[但…但係我地係姊弟喎。不過你放心啦,無論你變成點,你永遠都係我最重視嘅家姐]

我開始唔係好聽得明曉晴講緊咩,不過我都照講我嘅心底話啦。

曉晴合埋雙眼,深嘆一口氣

[唔係呀,我講緊我地以男女朋友身份同諧共老]

曉晴講得好平靜,但係我就完全不知所措。佢而家究竟算唔算表白呢?我差d想喺電話入面召喚siri出嚟幫我解答,不過作為一個負責任嘅人,我點都係要答嘅



[我唔係好明你講緊d咩呀?]

係咁㗎啦。我盡咗力㗎啦。唔係可以點答?個情況咁cringe。

曉晴捉住我隻手,由於我個腦容量比突如其來嘅爆炸性資訊逼爆咗,所以我基本上對外來刺激係0反應

[陳俊傑,你份人好唔認真又成日要人擔心。不過點都好,我好希望你可以認真一次聽我以下落嚟呢段說話,因為我係鼓起好大勇氣先講得出口嘅]

[你份人又夜瞓,病咗又要死頂,淨係識得令人擔心。最鍾意就上堂打機同瞓覺。樣又唔係特別靚仔,又唔明白女仔心入面諗乜,成日講埋哂d低能爛gag,懶係幽默風趣,其實份人臭串兼自大,又唔識主動關心人,淨係掛住自己緊張嘅人]



[但係我就係鍾意咗一個咁樣嘅你。我都唔知點解,就算我地係網上識都好,你都係可以比到一種好安心嘅感覺我,令我可以咩都同你講。你曾經喺我地識嘅第一個禮拜講過,如果我地係兄妹就好啦,但係我心入面好慶幸我地唔係兄妹,因為咁樣,我先可以名正言順同你一齊]

[其實你知唔知你令我傷心過幾多次,我又有幾多次自己喺屋企喊到傻咗,再喺你面前扮冇事。每次我同親你唱k,影貼紙相嘅時候,我都會覺得同你嘅距離近咗。但係你總係比完希望我,就即刻打沉我。喺你眼中,你永遠只會見到紫彤嘅好,只會提及紫彤。一次吖,可唔可以比我贏返一次。就算係一次都好,我都想你喺佢面前提起我,而唔係喺我面前提起佢吖]

[我有試過叫自己放棄,撮合你同紫彤。不過我真係好唔甘心吖,紫彤為你做過d咩呀?但係你對佢就仆心仆命。我呢?我為你做咁多嘢,但係你一直都只係當我家姐。其實我最大心願就係想你用一個望住情人嘅眼神望住我,我就已經心滿意足㗎啦…]

[我……我好辛苦吖!一方面我想逼自己放低你,但係每次同你出街我就好想再進一步再進一步。其實,我呢份人好簡單,真係……真係冇咩想要。我只係….只係好想你可以陪住我,以我男朋友嘅身份,可以白頭到老。老咗嘅時候同自己嘅仔女分享我地而家嘅往事,我只係想同你過簡單而幸福嘅生活]

[你答我啦......雖然我未必係你理想中嘅女朋友,但係我可以改㗎。你…你以後講咩我都聽㗎,所以,我真係好好好好好想你可以應承…..]



[陳俊傑!你可唔可以應承我,做我男朋友?]

曉晴哭成淚人。曉晴不嬲都係一d好樂觀同開朗嘅女仔,見到佢喊成咁,我完全唔識反應,更加冇諗過佢個心原來係咁諗。我將眼前嘅曉晴收入懷中。我仍然能夠感受到佢喺我懷中掙扎同缺堤湧出嘅淚水。