【奇幻/異世界/冒險】我在這世界會不會強了一點: 第十章 王都篇(五)
(依家要做咩好呢?仲有成3個月時間......)
阿新一時之間諗唔倒做咩好，畢竟佢黎王都既目的已經達成左。
(不如搵個地方學下魔法先。)
阿新終於醒起，佢對呢個世界全大既嚮往，魔法。
王都屬於一個平衡發展既國家，唔算係特別著重於軍事發展，但係仍然係全年招兵，而且亦都設有訓練青年既軍校。
(唔知報唔報倒個青年班咁呢，3個月都應該學俐一招半式掛。)
「唔該，我想報名入軍校阿，有冇年長生咁樣架?」阿新帶住年輕既口吻咁問。
「年長生?你阿?我地高中部應該仲有位既，一間過去做魔法測試啦。」坐係門口既人咁講。
「高中生?我似高中生咩?」阿新好驚訝，雖然自己畢業冇耐，但遠遠都唔似係高中生。
「岩架啦，你都唔係邊個係?」門口既人遞出一塊鏡。
鏡入面既阿新冇左因為工作壓力而出現既疲倦感，換黎既係中學時代既年輕感。
(咩話?點解會咁架?)
「拎住啦，一間叫到你個號碼你就入去做測試啦。」
(我都唔識魔法，又點做測試呢......)
阿新身邊既人睇落都係幾後生既人，阿新雖然唔係話好老，不過都有一種成年人參加學生考試既作弊感。
「我想問下你呢?知唔知大概考D咩架?因為我魔法就唔係好叻，所以想問下有冇攻略咁啦。」阿新問一個睇起上黎比較溫和乖巧D既人。
(先表白我自己係唔勁既人，希望佢會教我啦。)
阿新咁諗係因為佢覺得如果對方知道佢唔係勁人既話，肯教佢既機率就會提高。
「哦，冇乜所謂阿，反正係公開既祕密黎，佢會係句簡單既詠唱咒文叫你用，根據你使出既魔法威力做判斷。」阿新果然冇搵錯人。
「係呢，你叫咩名?我叫阿新，好多謝你肯講比我知。」阿新希望盡快做好人際關係。
「我叫塔斯，雖然係第3次參加測試，不過我唔係魔法測試唔過關，而係筆試過唔倒。」塔斯熱情咁講。
「筆試?考咩架?好難架?」阿新仲以為擺脫左試卷，呢個消息簡直就係當頭一棒。
「考數學，聽講每年得3成人合格。」塔斯露出不安既表情。
「數學都咁難?咁就出事啦。」作為理科人，阿新並唔怕數字，但同時作為理科人，阿新最怕連數字都冇既數學題。
「唔緊要啦，考多幾次就大概識做架啦，你一定如果唔識咪偷睇下我囉，不過唔好咁明顯。」塔斯用乖巧既面孔講出呢D咁古惑既言論。
「多謝曬，多謝曬。識倒你真係好。」
「下一個，92號。」聲音係測試室入面傳出黎。
「到我啦，一間見啦，一間應該係筆試室集合。」塔斯拎住92號既號碼紙就入左。
阿新拎住93號既號碼紙默默咁祈禱。
雖然阿新知道佢咁樣做都無補於事，情況就等同於學生聽日考佢最冇信心既一科，而且仲要係裸考一樣，果種不安同無力感，絕對唔係旁人能夠理解。
「下一個，93號。」聲音再次傳出，阿新就行入去準備進行測試。
「拿，咒文係，埃格泥(ignite)，你用黎睇下啦。」拎住計分板既人咁講。
(埃格泥?ignite?英文黎架?不過發音唔太準，應該唔係掛?)
阿新伸出手掌，照住咒文讀。一個紅色魔法陣好快咁出現，阿新從心底覺受到力量既湧現，熾熱感慢慢係手掌出現。終於，出現左火柴咁大既火種。
「你......認真左咁啦?」連揸住計分板既人都好唔相信面前既畫面。
「應......應該就係啦，唔係有咩問題架何?」阿新尷尬咁講。
「唔會有咩問題既，冇乜分數咁解姐。」揸住計分板既人大大畫個交叉，然後就指左去筆試室既路比阿新。
(火柴咁樣，但係我感覺也唔差架喎，點解會咁既呢?)
「呢邊阿，呢邊阿!」塔斯揮手。
「點阿，你岩岩個魔法測試考成點阿?」塔斯一中就講出阿新最擔心既野。
「應該冇事既，筆試應該要考好D咁解姐。」阿新討厭既拉分歲月又返黎。
「唔緊要啦，總之你一間偷睇下我就得，我應該識做既。」
「好，咁多位年輕有為既考生，筆試現在正式開始。」類似考場主任既人宣佈。
阿新懷住不安既心情打開試卷，接下黎既一幕，令阿新又刷新左對異世界既認知。
2 X 3 = ?
6 X 7 = ?
8 X 9 = ?
......
小明既一箭可以射殺3個敵人，請問佢9箭可以射殺幾多人?
......
呢類既小學問題，不斷重覆係試卷上面。
(咪住先，唔通係有伏，冇理由會考咁既問題架喎?想考驗我地會唔會咁白痴咁寫正路既答案?)
阿新諗唔明點解份試卷會咁。
(唔好理咁多，睇下塔斯點答先做判斷。)
阿新望向塔斯既試卷，塔斯既答案出奇地平常，第一題6，第二題42，第3題73。
(都係幾正常既答案黎，咪住，73?佢係咪計錯左阿?佢上面果2條同我認知一樣，應該係岩既，但點解佢會寫73架?唔通佢真係計錯咁簡單既數?)
阿新好快咁做曬試卷上面既題目，然後發出小小咳嗽聲引起塔斯既注意，再用筆敲一敲試卷周圍，提醒塔斯佢計錯數。
點知塔斯見倒阿新咁做，反而誤會左係阿新已經做完參考完，做完試卷，伸出手指公比讚比阿新之後就繼續做卷，完全唔明阿新既暗示。
(出事，呢次出大事，佢完全唔明。)
結果，阿新意外咁係筆試拎左滿分，但係魔法測試就係有史以黎得分最低，好彩因為筆試滿分，被認為係才華橫溢既人而破格收讀。而塔斯都好似係筆試合格，岩岩好拎一半分，魔法測試既成績唔錯，毫無懸念成功入學。