[喂呀~陳俊傑]

[嗯?]

話就話五月係初中嘅尾聲,不過高中同初中有分別咩?我亦唔會因此而改變自己。由學期初開始,我一攤就攤咗喺張枱度成年

[我地好似好耐冇去過唱k啦]

[woot想約我,又唔直接講]



[咿~唔同你講嘢啦,蝦人嘅]

呢d就係我同adrianna嘅日常對話。其實都冇咩值得好講,畢竟呢3個月,我地都係咁講嘢。根本就習以為常,甚至連當初會起哄嘅同學,而家都唔再炒作我地做優質花生

喺某一日嘅中午,我同狼人單獨食飯

[狼人呀,我有d嘢想請教下你意見㗎]
[請講]

狼人專心咁捲緊佢兜意粉



[我想同adrianna表白]

狼人差d將佢口入面啖意粉噴落我塊面到

[唔X係呀嘛!Adrianna喎!你唔係鍾意紫彤咩?]

狼人好似好激動,雙眼仲瞪到大一大,面上展現出難以置信嘅表情

[其實我同adrianna成日咁曖昧,講嘅嘢都已經唔似一般朋友。咁樣曖昧落去,我覺得好似有少少對adrianna唔住,咁作為一個男人,我都好應該比個名分佢嘅]



狼人一時無言以對,又沉思咗一陣。我嘅心情亦都緊張起上嚟。因為狼人同adrianna都算好熟,有佢嘅支持,我同adrianna嘅事就會更加順利

[咁…你都講到咁,我邊有得駁啫?不過,無論你最後點選擇,我都會幫你嘅]

得到狼人嘅支持,我嘅信心大增。以我而家同Adrianna嘅關係,我又唔覺得會有失敗嘅可能,哈哈

[不過我都係盡幫㗎咋,如果唔得都冇辦法]

狼人真係有趣,竟然呢個時候帶頭盔。不過,佢肯幫我,我仲想點吖?

如是者,每日嘅放學我同狼人都會聚埋一齊傾表白大計。

到咗表白前夕,我決定通知紫彤。即使我地而家已經唔算熟,但係佢始終都係我妹妹,唔通知好似好衰咁



我撥通喺我通訊錄封塵嘅電話號碼

[喂紫彤]

[俊傑?咩事吖?]

[冇呀,想同你講你過多幾日可能會多咗個阿嫂]

[吓~邊個吖?我識唔識㗎?]

紫彤喺電話把聲十分雀躍,可以聯想到電話另一旁嘅佢,難掩興奮嘅樣。

[哈哈,未Adrianna囉,仲有邊個吖?]

電話另一旁突然間靜哂,我仲即刻睇下係咪斷咗線



[佢鍾意你咩?]

紫彤把聲變到冷冰冰,同佢頭先興奮嘅聲線形成強烈嘅對比,佢而家冷漠嘅語氣令我寒到入心

[應該掛,哈哈。咁佢平時都咁樣啦。又唔見你平時會好似佢咁同我咁曖昧?所以我覺得應該唔會失敗掛?]

紫彤冷笑咗一聲。唔知點解,我硬係覺得呢個紫彤同我認識嘅好唔同

[哈!咁祝你好運]

同紫彤講完電話後,強烈嘅不安感油然而生。佢嘅語氣,好似帶著嘲諷,使我不寒而慄。

不過要做嘅始終都係要做,約好咗狼人,狼人嫂同Adrianna去唱k。我同狼人嘅計畫十分簡單。就係事先佈置k房,之後再接adrianna同狼人嫂。一入到k房,我就會即刻唱我的宣言,然後表白。



方法雖然有d老套,但係簡單而有效。加上我成曰覺得,一個女仔鍾意你,你就算用whapsapp表白,佢都會接受。而一個唔鍾意你嘅女仔,你就算喺太空表白都係冇用。簡單d嚟講,表白形式並不影響結果,呢個係我嘅信念

去到表白嘅前一晚,雖然係第一次表白,不過都係平常心啦。

突然我電話響起短訊

係一個新開嘅IG account direct 我

內容得3個字

[ 王 嘉 豪 :) ]

一個唔識嘅人,比一段你睇唔明嘅嘢你睇,當然好鬼死恐怖。

當然啦,網上充斥屁孩,玩電話嘅事時有發生,我亦當然唔會擺在心上



係就係有少少不安,不過總算勉強喺三點前瞓著