炒熱氣氛嘅工作又落喺羅志祥身上,冇計啦畢竟呢d嘢佢做慣做熟。

[既然我地而家咁多人,不如我地玩揭尾故啦~]

羅志祥講完仲同我單一單眼。我地7個坐喺張床,你仲玩揭尾故點會唔知你想點吖。不過,總好過dead air嘅。更瘋狂嘅係,羅志祥話要有氣氛,連燈都熄埋。

[喺一個月黑風高嘅晚上,一價載住一對夫妻嘅私家車喺公路度死咗火。喺呢個時候,有廣播話有附近有逃犯出沒。然後嗰對夫妻就死咗點解?]

[好恐怖呀~]



[救命呀~]

我感覺到左手邊有人掂我。我嚇一嚇,原來係家姐撬住我隻手。喺暗黑嘅燈光下,隱若見到佢瞇埋對眼,雙手纏住我手臂,可愛度100

一把餐刀飛埋嚟,我以打LOL閃現嘅速度避開咗。坐我對面嘅紫彤瞪大對眼,就算喺漆黑中依然見到到佢想殺人嘅目光。我突然覺得自己好快可以變下一個揭尾故嘅主角。

[係咪同個逃犯有關?] 坐我隔離嘅琛琛問

[係]



[咁一定係因為個老公有第二個,於是乎吃醋。喺聽到有逃犯出沒就殺死老公,再偽裝成係逃犯殺嘅,之後因為太愛佢老公,於是自殺。]

紫彤講呢段嘢嘅時候仲要全程望實我。我真係覺得個party room比起個揭尾故更加恐怖。同時,我感覺到曉晴撬住我隻手嘅力越嚟越大,睇嚟我離死亡亦都越嚟越近

[係因為個老公落咗車整車,喺落車前仲叫個老婆無論如何都唔好開門。之後,個老婆見到老公返嚟車窗邊就開咗門,但係佢見到嘅其實係比只係逃返攞住嘅人頭,於是乎逃犯將個老婆殺埋]

係呀,其實我知答案。原本諗住大家玩下,但係眼見有生命危險,咁就提早結束呢個環節啦

[好恐怖呀~]
家姐聽完一嘢攬落我度,仲係好實嗰隻。佢仲將自己個頭貼住我心口,成個細路女咁。呢個越軌嘅行為,令琛琛同羅志祥以一個不解嘅眼神望住我地,紫彤就。。。手執三把刀



好彩,家姐攬咗一陣都自動話去一去廁所冷靜下,因此,我地個party room可以迎來短暫嘅平靜。

我隔離個位空咗,紫彤就一個飛身,撲咗落我隔離,仲怒bea住我,唉,睇嚟今次我都係九死一生

[個故好感動吖可?]
Wtf? 感動? What kind of question is this?
[係呀,幾啦]

紫彤對眼即時好似識發光咁
[咁如果我係當時落咗車嗰個人,同樣情況下你會唔會開門比我?]

召喚~金翅PK鳥~
點答呀?正常都會答唔開,佢就話你唔在意佢,跟住嬲。你話會,佢又話你傻同on9,跟住嬲。
跟即係要點答呀?好難觸摸呀!



[咁就小弟嘅觀察力而言呢,你問緊嘅明顯係兩難題嚟嘅。咁根據通識堂miss lo所教嘅兩難題目作答技巧呢,我地首先需要列雙方選項嘅優點同缺點……..]

紫彤聽完仲嬲,一嘢哄埋嚟,我地雙唇嘅距離不足1cm,呢個距離令我即時停止廢話。
[陳俊傑,你唔好同我玩嘢,一句,開定唔開?]

喺呢個生死時刻,我捉住佢膊頭,用最誠懇嘅語氣同佢講
[傻妹嚟嘅,喺呢個情況下,我點會比你冒險呢?所以落車嗰個一定係我]

紫彤即刻紅都面哂,雙眼含情脈脈咁望住我。所以話,女人都係抗拒唔到甜言蜜語嘅

[Wooot 好閃呀]

[拍拖啦]



[結婚啦]

我同紫彤對望嘅時間好似真係成個世界停頓咗,直至…….

[我返嚟啦!!咦…點解?我個位比紫彤坐咗嘅…….]