【奇幻/異世界/冒險】我在這世界會不會強了一點: 第十三章 詛咒篇(一)
「你都幾犀利喎，我未見過人可以同莉莉絲打得咁難分難解。」塔斯拍下阿新既膊頭。
「下話，不過佢咁講都知佢未盡力啦，再打落去我應該就輸。」阿新並唔係謙虛，係「呢個時候」同埋唔用「神的步伐」既情況下，的確打唔贏莉莉絲。
「係呢?一間放左學不如去食野囉?」塔斯笑容滿面咁講。
然後，放左學之後，塔斯的確係帶左阿新去食野，不過，連莉莉絲都有去。
「阿?你地兩個好熟架?」阿新勇敢咁講野打破隔膜。
「嗯，我地2個都算係貴族，當然我既家族唔似莉莉絲咁強大，不過因為我地年紀相若，係D 貴族聚會上面叫做有D交流咁啦。」塔斯講出同莉莉絲既相識過程。
「關你咩事姐?如果我知道你黎，我一定唔會應承塔斯，連魔法都咁低水準既人，冇資格同我同台食飯。」莉莉絲一句說話又將氣氛打落冰點。
「佢講係咁講架渣，其實佢應該幾開心，我相信係學校，甚至成個王都，都冇乜邊個可以同佢打成咁，佢應該都睇重你架。」塔斯細細聲咁同阿新解釋。
(嘛，估唔到真係有傲驕呢樣野。)
阿新佢地去既餐廳睇落係比較高級既餐廳。以柔和既燈光為主，裝潢高貴而不俗氣，加上服務員統一而且整潔既制服，未入都知道價格驚人。
「放心喎，我約你既，一定唔會要你破費既，話曬我都係貴族，請你一兩餐冇問題既。」塔斯「壕」氣滿滿咁講。
(係天使阿。)
餐單意外同阿新既世界一樣，都係龍蝦果D野，但係味道絕對係阿新畢生人中食過最好食既。龍蝦既鮮味，透過蝦肉上面作點綴既橄欖油完全帶出，簡簡單單既做法，將海鮮唔洗多加烹調既理論實踐出黎。
「你D身手同邊個學架?」莉莉絲突然講出一句。
「你......你問我?」阿新有D錯愕。
「緊係啦!」
「我自學既，不成才。」阿新謙虛咁講。
「有冇興趣加入我部下?」莉莉絲再次跳躍性既發言。
「喂!講好左係普普通通食飯，唔講呢D野架嘛。」塔斯語氣變得嚴肅左。
「好，我錯，我自罰一杯。」莉莉絲拎起裝住紅酒既玻璃杯，一乾而盡。
(佢唔係中學生既年紀架咩?咁快飲酒既，而且仲好似係常態咁......)
阿新雖然係已經步入職場，但係都冇飲酒既習慣，紅酒都只係飲過1，2啖，味道絕對唔講得上係好，回甘既苦澀味絕對唔係人人喜歡，所以阿新一直都覺得紅酒只係體現身份地位既飾物。
正當阿新佢地用餐用得好愉快既時候，餐廳出面傳黎令阿新在意既嗌交聲。
「我去下廁所先。」阿新藉口離開睇下發生咩事。
並唔係正義感發作，只不過係食花生既心情。
餐廳既接待生似乎係度趕一個身穿粗布，打扮污糟既女仔離開餐廳門口。
「呢度係高級既餐廳，唔該你離開呢度啦，老闆見倒會刁難我架。」接待生既態度出奇地好。
個女仔聽到接待生咁講，好似都唔想麻煩佢，就走左。
「係呢?岩岩做咩阿?」阿新好奇心滿滿咁問。
「原來係軍校既學生，咁既，岩岩果個女仔係有『魔神詛咒』既人黎，所以附近既人對佢好唔友善。」接待生望一望阿新既制服，然後就老實回答。
係王都入面，最受重視同尊敬既係國王，其次就係貴族同官員，緊接住就係騎士。因為騎士同一般收編既士兵唔同，騎士係從小接受文武訓練既人，加上品德培育，係才德兼具既人才。而軍校既學生，一般黎講，大多數畢業都會成為士兵，少數既人會成為騎士。換句話講，學生可能高中成為騎士，所以平民一般都對學生尊敬，以免日後有咩麻煩。
「『魔神詛咒』?」阿新完全唔明白，不過都感受倒係負面既野。
「聽講呢個女仔以前都係一個冒險者，不過佢地隊伍好似係某次行動失敗而團滅，淨係得返佢。佢其後加入既所有隊伍，都會因為不明既原因而團滅，公會為左平息其他冒險者既不滿，就將佢既冒險者身份吊銷左。」接待生將佢知道既已經講曬出黎。
「多謝曬你既解答。」阿新拎出幾個金幣比左接待生，除左小費同情報費，都算係多謝佢做好事，冇刁難個女仔。
用餐之後，塔斯就拉走左莉莉絲。如果唔係，阿新仲比莉莉絲拉攏緊。
正當阿新仲煩惱緊搵邊間旅館住宿既時候，又有好嘈既聲傳入阿新既耳。阿新急急腳跑向聲源既後巷。
(又係呢個女仔?)
「喂，叫左你唔好再出現我面前架啦，你D衰運又傳左比我啦。」一個睇落好健壯既男士用腳踢比「魔神詛咒」既女仔，而另一個好似係男士同伴既人就企係一邊睇戲。
正當阿新諗緊去唔去幫手既時候，佢隻腳就已經行左出去。
「你係邊個阿?呢度冇你既事，快D走!」健壯既男士注意倒阿新，就大聲喝佢走。
「我係邊個呢?我真係唔知喎，我仲想黎問下你知唔知我係邊個添。」阿新吐舌調戲呢個大隻過佢幾圈既壯漢。
「你係咪想比人打一餐阿!」壯漢既同伴講既同時就揮拳衝上黎。
「一般黎講唔係打之前講既咩。」阿新悠然自得咁捉住佢既拳頭，對方既拳頭好似吸實左咁，絲毫不動。
「你......你係咩人?」壯漢既同伴口都震曬咁問。
「我?我係唔屬於呢度既人，原本都唔想搞咁多事，不過如果係呢度都怕頭怕尾，咁算咩冒險呢?」阿新呼吸平穩咁講完，就一拳打暈左對方。
「你......你點解要幫『魔女』阿?冇人會同情佢架，你加入我地仲好啦。」壯漢仲企圖拉攏阿新。
「第一，你地黑人憎。第二，你地黑人憎。第三，你地黑人憎。」阿新口氣變得冰冷，一個箭步貼近壯漢，用肘擊倒壯漢，然後起膝踢開佢。係其他人既眼中，呢個只係一秒都唔到既事，完全睇唔清楚阿新既動作。