[男喇拔喎,紫彤係女仔,點都唔可以話佢係舊生,而比佢入]

我其中一個老死冷靜地分析,的確,呢個問題我都有諗過

[咁我係俊傑個妹喎]

紫彤鼓起雙頰,仲即刻翹住我手臂

我嗰兩位老死即刻做出誇張嘅表情同掩住雙眼



[單身加受到十萬點光屬性能量傷害!!]

佢地大叫。紫彤就莞爾一笑。佢嘅笑容真係百看不厭,所以我成日都話,笑嘅女仔係最靚嘅

[咁我話佢陪哥哥未得囉]

我介紹道。況且我地係返小學,嗰邊嘅保安冇咁嚴,我又唔算話好擔心

我兩位老死比咗個加油手勢我地就賣單走咗。由於中學部嗰篇啱啱考緊試,因此佢地陪我地食飯,已經係十分難得



相反,我同紫彤一d都唔趕時間。就慢慢從商場行去男喇拔

[你頭先嗰兩個朋友真係好有趣,仲好似咩都傾得咁]

紫彤睇落好開心,連對眼都好似識笑咁。當然我唔會同紫彤講,其實嗰兩位老死因為我成曰提起,而對紫彤十分熟悉。

好快地,我地行到男喇拔小學嘅大門。男喇拔嘅大門係車輛出入口,旁邊一個保安亭負責監察有冇陌生人進有

我同紫彤喺一旁等待嗰個保安叔叔檢查車輛嘅時候,衝咗入去。我地好順利地,就潛入咗男喇拔。身旁嘅紫彤氣喘咻咻,但依然冒出個勝利嘅笑容



[你地兩個喺度做咩?]

我同紫彤喺男喇拔小學嘅大堂,從我地嘅背後傳來一把女聲。我不慌不忙地轉身

[王副校,好耐冇見啦]

我微笑道。畢竟讀咗6年,從佢把聲就能判斷係邊位老師

[俊傑?好耐冇見啦!今日做咩無啦啦返嚟嘅?快d上7樓,見班老師啦]

王副校表現出十分驚喜,同時我都好驚奇佢竟然仲記得我。而我地嘅教員室係為於7樓。於是我點一點頭,就一齊上7樓見一眾老師

王副校似乎亦察覺到我身邊多咗個人,疑惑地望住我,問

[呢位係?]



[ehhh 呢個係我表妹]

我停咗半秒後答

點解要諗,因為我重來冇提及過有個阿妹,再加上我地同年,唔同月份,話係兄妹就實在太唔可信啦

[係呀係呀!我叫做紫彤,係俊傑嘅表妹,請多多指教]

紫彤喺一旁附和,王副校亦因此冇再懷疑

好快地,我地上到嚟7樓

我嘅班主任,中英文老師,聽到我返嚟,都出嚟同我地吹水



當然佢地嘅目光都係被紫彤吸引,因此,我地嘅話題竟然係圍繞住紫彤。

[你地兩個係同一間學校?]

英文老師留意到我地兩個校服一樣,於是就問

[係呀,我地仲要同班呀!]

紫彤聽到即刻好開心咁答嘴,睇嚟佢仲想將我嘅故事攞出嚟happy sharing

[係呀,我好慘㗎,返到去就比呢個妹欺負,最叻就恥笑我]

我對住紫彤反白眼。紫彤就瞪大對眼哄埋嚟,以作反擊

[哼,咁係咪好唔鍾意同我一齊上堂吖?呀哥~]



紫彤一副你答錯就死嘅樣,睥住我

[咁又唔係…]

我即刻心虛咁講。睇下,佢又欺負我啦

班老師見到呢個場景,紛紛大笑

[如果唔係你地兩個講咗先,我一定會覺得你地係情侶,哈哈]

班主任笑道。我旁邊嘅紫彤面上又泛起兩團招牌嘅紅暈

[你地兩個係表兄妹實在太可惜啦,明明就咁襯]



英文老師附和

[睇嚟表哥喺學校都係比人欺負嗰個]

中文老師咁講。我拼命地點頭,紫彤就一個手掙撞埋嚟,痛到我係咁咳。紫彤再展示一個藏刀嘅笑容。為保小命,我都係決定收下口

[係呢,你地落去見咗校長未?]

大約講咗成個鐘嘅關於我喺男喇拔小嘅生活後,班主任提問

[未喎]

我回應道

[咁你地快d落去啦啦,佢見到你地應該會好開心㗎]

中文老師說道

於是我同紫彤就告別一眾老師,喺樓梯間比紫彤襲擊咗幾次後,終於嚟到校長室