[間房最好就佈置成粉紅色,吖都係唔好,adrianna鍾意湖水藍色嘅]

我同狼人喺正式唱k前一早訂咗間房。有義氣嘅佢陪我早3個鐘嚟到,一齊佈置k房

[如果我陣間成功咗,今晚嗰餐我嘅]

我一邊佈置一邊幻想住陣間成功咗嘅情景,狼人只好無奈咁白眼我。

[咁如果你失敗咗呢?打算點做]



癡線,狼人竟然喺呢個時候講d咁嘅嘢,真係掃興

[冇諗過,因為真係冇可應失敗。佢同我平時都咁曖昧,你話佢對我冇feel我都唔信啦]

話口未完,電話就傳嚟Adrianna嘅訊息,我嘴角亦不自覺地向上揚,狼人見到我咁,就喺度搖頭嘆氣

[你擰咩頭呢?你自己都有狼人嫂啦,仲成日放閃,不過你地當初係點一齊㗎?]

狼人笑咗一笑,就就開始回想佢嘅往事



[想當年···]

[未又係大半年前…]

[你聽故就唔好吵啦。大半年前,我同紫彤表白後,得到嘅結果係死因不明。當然,唔開心就梗有嘅,不過自問又唔係好鍾意紫彤,所以我嘅日常生活都係咁過]

[而狼人嫂其實就一早識嘅,並唔係同紫彤表白失敗所以先熟。我啱啱識佢嗰陣,仲以為佢係一個好文靜,唔多出聲嘅女仔。不過熟咗,就發覺佢原來都好玩得。我地好快就變咗daily chatter,snapchat草心,日日都可以傾一餐]

我聽到呢度,又忍唔住要打斷佢



[咦,我同Adrianna都係咁喎,咁今日真係好高機率成功啦,哈哈哈哈哈]

我陷入瘋狂嘅自high當中,狼人冇我咁好氣,繼續講埋落去

[咁又點同呢?記得有一次,我病得好重,病到連倒杯水嘅力都冇。我瞓咗喺張床度,咩都做唔到,只係知道好辛苦。呢個時候,狼人嫂就打嚟。因為佢屋企嘅關係,佢唔可以出街。但係佢就同我視像通話,隔住部電話陪住我。可能就係嗰次啦,就令我真正對佢心動]

咁我諗諗下,Adrianna又好似真係冇咁對過我。我同Adrianna最多都係傾一d無聊嘢,態度係曖昧咗少少,不過又好似冇咩深層話題

狼人見到我成日人呆哂,就覺得自己好似講錯嘢咁

[算啦。無論結果係點,我地都要繼續啦。都佈置得七七八八,唔通而家先嚟縮沙咩?]

咁又係嘅,我唯有繼續專注眼前,同祈求一陣間一切順利

好快就到咗約定嘅時間。我喺廁所再從新執過自己個造型,確保萬無一失。



有人推開k房房門,我保持微笑,當正自己選香港先生一樣

狼人嫂首先行咗入嚟,然後閂咗門

[咦,狼人嫂,Adrianna唔係同你一齊嚟咩?]

狼人嫂望到我地佈置到粉藍色嘅k房同周圍嘅裝飾,唞咗啖大氣

[Adrianna佢…佢今日應該唔會嚟]

WTF!!?? 我完全唔敢相信我隻耳仔。佢唔嚟?點會吖?佢應承咗會嚟㗎喎?

我成個人呆咗,個腦一片空白。而家完全係我意料之外嘅情況。狼人嫂面有難色咁,我再望一望狼人,佢面上冇絲毫嘅驚訝。佢嘅冷靜同我形成強烈嘅對比,從佢表情估計,睇嚟佢一早知Adrianna唔會嚟



狼人望住狼人嫂,好平淡咁講咗一句

[正常吖]

原來局外人嗰個由此至終都係我