根據我喺船上搵到嘅資料,對於未食嘢嘅我同琛琛,最吸引眼球嘅當然係長洲大魚蛋

落船後,烈日當空下,行咗15分鐘總算搵到。不過其實只係一個XL嘅魚蛋,特色我就食唔出啦

我地漫無目的咁行,見到有座廟類物體(後來我先知係關帝廟),就入咗去睇。

廟嘅中間有座好大嘅關帝像,旁邊就有個籤筒,出於好奇我就求咗支。

喺廟近門口嗰邊,坐住一個頭髮花白,歷盡滄桑,但係眼神又充滿生氣嘅叔叔。根據小弟嘅估計,佢應該就係傳說中嘅解籤叔叔。我戰戰兢兢咁攞咗支籤比佢,可能係佢閱人無數嘅關係,近睇佢嘅眼神,十足一個洞悉一切嘅智者。



[問咩㗎?]

我諗咗一諗,我而家仲係學生,成績都算過得去啦,咁無謂問事業啦。

[問姻緣嘅]

解籤叔叔眉頭一戚,眼光望向琛琛
[咁呢位係?]

[哦,我係佢普通朋友,唔係佢d後宮成員]


琛琛即刻回應。雖然佢後半句講得特別細聲,不過我都聽到,反射動作即時對佢反白眼

[第七十八號籤,有人開鑿昆山玉,雖不勞心亦損身,力不負人人負力,一朝得寶值千金]

解籤叔叔神色凝重,令我開始心跳加速

[意思話,你喺搵姻緣嘅道路會好辛苦,亦都會好崎嶇,不過如果你追得到佢嘅話,咁你之前所付出嘅努力都係值得嘅]

我微微皺一皺眉頭,呢支籤真係好玄,我真係唔係好明。我望一望琛琛,佢都一個黑人問號嘅樣望返住我,睇嚟我要再問落去



[咁,其實支籤算係好定唔好呢?]

解籤叔叔直視住我

[即係話,最適合你嘅人一早就已經出現咗,不過同時都要小心選擇,因為一選擇錯,就可能會行多好多冤枉路。最好就留意下身邊有冇d同你一直都好曖昧嘅人,如果有鍾意嘅人就堅持多陣啦,可能好快就得米,咁你一直以嚟嘅付出都係值得嘅]

我個腦立即搜尋邊個一直都喺我身邊,好快地,我心入面已經有答案

[呀!咁未即係紫彤]

琛琛好大聲咁叫咗出嚟,解籤叔叔就好似諸葛亮上身咁笑,一副”我都話㗎啦”嘅樣。

我謝過解籤叔叔後,就懷著感恩嘅心離開咗北帝廟

[哇,估唔到解籤真係咁準]


琛琛好似一個小朋友咁跳下跳下。順帶一提,琛琛係一個好虔誠嘅基督教徒,對於求籤呢d佢本身係完全唔信嘅,經過今次嘅經歷,佢都有少少大開眼界嘅感覺。

[莫非你真係注定同紫彤有緣]

[阿叔我就唔信咩有緣冇緣嘅]

我口雖然咁講,不過聽到自己應該同紫彤有機,唔多唔少都會暗爽嘅

[喂~你唔好自己暗爽啦,你都要陪我行長洲啊]

哈哈,原來我望住支籤,不禁嘴角上揚, 口水都差d滴出嚟

不得不提,長洲有好多地點都好靚。我地亂咁行,行咗去東灣。琛琛一見到海灘就蹦蹦跳跳,仲好似小朋友咗玩水。我隨手攞咁部手機(冇相機),張呢一刻捕捉。用現代術語嚟講,呢張係一張文青相

琛琛見到張相非常興奮,仲用我部手機po上IG



及後,我地行入燈光昏暗嘅橫街窄巷,小店林立。幸運地,我地見識到喺繁華背後嘅長洲,仍保留住一點樸素漁村嘅味道

我同琛琛感受住喺城市搵唔到嘅悠閒,喺呢度,真係可以令你嘅憂慮都暫時忘卻

當然,時間係唔會慢落嚟嘅,好快我地就要告別呢個多樣嘅小島。我同琛琛喺頭等船嘅甲板欣賞住小島最後嘅風光。呢個時候,電話響起,將我由人間仙景拉回現實