唔知大家明唔明? 去party room玩梗係想同堆識嘅人玩,一齊happy 㗎啦。而我同嗰班精英班嘅人就好似喺地球幾億光年外嘅黑洞同跌咗入坑渠嘅硬幣一樣。。。一d關係都冇。


我嘅心情就好似大時代嘅恆生指數咁,跌到落谷底都唔識反彈。不過唔開心又可以點吖。妹妹即正義嘛。最後惟有打比家姐啦。

我 [喂,hiiii 可唔可以講一陣?]
姐 [一陣啦,我阿爸就嚟返嚟]

公式嘅開場白,但係多咗一份得我地先聽得明嘅熟悉感。因為聽到呢種嘅答話,就知係家姐



姐 [係啦。你派咗成績表未吖? 你全級第幾?]
我 [第5啊]

姐 [Yessssssss 我全級第三呀。 細佬,你記唔記得?~]

大鑊啦。我好似同家姐鬥成績。排名高d嗰個可以要求排名低d嗰個做一樣嘢。不過,家姐真係好癡線,藉恩中學係全港頭3嘅女校,而佢喺入面考全級第3,真係不敢想像。

[哈哈哈哈哈哈~] 電話傳來一陣瘋狂嘅奸笑
[我嘅好細佬聽命,喺呢個禮拜,你要同我一齊去party room,不得有誤,欽此。]



[但係……紫彤呢個禮拜約咗我去party room喎…..]

號外號外~男子組100米高台花式自殺比賽,一號選手已經準備就緒

家姐停咗一陣,再講嘢嘅時候連把聲都變埋,本來嘅興奮都消失得無影無蹤,係咪我做錯咗d咩呢?

[又係紫彤……點解又係佢㗎……]

[家姐吖,對唔住啊,唔好唔開心啦,最多我下次陪你一齊去啦]



家姐明顯依然難掩失落之情,把聲仲好似有d沙啞。

[好啦咁,我地下次再約啦]

傾完電話就瞓個大覺啦。錯! 我罕有地幫手搵party room。花咗我可以打到兩三鋪LOL嘅時間,最後我揀咗間喺觀塘嘅party room。 雖然我地冇人住嗰度附近,不過我睇中咗一間叫做Princess room 嘅房。成間房以粉色設計,仲有張大嘅公主床,希望啱紫彤呢個妹妹公主嘅心意啦

至於同行嘅四個人係咩人我當然事前問咗啦。

第一位係琛琛。佢算係喺精英班入面最好人嗰位。全級都冇人憎佢,係一個永遠都會帶住笑容嘅女仔。如果要r fd 相信 r 佢就應該冇死

第二位係黑人羅志祥。愛好戶愛活動同背心(曬肌肉)嘅佢練成一身喺黑夜獨有嘅保護色。然而本人話自己同羅志祥有幾分相似,因而自稱羅志祥。anyway 佢地兩個除咗都有眼耳口鼻之外就真係搵唔到共通點啦。不過份人算係幾玩得,都係r 得之人

第三位係女冰山(美人)。 被稱為我地培生最強嘅女神,唔少男仔都拜倒佢石榴裙下。

你問我佢同紫彤邊個靚d? 咁梗係紫彤啦。 紫彤係主角喎咁梗係紫彤靚d啦



咁曉晴同紫彤邊個靚d? 嗯,如果大家仲想睇埋個故事落去嘅就唔好問啦。

第四位係男冰山。據紫彤所講係一個天才? 天才都係唔受世俗嘅眼光嘅,我地呢d凡夫俗子更加唔明佢諗乜。所以我都唔知佢係點啦。

就係咁,試後嘅6人party room 就此展開











嘻嘻…你係咪漏咗第7個?