《有一晚，我喺學校操場遇到跌落凡間的天使》: 【3】
「無……我睇喱個覺得好感人咋嘛……嗚嗚…嗚…佢哋可以一齊返真係太好啦……」
我再瞄一瞄，睇下小瑤佢睇咩戲，原來佢睇緊誇世代大結局。
小瑤係講緊ali同陳豪，又真係幾好睇嘅。
「你洗唔洗喊成咁啊？」成個港女咁。
「原來喱啲就係愛情，真係令人落淚啦。」
小瑤仲係咁用啲紙巾，好似啲紙巾唔洗錢咁，我可以咁講，小瑤係完全顛覆咗我對女仔嘅想像。
過咗無耐，我屋企人返嚟，佢哋一入嚟就講，「小瑤，我買咗啲嘢俾你食啊？」
「？？？」
小瑤搖兩搖自己個頭，佢嗰記笑容，幾咁得戚啊。
「夏晨！幫手拎嘢啦，成日掛住睇電視！」老母大人一返嚟又淨係識屌鳩我。
老母係一種淨係識點人同屌人嘅生物。
「你睇下小瑤幾乖啊，一返嚟就幫手啦，你睇下你啊。」
我覺得小瑤真係深不可測……究竟佢有幾多能力？佢嘅潛力真係勁。
我唔知好似大雄咁傻仔，有個咁勁嘅哆啦A夢都唔識用。
唔知咩事，我屋企人就俾小瑤收服咗，做埋佢嘅奴隸，咩都幫住佢護住佢，仲問埋佢夠唔夠錢，當我哩個仔死咁。
成餐飯佢哋就有講有笑嘻嘻哈哈得好大聲，完全幫我無到……
「小瑤啊，幫我做功課。」我將今日啲功課交曬俾佢，指意喱個天使打救我。
「我唔識喎，我係天堂都唔洗讀者嘅。」
「你求其用你啲能力幫下我咪得囉，唔洗識做喎。」
「我邊有喱啲唔識變到識嘅能力姐？」
「天使唔係咩都做到咩？唔係萬能嘅？」
「我呢...有啲嘢係做得，但做得，唔代表可以做。」小瑤失驚無神彈出一句名言出嚟，搞到我都唔知如何回覆是好。
跟住我唯有靠自己，天使原來都有佢嘅原則嘅。
我執好咗我嘅上格俾小瑤住，我自己就瞓下面。
我瞓係張床度，而小瑤就瞓上面。
我望住上層，總係有一種好唔自然，好唔真實嘅感覺。
試問我點會估到......有一日會有一個女仔瞓係我上面先得㗎？
我又點會估到嗰個女仔係一個天使先得㗎？
雖然我覺得佢似外星人多過天使。
諗下諗下，我就進入咗夢鄉。
係夢入面，我上咗天堂，小瑤帶住我參觀天堂，嗰度仲好多好靚女嘅天使，個個都有光環。
然後班天使係咁同我傾偈，傾傾下仲要玩埋我碌賓周仔，係佢捉住我碌賓周嘅一剎那，我嚇親。
即刻向後縮，就係喱個時候......我突然間由天跌咗落嚟。
跟住就醒咗。
個天微微光，我對於個夢仲清醒，但過一排就會咩都唔記得。
我瞓唔返，我上去望一望小瑤，發覺佢眼大大咁望住佢，水注注咁，個樣仲帶小小淫。
其實只不過係佢嘅淚水嘅，細心一睇。
「做咩唔瞓啊？」我好奇一問。
「我頭先發夢夢到我上返天堂......我好....掛住我啲屋企人......」
我俾小瑤感性嘅一面感動親，原來佢咁調皮嘅個性下，都會有柔弱嘅一面。
一股保護感由心而生，「乖啦，你當我係你人間嘅屋企人得㗎啦！」
我就咁講出嚟都覺得自己傻仔，不過係真心嘅。
「你睇下，你係喱度住我嘅，食我嘅，我哋仲唔係屋企人咩？」
「但你都唔係...天國.....點做我屋企人啊？」
我頂！佢講啲咁戇鳩嘅嘢即刻無曬氣氛，我反曬白眼。
喱啲時候講喱啲嘢，唔係可愛，而係白痴！蠢！傻！低能！
「係啦！我死咗佢好無？痴線！」
嬲嬲地嘅我，返落下床著衫返學。
「做咩又咁惡喎？我又講錯嘢？」
小瑤語氣楚楚可憐咁，佢天國嘅屋企人....令我諗返起頭先個夢...
我依家的確係小瑤唯一一個可以依靠嘅人...但係識咗兩日咋喎？真係咁樣好咩？
我亂諗嘢嘅個性又再發作，為咗停止我唔好再亂諗，我決定早啲去食個大家樂早餐再返學，反正時間尚早。
「你去邊啊？」小瑤不安地問。
「你唔好嬲啦.....我唔想你係天國...我唔會再想你死啦。」
小瑤情急之下起身，因為上面好矮㗎咋，根本唔夠佢企起身。
「哎呀.....好痛啊！」小瑤摸住自己個頭，仲表情好痛苦咁。
我著衫著到一半，就過去睇下佢咩事。
「你無事啊嘛？」
「無事......」佢嘟住嘴咁講，但眼入面打緊轉嘅淚水就嚟流出嚟。
「好啦好啦，我唔嬲啦！」我就範。
「咁你去邊啊......」我諗，小瑤可愛嘅地方並唔係個樣生得可愛，而係佢由心底度為人著想，顧人哋多過自己，咁先係最可愛。
「我返學啊...我仲要讀書㗎！」我態度緩和咗落嚟。
小瑤有天使般嘅善良。
「我又去！」
佢變臉嘅速度快到......快過部電腦。
佢由喊即刻變返做笑，仲要好興奮添。
「你點去啊？」
「你理得我啊？」小瑤就咁哼住歌落床。
佢對於生活，係零知識，刷牙洗臉都唔識，我要慢慢一步一步教。
手腳唔靈活嘅佢周不時都整出唔少笑話，例如擠牙膏大大力一嘢㩒落去啦，搞到浪費曬啲牙膏啦；洗面又好用力合埋眼啦，個樣勁搞笑。
生活上多咗個人，其實幾好玩，雖然係麻煩，但真係開心嘅。
小瑤嘅能力係可以將一切事物順佢心意而行。
依家，我哋一齊上緊堂，而小瑤......
坐緊係我隔離，著緊同我一間學校嘅校服，一切都係發生得好突然，幾個鐘已經可以俾你覺得，喱個世界根本唔算得係啲咩。
如果世界上真係有哆啦A夢，我諗小瑤就係我嘅哆啦A夢。不過小瑤好睇好多，同埋低B好多。
而我就同大雄差唔多，讀書唔成。
「哇！喱度就係學校啦？」
小瑤著住我哋灰藍色嘅校服裙，稱唔上特別好睇，普通囉。
但係佢興奮嘅感覺實在令我覺得好笑，「你上面無學校架？」
我好似提起佢啲唔開心嘅事，扁一下嘴，然後若無其事咁講：
「我係上面係低級天使嚟架，都無機會讀書嘅，日日嘅任務就係工作……」
儘管如此，我都覺得小瑤佢好善良，好樂觀，身世如何並不重要，喱個道理我細細個就明。
「咁你依家咪可以體驗下囉！」
「係呢？喱一班有啲咩人啊？」小瑤佢仲未熟習喱個班，佢將大家嘅記憶變到識咗好耐咁。
而自己仲係咩都未知。
「一陣你問就得啦，依家解釋俾你聽好麻煩啊！」
我繼續坐係度做功課。
問題係，差唔多上咗一兩堂，都無乜人同小瑤講嘢，甚至乎當佢無到。
本來佢臉上期待、興奮嘅表情，都慢慢消失曬。
我漸漸發覺唔對路，過一排我先知，原來小瑤係班上面係邊緣人……