{時間去返party room嗰日}

{以下事件皆為曉晴角度}

我冇諗過自己竟然會夠膽咁樣同俊傑表白,更加冇諗過叫佢幾個月都唔好搵我。可能真係太耐啦,連我都覺得係時候放手,先會咁講掛

觀塘碼頭,一個我呢一世都唔會忘記嘅地方。我沿住海濱大道一直行,不停見到嘅係恩愛嘅情侶。我同俊傑應該係有一個咁嘅結局㗎,不過,時不我予,錯失咗兩人最美好嘅時光,再回想都係徒然嘅。

我係一個唔係好識表達自己情緒嘅人。即使係呢種情況,我喺學校只會專心做嘢,以工作麻痹自己。



唉…唔好再講佢,我嘅目標係要忘記佢!

為咗令自己分心,我打開音樂軟件,插上耳機

[小酒窩長睫毛是你最美的記號 我每天睡不著想念你的微笑]

我好似去返party room嗰日咁,我望到自己同俊傑瞓喺同一張床度,互相曖昧咁對望住。見住自己慢慢咁挨落俊傑度,而佢又好溫柔咁攬住我

點解…點解我地個結局唔係咁?



為咗防止自己再胡思亂想,我即刻拔出我嘅耳機。我同自己講:無事嘅無事嘅,一切都過咗去,係時候要放低

為咗令自己分心,我提早一個月溫習我嘅考試。我一攞筆出嚟,就見到筆袋入面同俊傑嘅合照。

我腦入面響起兩把聲
[嗱,呢度就叫貼紙相店,你見到一部部嘅就係貼紙相機。我地入去影相就可以喺將相加效果,影完出嚟勁靚勁有記念價值㗎!]

[噢…但係唔係咩閨蜜或者情侶先會影㗎咩?]

唔好吵呀!唔好吵呀!



我又聽到一把阿姨嘅聲音
[仲有啊,第時你兩個一齊咗,記得返嚟搵阿姨,再拍多輯貼紙相吖]

點解呀…俊傑…我地可以再去影貼紙相㗎,只要你應承我,其實一切就會好㗎啦

可能啦。我真係忘記唔到佢,我打開咗IG,望住我地以前喺snapchat儲嘅粉紅心,生日嘅千字文。或者,我得返呢d嘢,得呢d嘢係屬於我地兩個之間嘅回憶。

將俊傑個IG由頭碌到落尾再碌返上頭,成為咗我每晚嘅例行工作。

咦,今日有人tag咗佢,係一個叫Adrianna嘅女仔喺小巴上攬住俊傑影嘅,乜佢地好熟㗎咩?

呢張相嘅出現,令我心煩意亂。冇理由㗎,俊傑應該好唔開心,而好快就會搵返我,到最後佢一定會選擇我。因為我係最了解佢嘅人,根本冇人會比得上我

過咗幾日,呢個adrianna 又tag佢。但係…但係呢張竟然係佢同俊傑喺snapchat儲心嘅相…..



冇可能㗎。俊傑只會同我儲心㗎咋。況且,我同俊傑識咗咁耐,呢個adrianna同俊傑熟嘅時間一定冇我咁長,佢點會比得上我!

一日復一日,adrianna喺俊傑個IG出現嘅頻率愈嚟愈高,但係俊傑喺我嘅離開後一個頹po都冇開過,莫非佢真係咁唔在意我?

就連其他女仔都開始出現喺佢嘅Ig度,冇可能㗎。

冇可能㗎……冇可能㗎!!我…我竟然失去咗喺俊傑心入面嘅位置

而家嘅我對於俊傑嚟講邊個都唔係,甚至連朋友都算唔上啦。我真係冇諗過,原來一直以嚟,係我高估咗自己,高估咗同俊傑嘅關係

突然有把聲喺我個腦同我講

[其實點解你要對人咁好?]



[點解你成日都淨係識為人地著想?]

[你望下自己,最後得到d咩?]

我好辛苦呀! 我真係好唔甘心,點解俊傑會唔選擇我,仲要比個唔知熟咗幾多日嘅adrianna取代咗我嘅位置。明明一直陪住俊傑嘅係我。

不過唔甘心又有咩用呀? 我攞起電話,撥咗一個唔多熟嘅號碼

[喂,紫彤,有d嘢想問你,係關於adrianna嘅]