簡介

講述香港年青人生活中的笑與淚。 充斥住無數廢話,不平凡中的日常故事。 不定期更新。



(1)鶩視角 人生第二春


你都睇到啦,訓係梳發到玩手提個型棍。

黑頭髮,生得幾靚仔,又轉左次身嘅我。


如果你對靚仔無咩概念架話,



我再形容得仔細少少,

大概係有肌肉嘅白石隼也。

如果你唔知白石隼也係邊個就自己Google。


當然靚仔呢樣野係人地讚我先,

會自己話自己靚仔嘅人真係好唔要臉。



比人講得多,我自己都覺得自己靚仔。

真係好有效嘅催眠術。


同部份有兄弟姊妹嘅人一樣,大家返到屋企可能會見到家姐、細佬、阿妹、阿哥求奇一個會笑到好猥瑣咁望住部手機發情。

哈哈哈哈哈,都唔知係到笑乜鳩。




其實我都試過,以前一放學返到屋企就會望住我個個生得同我差唔多靚仔,但我有氣質少少嘅垃圾細佬。佢就好似我咁訓係梳發到同佢啲mk妹同學whatapp。仲試過幾次帶女同學上屋企比我撞到。


如果佢有我一半咁潔身自愛就好,

希望佢唔好搞出人命啦。

始終我二十三歲就比人“伯父,伯父”咁叫。

真係比人叫到老曬。


上天真係好唔公平,明明我地係兄弟。



但係我又高又靚仔又成績好。佢就咁利用自己俊俏嘅臉孔自甘墮落。


好啦,正式介紹返自己。

我真名有個鶩字,叫我阿鶩就得啦。

聽講係父親大人唔想我隨波逐流,

趨之若鶩而改嘅。


但問題就係個鶩字到,鶩即係鴨....

鴨即係男妓。我小學時候查完字典之後真係嬲過我阿爸一排,竟然咁咀咒自己個仔嘅未來。



但佢應該係無心,垃圾細佬叫阿鷲。

嗯...諗起上黎都幾符合佢對異性嘅價值觀。


好彩我小學,中學,大學同學嘅中文程度都唔夠好,所以暫時無人笑我天生就係做鴨嘅人材。


同作為萬能插蘇,身經百戰嘅細佬唔同,

我無拍過拖,無同女仔whatapp多過一日。

簡直係異性絕緣體。



如果認真深究架話,都有同幾位異性whatapp傾過多過十句。

個次臨近考試,一個隔黎班嘅女同學問我M2數學考試問題,仲問我出唔出黎溫書,

結果我將所有考試範圍嘅所有技巧整合好,再whatapp比佢。

仲好貼心咁打左佢句加油!之後,佢就無再whatapp過我,

每次係走廊見面都會啤住我。

最後仲drop埋科。


第二個女同學約我單獨去newway唱K,唱K已經係世界上最浪費時間嘅活動,仲要得兩個人?



哼,打左句敬謝不敏。之後佢每次見到我都低頭快步走。女人真係好唔擅長表達自己嘅生物...


如果比屋企人見到我咁側身訓係沙發到同女仔用個app傾計,仲時不時傻笑架話。

一定會比屋企人覺得我終於做野大壓力到痴左線。


其實我真係無咩機會結識異性,唔提學生時代。

公司全部都係男人,隔黎部門嘅女性唔係老到做得我阿媽,就係結左婚。


係時候入正題,點解講到咁空虛寂寞凍嘅我。

會有機會同女性係apps到傾計。

要由上個月我差唔多生日個時講起.....


(2) 鷲視角 回家路上


如果有機會自己一個搭lift架話,

我都會係lift到怪叫大喊,個種感覺就好似日劇角色受完委屈之後對住大海鳩叫咁紓壓。

我都諗過閉路電視會唔會有錄音,但我已經叫足三年高中生活。就算有都返唔到轉頭....


我叫阿鷲,係個比人話生得似藤岡靛嘅四眼仔。

得啦得啦,吳岱融呀嘛。個梗過左期又唔好笑。



咩呀?你話我呢個成身汗,著住校服揹書包。

左手拎住炸雞脾,右手拎住新地筒係到食嘅肥小學雞真係好唔要臉。你有無發現條肥仔無配眼鏡?


老實講呀,我以為兩隻手都揸住野食,邊行邊食呢啲設定只會係老過我嘅港產片到出現。

我都唔知點解,個鏡頭會一直影住個肥仔。


鏡頭向左邊平移少少唔該,無錯。

呢個先係我,有個唔帶眼鏡嘅阿哥。

就算我戴左呢副爛鬼眼鏡,

都係靚仔過我,

天生就係做鴨人材嘅阿哥少少。


隔黎個肥仔阻住我嘅例行公事都算啦,

可唔可以唔好食到字字聲呀....

快啲死出lift啦,返屋企笑呵呵,

之後返學校比人欺凌,不停循環啦契弟。


唔得架,我已經十八歲,係個大人黎。

唔可以同啲小朋友咁計較,

講其他野分散下注意力先。


我同個個女仔約佢出街唱k溫書都唔知嘅草食男阿哥唔同,

我就好似異性磁石咁,

緊有一個鍾意我嘅女仔係左近。

其實我都唔知點解,

但送到埋嘴邊又可口嘅靚女無理由唔食架係咪?


如果阿哥佢有我一半嘅吸引力就好,

咁嫲嫲就可以有曾孫玩。

最重要係佢唔洗日日都留係屋企,

阻住我帶女同學上黎做功課。


終於到啦,死出lift啦肥仔。

只要有距離我住嘅38樓仲有五層架話,

唔係,三層就夠我紓解壓力。

咳咳,等我清清喉嚨先。


咩....咩話?個肥仔竟然同我住同一層?

點算好?應該若無其事咁留係部lift到搏一搏

去追求個段可以放空自我,好似動物咁亂叫嘅美好時光。定係出lift返屋企沖涼食飯打機訓教好呢?


算啦,我已經唔係小朋友,

係時候試下戒左呢啲奇怪嘅壞習慣。


終於到屋企門口,㩒唔㩒門鍾好呢?

雖然我有帶鎖匙,但有得揀架話,

我都係鍾意人地開門比我多啲,

唉,如果連開門都嫌麻煩架話就唔太成熟。


一入門口就見到我做公務員嘅阿哥訓係梳發到㩒電話傻笑。

呢種感覺真係似曾相識,但有少少唔同。

我同廢柴阿哥嘅角色互換左,今次輪到我用嫌惡嘅眼神望住訓係梳發到嘅佢。

哈哈哈哈哈,我好清楚佢係到笑乜鳩。


憑住佢猥瑣嘅笑容,我就知道佢同女仔whatapp緊。


上天真係好唔公平,明明我地係兄弟。

但係我訓係梳發一邊笑一邊同女仔傾計嘅時候就笑得咁意氣風發同動人。佢就笑到成個癮君子咁。

到底成日大叫無女溝、無拖拍、無異性埋身嘅阿哥會有機會同女仔whatapp?

咁就要由我個晚同朋友出去食飯講起。


(3)唔知邊個視角.

當你發現作者無左自己表達會1999嘅時候.jpg

睇到第三節都無講句“垃圾”然後㩒上一頁走場咁叻?

您好,同大家打個招呼。

唔好懷疑,我真係同緊屏幕前嘅你講野。

我唔係個對雀仔兄弟,

我重要過佢地好多。

我係邊個?我係成個故事到最重要嘅人,

幫助各位引入情景嘅好朋友。

唔明?

即係向世界出發嘅鍾景輝,星期日檔案嘅李朗怡,明珠台播紀錄片個時嘅一眾幕後配音員。

都係唔明?

上兩節本身應該有我架,話返比你聽邊個訓係梳發到玩手提電話,邊個同肥仔小學生搭緊lift。

所有角色一開始所在嘅情境同推進都係靠我去引導。

本來個麻煩友就話一定無我,

又話唔知寫唔寫落去好,搞投票又剩。

最後咪又係需要我。

唔係以為靠個兩個後生仔嘅對白,

就可以取代到我第三人稱嘅完美定位?

聽到呢到你多少都察覺到我嘅真正身份啦掛?

你睇哥哥同細佬嘅頭兩節嘅時候覺得唔錯,

又感覺到好奇怪,硬係差少少野咁?

但講唔出少左啲咩?

等我解釋一下啦,你呢種生得好靚仔、受全校女仔歡迎、成績優秀、運動全能、擁有住美好未來嘅人生贏家。



其實我都唔知你係咪呢類人,

但我諗可以捱到黎呢個劇情位,

你都有返咁上下質素。



呢種難以言喻嘅失落感就好似,

咁完美嘅你身邊永遠有一個樣貌普通,

又或者劇情簡介話佢外貌好普通。

但實際上好似《哈爾移動城堡》嘅蘇菲一樣根本係寫做普通平凡,實際靚女嘅女演員。

個女仔煩膠、天真、成績差、大頭蝦、

你好睇唔起佢。

但佢一直糾纏住你,話要做你女朋友,有一日佢以為你有女朋友或者偷聽到你好似有女朋友,

之後佢就消失左。

你就開始感覺到一種失落感,

個種失落就係你睇頭兩節無左我嘅感覺。

如果你咁硬頸係都要搞清楚個種感覺架話,咁就係惡作劇之吻嘅袁湘琴同江直樹或者交響情人夢嘅千秋王子同野田妹。

唔好剩係問人啦後生仔,學下自己搵答案。



到最後係我公佈身份之前,

請容我再佔用你多少少時間。

盡返責任同義務。

香城青年誌係一套超低配版嘅

《愛回家 開心速遞》。

無KC、無Teery、無大小姐、無送水輝、無安仔、無朱凌凌。乜優點都無曬嘅處境劇。

其實我根本唔洗提愛回家,處境喜劇黎。

如果你咁硬頸係都要追求起承轉合,角色轉變,主角,劇情主旨等等等架話。

我唯有推介你睇同一個作者嘅《桑法奧斯敘事詩》,個邊係比較認真嘅史詩級多線性群象劇。

不過更新速度唔及呢邊十分一,車尾燈都見唔到。

呢邊只係不平凡嘅日常故事。

會用無數嘅自語自言同廢話將你淹沒,

要走就趁家下,但如果你肯睇落去架話...

算啦,無謂強人所難。

聽住啦,

你呢個鍾意窺探其他人人生嘅小壞蛋。

我就係生田斗真級數嘅型男旁白,

我透過潛規則先換返份工同一節戲份。

最後奉勸大家一句,

只有堅持完整咁睇完一個故事嘅觀眾先會得到最多嘅收獲。



係作者諗到點寫嘅時候再見啦。

拜拜

(暫完)
已有 0 人追稿