一日復一日,距離考試嘅時間越嚟越少,班入面嘅氣氛越嚟越緊張。不過更加癡線嘅係,精英班嘅人開始喺小息,lunch time 溫書,課室就好似一個自修室咁。呢種氣氛正向其他班慢慢漫延。

一臉唔明嘅我,望住平時一齊吃喝玩樂嘅豬朋狗友都開始溫書,我都feel到有d 壓力啦。

[狼人,乜精英班d人好勁㗎咩?]

狼人同紫彤表白後,喺一次返學嘅過程中,我撞到狼人,之後就同佢fd咗。

[全級頭70嘅人喎,梗係勁啦。佢地嘅實力同我地差天共地㗎。就好似皇馬對南華咁,我地呢d放棄咗考試㗎啦]



狼人個樣都係未瞓醒。望住佢個頹樣,睇嚟佢晚晚都夜夜笙歌喎。其實我真係唔係好明,點解要分精英班,要標籤人呢。明明大家都係同一間學校嘅人,點解就係要階級呢

狼人喝住咖啡,好似個說書人咁開始講我地學校嘅故事

[喺培生中學嘅精英班入面。大家都係互相鬥争,由於佢地嘅實力相當接近,平均分亦咬得好緊,所以佢地嘅排名可以大起大落]

[但係喺呢堆人入面,有三個怪物般實力嘅人。佢地係我地嘅全級頭3。佢地3年嚟都係互相争緊頭3之位。]

[排第3嘅叫小新。唔好比佢個名呃到。佢最強嘅係背嘢嘅科目,咩history geog嗰d佢係輕鬆屈機。更有傳聞話佢有過目不忘,可以將成本書背哂,係文科嘅神人。]



狼人好似講緊唔知咩神話定動漫嘅劇情。只係我聽落好誇張,於是就問

[大佬,你當黑子的籃球咩…奇蹟世代呀?]

狼人聽完只係笑一笑又繼續講

[不過佢地又真係好似奇蹟世代咁,如果喺其他級就一定係全級第一。全級第二,佢叫計數機。佢對數學嘅熱愛程度堪比男仔對愛情動作篇嘅喜愛。 佢最大嘅特色就係,佢胸袋永遠會有一部hkeaa approved 嘅計數機。總括嚟講,佢係數理嘅天才。]

癡線㗎!? 究竟鍾意數學去到咩程度先會攞住部cal周圍走。我我又記起之前喺canteen見到有條友坐咗喺度不停㩒cal (非做數純㩒) 睇嚟一定係呢位數學魔人啦。



[不過如果講癲一定唔會夠全級第1癲。佢叫雅虎。真係搜尋引擎嗰個雅虎,因為你問佢d咩,佢基本上都答到你。最癡線嘅係佢係全能型勤力學霸。更加係連續3年嘅全級第1。所以你話,精英班有d咁嘅人喺度,我地呢d垃圾班嘅人唔灰就假啦]

[唔好傻啦~你點會係垃圾呢?]
我好誠懇咁望住狼人講,佢都以一個欣慰嘅眼神望返住我

[垃圾跌咗落地下,會升值到1500蚊,而你對腳掂到地下,係唔會升值㗎。所以點可以用垃圾嚟比喻自己呢?]

[妖!食屎啦你!]

不過其實我又唔明,呢班人試都冇試過,就話自己唔得,可能我地打贏到精英班呢。

[你地點可以未試過就放棄㗎!! 除咗你自己之外,冇人可以話你唔得,我唔信我地班嘅平均分會贏唔到精英班!]

[但係我地係全級最廢嗰班喎!]



[就好似李斯特城都可以攞英超冠軍,有咩係冇可能??!! 我要話比全級聽,我地F班係唔可以睇笑!!!]

由呢一日開始,F班正式向精英班"宣戰"。一場以學分決定勝負嘅鬥争即將爆發。



下一章精英班篇正式展開





PS 小弟嚟緊會有6日嘅學校交流團,不能更新,大家一個禮拜後見