由細到大,我係一個好勝嘅人。我希望自己能夠完全掌握一切嘅情況。我唔鍾意不確定因素,因為喺我眼中,嗰d係危機

不過自從 “紅太陽” 嘅出現,我好似一直都比佢牽住個鼻走。同紫彤返完男喇拔後,佢就總係喺我個腦入面揮之不去。我嘗試過問佢問題

[你究竟係邊個?]

[你到底想點?]

不過 “紅太陽” 一律已讀不回,以致我心情變得極度焦急和煩躁



直至一星期後的某日, “紅太陽” 竟然回覆我嘅訊息

[你係咪想見我?] “紅太陽” 問

[當然] 我回答道

[咁聽日沙田新城市地鐵站閘口,3點02分,不見不散]

“紅太陽” 講完呢句就再無回覆



我一方面因為終於可以搞清楚 “紅太陽” 嘅真身而鬆一口氣,但另一方面不安嘅感覺亦包圍我嘅全身。

不過我並冇得選擇,我只有赴約先有機會一睹 “紅太陽” 嘅真身

我如期赴約。順帶一提,沙田站嘅繁忙程度,僅次於中環同金鐘。喺茫茫人海中,我都有d擔心搵唔到 “紅太陽” 。

突然,一個熟悉嘅身影喺我身邊飛快走過。佢急步行入商場,而呢個正正就係我個妹,紫彤

我好快就聯想到,紫彤有可能就係 “紅太陽”,於是我二話不說就跟咗上去



穿過密密麻麻嘅人牆,紫彤嘅步伐絲毫冇減。平時,我都好少見紫彤會咁匆忙,因此我更加好奇紫彤究竟去做咩

紫彤喺agnes b 門口停低咗,四周張望,好似等緊邊個咁。我企喺遠處,觀察住紫彤,確保佢唔會發現

好快,一個同我差唔多年紀嘅男仔行咗埋去紫彤度。佢一手將紫彤攬住,再將佢收入懷中。紫彤輕輕將個男仔推開,但係個男仔攬得仲實。

睇度呢度我真係忍無可忍。要我望住自己個妹唔願意之下,仲要比個陌生男仔攬,叫我袖手旁觀我實在做唔到

我一枝箭衝向紫彤同個男仔,再一手將個男仔推開。我幻想住自己係青春愛情劇嘅男主角英雄救美

我以勝利者嘅姿態望向紫彤,但係佢就一臉老尷

[呢個乜水呀? 紫彤! 發生咩事吖!]

個男仔憤怒地望向我,再向紫彤大吼



紫彤依然一臉尷尬,我見紫彤唔回答,個樣又咁委屈,再好脾氣嘅我都忍唔住

[我係紫彤阿哥,我頭先就見到你無啦啦攬住紫彤,明明佢想推開你,你都唔放!]

點知嗰個男仔聽完嬲到面紅耳赤,向住我大聲叫嚷

[我係紫彤男朋友呀,我攬佢關你鬼事吖!阿哥喎,做兵就當自己阿哥!]


我難以置信地望住紫彤。紫彤只係低下頭, 一粒聲都冇出過

[阿妹…紫彤,呢個邊個嚟㗎? 話我知佢講嘅嘢都係假。快d講你當我係你阿哥啦!你出句聲啦! ]

我期待著紫彤會同我講一切都係假嘅。我無力地望向紫彤



點解吖?你明明同我講過我係你最重視嘅哥哥

你明明同我講過,你咩都會同我講㗎

明明我地先啱啱先一齊返過男喇拔,點解…

點解到最後,咩都唔知嘅又係我?

點解…

點解Adrianna又係咁,紫彤又係咁

[我唔知吖,唔好問我啦]



紫彤迴避我同個男仔嘅眼神,使我更加傷心

[你唔知唔緊要,我知]

熟悉嘅聲音,使我望向聲音來源

曉晴面帶微笑喺扶手電梯行落嚟