[哇~你地兩個?]

[又話表妹嘅?]

羅志祥一臉唔明咁望住我同曉晴。其實全部人好似得佢一個信我同曉晴真係表妹啫

[冇吖,因為我地細個都會成日攬住瞓,所以慣咗,哈哈~]

Wtf? 我喺度講緊d咩?



[喔~原來係咁。]

羅志祥竟然信

不過紫彤就黑哂面,睇嚟今晚真係有排解話。其實我同曉晴真係姊弟啫,希望紫彤會明啦。

[Woot,咁你地兩個應該唔係第一次唱K啦]

[係呀!我地之前仲試過兩個人去k房,又試過一齊影貼紙相,而家張相應該仲喺俊傑個筆袋度。哈哈,諗返嗰次真係好開心……]



今鋪大檸樂啦。經曉晴咁講一講,冇嘢都變有嘢啦。加上佢係咁強調兩個人,我有理由相信我會係2016年嘅屈原

紫彤塊面。哈哈,一路向西啦,佢突然拉走咗我,去咗大廳

[其實你係咪同曉晴有嘢?]

[日月為鑑,天地為證,我地冇嘢]

[咁佢係咪鍾意你吖?]



[癡線,佢點會睇得我上眼吖。況且你自己都識講,太熟係做唔到男女朋友嘛]

面對住紫彤嘅連環快問,我真係有d唞唔到氣,不過,我即刻醒起我都有嘢應該要問。

[不過我想問,其實就算我同曉晴一齊又關你咩事呢?]

紫彤即刻停咗一停。O住個嘴咁望住我,我又學佢咁O住個嘴望返佢。外人睇就係兩個O住嘴嘅人互望

[咁…..咁關心哥哥嘅感情事都係妹妹嘅責任嘛,我都想知未來大嫂係點嘅]

哦~呢個妹妹真係唔話得
不過紫彤又繼續講

[不過我唔鍾意曉晴]



[哈?點解吖?]

[唔知吖!總之唔得]

[咁琛琛呢?]

[唔好]

之後我噏咗廿個女仔名倒,佢全部都話唔得

[咁邊個先得呀?]

[紫彤囉]

我愕然咁望住佢。



[講笑咋傻佬,我地入返去啦]

我地一入嚟,佢地就好似全部dead哂air咁。你眼望我眼,老尷到不得了

[時間都唔早啦,我要走先啦]

紫彤無啦啦爆咗一句。

於是乎,紫彤提早走,加上琛琛同羅志祥又有下場,男冰山又話有嘢做,個party因此都提早結束,剩返我同曉晴兩個。

[俊傑吖,其實呢有個地方離呢度好近,大約5至10分鐘到,我想你同我一齊去吖,得唔得呀~]

咁時間尚早,又未嘗不可嘅。不過觀塘嘅路面真係好熱,加上路邊嘅重型車廢氣,真係將觀塘變成人間焗爐。



行咗10分鐘,我地好似去到世外桃源。一片綠化
帶,兩旁嘅路種滿樹。路嘅周圍仲有長凳比途人休息。我同曉晴坐喺度,我先發覺呢度嘅長凳只係for兩個人坐。

[呢度係觀塘海濱,算係觀塘嘅世外桃源,都係情侶勝地]

話口未完,又一對情侶喺度放閃。不過係一對老夫老妻,互相依偎著,一同欣賞著天空上嘅夕陽。

喺香港,d人成日話咩要有樓,有錢先叫幸福,其實喺你人生嘅黃昏,有個同你守候咗半世嘅人相伴。就算環境幾差佢都肯同你一齊捱,計我話呢種簡單先係真正嘅幸福

曉晴望住呢對老夫老妻雙眼發光。平常嘅情侶就好似正午嘅太陽咁,耀眼同令人難以直視,但係佢地就好似夕陽咁,平和而令人賞心悅目

曉晴突然問我

[俊傑啊?你覺得我地有冇機會可以好似佢地咁?]



曉晴嘅眼神有十分認真,直視住我



<有時我想忘掉姊弟的身份,以情侶的身份同諧共老>