我本身喺條街度行緊,我聽到嚇到呆咗,以為自己聽錯。仲記得,有人講過,紫彤從來都唔年同男仔單獨出街,所以我聽到即刻成個人企咗喺條街道,比人撞到差d仆低

[你講多次?]

我叫紫彤再講多次,確保自己冇聽錯

[我話,不如搵日淨係我地兩個人出街呀,傻佬!]

冇錯,的確係紫彤把聲,我久久都不能夠反應



[你唔好誤會呀~我唔係想同你單獨出街㗎,係見你啱啱表白失敗咁慘,所以先嚟安慰你]

紫彤見我冇回應,即刻咁講。其實無論咩理由,呢個妹妹肯睬返我,我已經無欲無求,更加恨不得即刻去馬會買轉六合彩

[咁妹妹大人想去邊呢?]

我好奇一問

[我想去男喇拔]



嗱,唔好誤會。呢句唔係我講嘅。係紫彤自己主動要求去。呢個妹妹語出驚人,我都唔識比任何反應

[睇你個樣應該都好耐冇返過去啦,咁就當係你返去探老師同朋友,而我,哈!就當係陪你一齊啦]

紫彤好似好期待咁,而我其實就唔係咁想嘅

咁你都知啦。男校喎。佢地dry嘅程度簡直媲美發生旱災時嘅埃塞俄比亞。就當如一班餓咗十幾年嘅狼,突然有獵物經過,你估下會發生咩事?

[吓?返男校吖,你怕唔怕呀?]



我憂心咁問

[唔怕,有你喺度吖嘛]

紫彤咁樣回應。喺佢呢句短短嘅句子入面,充分表現出佢對我嘅信任,咁作為一個負責任嘅哥哥,我又點可以令佢失望呢?

於是乎,我地就決定咗一齊返男喇拔


今日總算係我呢個禮拜以嚟,最值得高興嘅一日。我返到屋企,即刻剃掉因為唔想打理而留嘅鬚,用梳好好將自己嘅髮形從新整理。我一邊幫自己重整儀容,一邊幻想住同紫彤返男喇拔嘅情景。

對於近呢個月,難得嘅一場好事,我係千萬分嘅期待

我又憶起自己曾經多次約紫彤出街都係失敗收場,今次竟然由紫彤邀約,更使我興奮



呢個時候我電話嘅訊息通知響起

竟然係IG嘅奇怪陌生帳戶

呢個 ”剛出生的紅太陽” 又再一次傳送訊息比我

[ 伍 朗 軒 :] ]

我激動到差d想將部電話扔爛

上次我準備同Adrianna表白前夕,呢個 “剛出生的紅太陽” 就傳送王嘉豪比我,結果我就嘅表白徹底失敗咗

今次我準備同紫彤一齊返男喇拔,又收到 ”紅太陽” 嘅短訊,我真係唔想連唯一嘅好事都失去

我半崩潰半憤怒咁凝視住部電話。我真係十分討厭又出現不確定因素,而最重要嘅,我根本咩都做唔到。



我諗咗一陣,決定回覆呢個 “紅太陽”

[你究竟係邊個?]

“紅太陽” 已經讀取咗我嘅訊息,但係就一d反應都冇。由於我實在過度不安,我攞住部電話等待 “紅太陽” 嘅回覆

十點

十二點

兩點

四點



六點

結果, “紅太陽” 冇回覆過我嘅信息,而我亦白等咗一整晚

我無力地望向鏡入面嘅自己。鏡中,黑眼圈,紅筋暴現

相信,再咁落去,我離陷入瘋狂嘅日子不遠





<要令一個人完全崩潰,先給予他希望,再在他面前把僅餘的希望也抹殺掉>