[唔好講笑啦,你點會鍾意我啊]
紫彤講完就衝出咗班房。

狼人一副黑人問號.jpeg嘅樣,原本起哄緊嘅花生友都靜咗。

大佬呀,人地當眾表白喎,你仲覺得人講笑?人地似狼人啫,唔係似黃子華喎。我喺呢個寂靜嘅班房,望住一個個好似中哂魔咒嘅同學。唉,我都有幾分同情狼人嘅,始終咁7真係會比人笑到畢業。

我嗱嗱聲咁追咗出去。紫彤原來坐咗喺圖書館後面嘅涼亭(唔好問點解我地學校會有d咁嘅設施)

我坐咗喺紫彤隔離。我地嘅距離比起平時上堂嘅鄰座更加近。我連紫彤洗頭水嘅香味都聞到。



[俊傑,你覺得我咁樣對狼人會唔會好衰吖?]

[你突然當眾被表白,唔知點做都好正常嘅。]
心底話:大佬呀,人地咁認真表白,你就咁走咗去,梗係衰啦!!

[唉,其實我都係唔想親口拒絕佢啫,我怕hurt到佢。]

[都係嘅…….]
其實我想講,比人拒絕唔係最慘,而係連死因係咩都唔知先大鑊。呢種情況下先係最hurt個男仔。所以如果有絲打睇緊呢篇故而又被表白,記得千歧唔好好似紫彤咁。



[其實我真係好怕比好朋友表白,我對佢只係友情,而表咗白段關係就…….真係好煩呀!]

其實你想點呢?情侶梗係由好朋友做起㗎啦。除非你靚仔過劉華,就可以一見面即刻表白而成功啫。唉,我都唔識形容紫彤。

返到班房,狼人好似比人攝咗靈魂咁。咩表情都冇,嘢都冇講過。

[古有周瑜火燒連環船,今有狼人表白搭沉船]
小陳攞起唔知邊度搵嚟嘅扇,扮哂諸葛亮咁講。我都冇佢咁好氣。



[不過我初頭以為狼人會成功㗎,你知啦,佢同紫彤之前咁曖昧]
頂你個jack吖,成個8婆咁,人地都咁慘啦,仲講人是非。

[唉…..紫彤份人係咁㗎啦,對個個都曖曖昧昧咁。沉咗船,就等做下個狼人啦!]

小陳繼續發表佢嘅偉論,我望住狼人嘅背景,彷彿見到自己嘅未來。

<我不表白只是我太愛你而不想失去你>