先講下背景,我宜家27歲,173CM,大眾臉,係某部門副經理。升職後,反而工作輕鬆左,又見到女同事返工有寫故,所以心思思想分享下自己既事。


18歲讀完中學果年,公開試成績好差,無得升學。同屋企人嘈左一餐,最後鬥氣離家出走。

 
雖然18歲岩岩畢業,但我之前一直有兼職,有儲錢。所以當晚嘈完,即時塊野,拖埋個喼就走。我唔信一個人要靠其他人先生存到,好快,我諗大約4日就推翻之前所諗既野,1日酒店要4百幾,4晚就用左千8幾。

 



我左計右計,手上得返6千幾CASH,真心捱唔到幾耐,仲未搵到工,再咁落去,唔洗1個月已經餓死。咁我又無諗住死氣氣返屋企,身為獅子座,我唔想衰比屋企人睇,於是當時我做左好仆街既事,就係呃人感情。

 

當日,我Send msg比KK。當時都未有WHATSAPP,仲係Send msg既階段。

KK係我中學同學,160CM左右啦,A CUP,瘦底,同樣18歲,個樣好似電影入面既精靈,個耳仔真係尖尖地。屋企係中產家庭,父母經常OT,好少理佢,佢又無兄弟姐妹,放假好多時都搵我出去睇戲食飯,當然係KK請我啦。最重要既係我知道佢鍾意左我好耐,所以我知道KK係最幫到我既人

 



我: KK,我係你樓下M記,想即刻見你。

我唔鍾意打字,所以send msg一向簡單直接。過左2分鐘,收到KK回覆。

KK: 我做緊家務啊,等我20分鐘,一陣見。^_^

於是我買左個餐,邊食邊等KK。

 



等下等下,我見到門口有人同我揮手。等左30分鐘,KK終於出現。

 

KK: 唔好意思啊,岩岩做緊家務,所以咁遲先落黎。

KK根本唔係做緊家務。KK一身香水味,又化濃妝,擺明係收到我msg之後先開始打扮,不過我又唔會拆穿佢。

我: KK啊,其實你係咪鍾意我?

KK當場面紅晒,無出聲。

我: 我都懷疑左一排,見你宜家咁樣,證明我無錯。其實我約你出黎,係想講清楚……既然你鍾意我,不如大家同居一年,諗清楚先決定一唔一齊,好唔好?

KK依然企定定,無出聲。



我: 我計過,元朗果邊租間一房一廳,月租3千,一人一半,你話好唔好?

KK:幾時開始……

KK好細聲咁講。

我:如果你得閒既話 宜家入元朗睇屋,最快今晚可以住。

KK:好…好呀。

 

就係咁,我同KK變左同居關係。
已有 0 人追稿