https://www.youtube.com/watch?v=eq1VWTE_iDI

我叫陳俊傑,我老婆…曉晴已經離開咗大家一個禮拜

曉晴嘅笑容,晚晚都會喺我嘅夢境出現。我成日都會見到同佢一齊嘅每一刻,我地嘅經歷喺每一晚都會重演

「曉晴…點解你要咁傻…點解你要犧牲自己」

如果時光可以重來,我會代替曉晴犧牲,呢一輩子佢受嘅苦實在太多,佢唔應該有一個咁嘅結局





成個禮拜,我只係坐在沙發上,呆呆地看着與曉晴的合照

「傻妹…你睇下你笑得幾燦爛」

不知不覺間,我會同相片中嘅曉晴講嘢。或者,呢個係我唯一同’曉晴’講嘢嘅方法

以前,我總係會喺曉晴身邊,取笑下佢,同佢打打鬧鬧。不過睇嚟我要慢慢習慣自己一個人

今日,係曉晴啱啱走咗一個禮拜





「一位唔該」

我向唱k的侍應要了間單人房,她愕一愕然。啱嘅,好少有人會一個人唱k,我諗我都係少數啦,哈

********************************************

Apple一步一步行近我,我就一步一步退後

我最後坐在張沙發度,但apple都係冇停到。直到佢塊面差唔多哄到埋嚟,我感受住佢嘅呼吸。近睇之下,佢皮膚真係好白,再加埋一對水汪汪嘅大眼,這是我第一次對佢心跳加速。





「俊傑,你可唔可以唔好再叫我apple?叫我曉晴」

「我…」

「你應承我啦~好唔好」

Apple 再一步挨近我,我地只剩下一個手指位嘅距離,我feel到自己已經失去思考能力,我只係識不停點頭。

Apple 好滿意咁點頭,仲要笑得好甜。

********************************************

曉晴就係喺呢度同我第一次唱k,亦係我第一次對佢心動嘅地方。我緩緩地拿起mic,唱起歌

呢首係我地嘅共同回憶





********************************************

音樂響起,曉晴抓實我隻手,而且十指緊扣

「我還在尋找 一個依靠 和一個擁抱」

就好似我需要曉晴咁,有咩事都會同佢講,有佢喺度我就會好安心

「幸福開始有預兆 緣份讓我們慢慢緊靠」

曉晴捉住我嘅手更加用力,對眼更加係直視住我,堅定嘅眼神又帶點曖昧

********************************************





「小酒窩長睫毛,是你最美的記號…」

我拿着咪唱着,唱着唱着,眼淚就唔爭氣地流落嚟

「曉晴,我記得你好鍾意呢首歌㗎,我歌喉有冇進步到呢?」

當然沒有人會回答我,連合唱歌都只係得我嘅聲音

「曉晴…如果我當日接受咗你嘅表白…我地會唔會已經過住幸福嘅日子呢?」

我走出k房,按照回憶去行

********************************************

唱完k後,大約行咗三個街口,到咗一間地下鋪。入到去好似冒險樂園,播住好歡樂嘅音樂同周圍都用粉色色糸,好有少女嘅味道。





「嗱,呢度就叫貼紙相店,你見到一部部嘅就係貼紙相機。我地入去影相就可以喺將相加效果,影完出嚟勁靚勁有記念價值㗎!」

********************************************

今次係我第3次嚟到呢度,歡樂嘅音樂,粉色嘅佈置,一切都冇變,變嘅只有人

「後生仔,得你一個嘅」

櫃檯前嘅阿姨已經記得我呢個常客

「係呀,佢今日…今日唔得閒呀」

我低下頭說。我實在不能向見證住我同曉晴愛情嘅阿姨,話比佢聽曉晴喺我眼前死咗





「後生仔,好嘢喎」

阿姨指一指我手上嘅戒指,我尷尬地笑了笑

「阿姨好認真咁同你講,你夠膽辜負妹妹呢,我斬死你都有份呀!女人嘅嘢好易哄嘅,記得多d關心佢,得閒就俾d驚喜佢,最後就成日講我愛你講到佢煩」

「雖然有時你會被佢激到好嬲,但係當你同佢白頭到老,d仔女都大哂嘅時侯,再回望返,你就唔會後悔選擇咗佢㗎啦」

「不過阿姨真係見證住你同佢由話咩家姐細佬,到你地拍檔嚟影貼紙相,而家你地結埋婚,阿姨都算係你地情路嘅見證人囉,加油呀,後生仔,幸福嘅日子先啱啱開始」

阿姨想比個擁抱我,當係對我新婚嘅祝福同鼓勵。我嘅眼淚終於忍唔住。對唔住,我都好想體驗阿姨你講嘅嘢,但係我應該冇機會啦,係我辜負咗曉晴

「阿姨講嘅嘢太感動呀?喊哂嘅」

「有沙入眼…」

我一個人行入貼紙相機內,以前同曉晴嚟嘅時候總係覺得呢度好窄,原來其實係咁闊

********************************************

我同曉晴貼得好埋。喺影相嘅過程中,我地會好不期然掂到對方,加上我唔想好似抽佢水咁,結果點影都好似好唔自然。

好似睇穿咗我諗咩嘅曉晴繞住我對手。雖然話我地係姊弟,但係拖住佢隻手真係第一次。我尷尬咁望住佢,比較之下,佢嘅笑容真係好甜美,有種令人好想守護佢嘅感覺。

曉晴挨咗落我肩頭度,一隻手搭住佢。原本嘅緊張感都消失得無影無蹤。

咔拆,咔拆~

********************************************

「俊傑,俊傑」

熟悉的聲音在我耳邊響起

「曉晴!」

我激動地看着身旁的女孩,是如假包換的曉晴。她還是清純的模樣,這是她中三時候的樣子

「俊傑,快d影啦,我冇時間啦」

曉晴拉着我的手,我們十指緊扣着。第一次拍貼紙照,我因太緊張而笑容怪異,第二次,曉晴因傲嬌的性格,而只是微微笑着。這次,我們二人也開懷地笑着,什麽煩惱也沒有,只有最純粹的 愛

我突然把曉晴轉向我,她好像有點愕然,我一口氣把她吻住,此時貼紙機機發出咔嚓的聲音,把我們愛的證據拍下

「衰人…終於捨得錫我啦咩…」

曉晴別過頭,我感動得落下淚。我很慶幸曉晴能回到我的身邊

「不過呢,你都快d搵個個女朋友啦,快d忘記我」

曉晴有點不情願地說

「唔會!我唔會再比你走,呢一生呢一世只愛你林曉晴一個」

我緊緊把曉晴抱住,但她卻輕輕地推開我

「你係咪唔記得咗,我已經死咗啦?」

曉晴扁扁嘴地說

「我喺中燈爆炸嘅時候已經死咗啦,所以可以再見返你已經好難得…」

曉晴逃避着我的視線,我才想起她為了救我已經犧牲了

「對唔住…對唔住,係我害死你」

曉晴搖搖頭

「唔緊要㗎…你冇事,我都…冇事㗎」

曉晴的眼淚開始落下

「俊傑…你要幸福呀!所以你盡快搵個女朋友...不過要有我咁靚女。要有我咁…愛你」

曉晴再也說不下去了,我也接受不了這樣的結果

「唔可以呀!唔好離開我…求下你…」

這時,照片掉下的聲音,我立刻查看照片

兩張我和曉晴接吻的相片掉下,我立刻打算把它們拿起,可是我卻觸碰不到他們

「點解會咁㗎!」

我大吼着,我就快崩潰了。我只想拿起我們的回憶也不行?就這麽簡單的願望

「俊傑…我差唔多要走啦…我好感激今日…可以見到你」

曉晴的身體慢慢變成半透明,我知道我即將回到現實了

「雖然我唔可以永遠喺你身邊陪住你…但係你望下」

曉晴拿起我們接吻的貼紙相

「雖然你攞唔走張相,但係你可以將佢變成回憶,擺喺心入面」

「就好似…就好似我唔可以活喺你身邊,但係…我可以活喺你個心入面,活喺你回憶入面」

「唔好呀!唔好呀…唔好走」

曉晴溫柔地撫摸着我的頭,但我已經感覺不到她了,只看見她的纖纖細手

「你一定要好好生活…將來你一定會係一個好老公好爸爸」

「今次真係要道別啦。上次唔可以同你好好講聲再見,今次應該可以啦」

曉晴微笑着,一切也變得半透明,我也跪在地上哭得停不住了

「陳俊傑,你記得記得,唔好再成日捱夜,唔好再唔食早餐,唔好再成日咁小朋友,唔好再要我擔心,唔好再…唔好再…愛我」

眼前的一切消失

「林曉晴!我愛你呀!」

我用盡力大聲叫着

********************************************

「後生仔…後生仔醒下啦」

阿姨拍着我的臉叫醒我

「影貼紙相都會瞓着嘅,你返去瞓下啦」

「唔啦,我仲有地方要去」

我笑着回應

我乘車回到罪工場,看到觀塘海濱,曉晴向我表白的地方

我把衣袋內曉晴的戒指,戴在右手的無名指上。我把眼鏡脫下,放回袋內

「就等我地一齊報仇啦,曉晴」