呢度係天堂。因為交流團嘅原因,我去咗間日本私立女子高中參觀。

喺云云眾人中,我見到個貌美如花,溫柔爾雅嘅日本娃娃。正所謂:機會係留比有準備嘅人,我用前幾日學定嘅日文諗住溝通下佢。

我以一個自信嘅笑容走過去
[Kimi no line wa? (君のlineは)]

嗰個女仔微微一笑,攞出佢嘅電話。

突然,個地下係咁震。wtf? 唔係喺我抄緊牌先地震咁好彩嘛?



[快d行啦!快d啦!]

得啦,未行緊囉。 等等,點解呢把係把男人聲嘅!?

地下震得越嚟越勁,震到我頭暈眼花。到我再望清楚嘅時候,我發覺自己坐喺培生中學嘅3F班房,喺我前面嘅唔係咩日本娃娃,而係oscar係咁搖我。

[あの,你知唔知阻人瞓覺要燒春袋㗎?]

[唉呀,大佬你望下出面先啦]



班房出面嘅場面係筆墨難以形容嘅。門口聚集咗大概二三十人,有着喪屍對鮮血嘅熱情,眼神中帶着小朋友去動物園睇老虎嘅嗰種興奮

[Oscar,你養咗動物咩?定係成班人係嚟睇受保護動物--單身狗吖?]

[仲好講,未就係因為你同精英班宣戰,加上你身份咁特殊,所以佢地全部都係嚟睇你㗎。]

呢班人係咪癡線㗎?為咗咁少事而將我地成個班房包圍,唔講仲以為mk仔劈友。大佬呀,我連去個廁所都唔得。搵食啫,犯法吖? 我想㗎? 唉

呢個時候我見到紫彤好似悶悶不落咁嘅樣,於是我就行埋去同佢吹下水



[做咩紫彤小姐今日好似咁煩惱咁呀?睇下哥哥我可唔可以幫到你?]

紫彤反一反白眼
[本公主幾時做咗你細妹啊? 其實我冇同你講過,我之前都係精英班嘅人]

[以前喺精英班,佢地會鬥嚟鬥去。我真係覺得好大壓力。喺嗰度我一個真心朋友都冇吖!個個平時好似好關心你咁,實際上就喺背後講是非,仲要因為我成績差而成日比人笑。點解做人要做到咁假吖?點解就唔可以和平相處吖?]

紫彤越講越激動,對眼都紅哂。我攞咗張紙巾出嚟,再摸住佢個頭。

[傻妹,呢度未有一個真心朋友囉,精英班嘅嘢都過咗去啦,而家最重要嘅係考得好d。至於我,就喺今次考試入面輔助你啦,好唔好呀?阿妹]

紫彤扮哂嬲咁,不過最後都係忍唔到,笑咗出嚟

[衰人,邊個認做你個妹吖?]



喺呢個時候,課室嗰班遊客見到呢個場面,就好似發現新大陸咁,差在未攞部相機出嚟影相

[紫彤,我要你過咗呢次考試後,唔會再喺精英班d人面前抬唔起頭,所以一齊努力好唔好?]

紫彤比咗個肯定嘅點頭同笑容比我,我就穿過班遊容行出班房。我諗呢個應該係我有生以嚟最型嘅一刻。

目前為止我都好似好型,其實就驚到癲。老實講,我唔知紫彤嘅成嫌績差到邊個地步,亦都冇十足嘅把握。不不過我地呢d死mk又點會理後果吖? 做咗先,呢d未叫青春囉


其實型,真係要付出代價