「做埋呢個委託就第27個啦下話,姐係差3個委託就可以去考升級試啦?」阿新問。
  「好似係,都話我地2個夾架啦。」貝克芬係地下汁緊獨角狼掉落既角。
  距離阿新佢地打敗魔狼已經有15日,呢15日阿新同貝克芬組成一隊,而且有唔錯既成績。
  (神的步伐係前幾日都要相當既體力消耗,但最近好似可以無限開咁,技能既成長?唔係,係我既成長?)
  呢15日之間,阿新不斷對技能進行測試,距離、轉移時間、轉移對象等等,得出既結論係,距離每日不斷增長,從最初既自身周圍10米到依家已經係150米,而且轉移時間無論距離幾遠都係一瞬既事,轉移對象就冇限,只要係自己見倒既野全部都可以交換位置。
  (唔可以唔講,的確係好好用既技能,究竟身為神既佢有幾多呢D技能阿?)
  「好啦,反去搵米雪兒做登記拎獎啦。」阿新催貝克芬汁快D。
  「咁點解你唔諗下幫下我呢?喂?幫下我啦喂!」貝克芬不斷呼叫無視佢既阿新。
  「太好啦,你地差少少就可以升級啦。」米雪兒打從心底覺得開心。
  「聽唔聽倒阿貝克芬,叫左你汁快D,咁樣咪可以打多3轉。」阿新嘲諷貝克芬。




  「其實你幫我汁少少就得架啦,我又奇怪啦,點解你係都唔汁呢?」
  「因為我好攰,我耐力好低架。」阿新扮曬一副冇辦法既樣。
  「好啦好啦,你地唔好吵啦,我醒起今日王都發佈左一份通告,內容係去王都集合,經篩選後既人可以接受一份A級委託,如果你地得既話,話唔定可以直接升上B級冒險者架喎。」米雪兒比張通告比我地睇。
  「阿新你點睇?」貝克芬認真咁問。
  「我覺得都ok既,經篩選既意思應該都係戰鬥架姐,但最奇怪係點解要篩選人咁麻煩,唔直接叫A級冒險者去呢?唔通係一D唔光明既委託?有D咩係唔可以委託冒險者架?」阿新一波分析。
  「通常都係一D殺人既任務,例如殺其他冒險者、平民等等,不過王都唔會係叫人做呢種委託掛。」米雪兒如實咁講。
  「都岩既,不過王都係邊架?」阿新黎左咁耐,都係大概知道係唔同國家既名,不過對呢度地理都係全無概念。
  「距離呢度(吉思村)騎馬大概3個鐘啦。」
  「咁都ok,咁你有咩事都可以聯絡我地,或者我地有咩事都可以叫你幫手。」阿新遞幾張白紙比米雪兒。
  呢D白紙叫「傳話紙」,係被施放左魔法既魔法道具。將呢張紙撕爛果時,就可以同自己一個識既人對話,當然係憑空對話,即使唔洗講出口都可以對話。而呢D魔法道具,係吉思村有幾間專門店有售。




  「嗯,咁我安排一下,叫人接你地去王都啦。」米雪兒辦事效率好高。
  當馬車到果時,2個人就馬上出發。
「點解你會接受呢個委託既,你唔係話有奇怪架咩?」貝克芬係去緊王都既途中問阿新。
  「的確有諗唔明既地方,不過再諗都係無補於事架啦,而且冇危險又點得世間財呢?加上我都想見識下其他人既實力。」阿新直接講。
  「你唔係冇道理既,算啦,反正我地隊既大腦都咁講,咁就去啦。」貝克芬好信任阿新既決定。
  「係呢阿新,咁耐都冇聽講你既身世,你係邊度黎架?」貝克芬睇落想打發下時間,畢竟仲有一段時間先到王都。
  「我阿?我係一個叫香港既地方黎既,呢個地方唔出名唔大,你應該未聽講。果度好和平,唔似呢度有冒險者要投身戰鬥。不過對於我黎講係一個好悶既地方,D人好似冇乜生氣咁,返工放工訓覺食飯,好似好幸福和平咁過住悶死人既生活。」
  「嗯......咁你中唔中意你既故鄉?」
  「呢個問題真係難講,我細細個好中意既,大個左就唔知,好似同我識既故鄉好唔同。」阿新滿面憂愁。
  「唔好講呢D啦,其實我比較想知魔法果D野,你有冇自己既魔法阿?」阿新轉移話題。




  「有1招啦,叫『加速』,姐係令到我敏捷暫時提高,速度快D咁樣。」
  「喔~魔法係咪咩人都可以學架,姐係我都可以學倒你招『加速』?」
  「唔係架,要有相對既適性先得,五行加上黑白無,總共8種屬性,有D人會學火魔法好易上但學極都學唔倒水魔法,有人就相反,我地叫呢D情況做適性。」
  「咁你既魔法係邊度學架?」阿新好想知道更多有關魔法既情報。
  「我爺爺教我架,聽講佢同我阿爸去請教一個獵人學返黎既。不過聽講有人可以係書上面就直接學習倒魔法,真係憎呢D天才。」貝克芬冇啦啦抱怨起上黎。
  「2位,就到王都啦。」車夫提醒。
  遠處已經見倒王都既樣。王都比城牆圍住,守備深嚴已經透出令人嚴肅上黎。城門前擺放左一個石像,一個戴住王冠既人拎住寶劍指天,騎住獅子。城牆下面既檢查站已經排起長長既人龍,睇黎好多人都睇左通告黎王都。
  「睇黎篩選應該好難過啦。」內容同表情相反,阿新睇落非常興奮。
  「哈,我就唔覺得會慘得過打魔狼啦,反正我地一定得既。」貝克芬睇落都好雀躍。


(因考試原因,暫停更新至12月15日)