (做得好阿!)
  阿新馬上拎劍刺向魔狼。
  但係，魔狼既反應比預期快好多，重整旗鼓既魔狼，直接避開阿新既刺擊，緊咬住阿新既右手。
  撕裂一般既疼痛感以迅雷般既速度傳遍阿新全身，尖銳既牙齒令到阿新既血湧如泉水，痛覺已經就黎令到阿新神智不清。
  阿新就黎暈既時候，貝克芬既箭打中左魔狼既身體，而且第2支箭都飛緊過黎，不過明顯軌道偏高，應該打唔中魔狼。原本緊咬阿新右手既魔狼，都因為直擊倒佢既箭而鬆開左口。
  阿新冇放過呢個機會，馬上用出「神的步伐」，將自己同飛過魔狼頭上既箭調位。
  「去死啦!!畜生!!」阿新用盡所有力氣，將劍直接插落魔狼既頭度。
  劍直接從魔狼既頭頂穿過下顎。魔狼從此倒地不起，不過傷重既阿新都已經冇力再企起身。在場目擊一切既只有貝克芬。
  理論上絕對唔係2個D級新手冒險者可以打敗既魔狼，係阿新不顧一切既情況下，加上阿新超常既技能，竟然可以不損一員咁完成討伐。