我竟然鍾意左...！？: 第二十六章(雯雯篇)

「你以前係....我唯一既好姊妹。」Samantha終於開口。

「究竟發生咩事？」wtf！我究竟係咪發緊夢？

「er...簡單黎講，就係你失憶前，我係你既好姊妹。」喺我隔離既阿明已經一頭霧水，走左入廁所冷靜下。而我就好有耐性咁聽落去。

「阿明而家唔喺度，你有話不妨直說。」

「我係監察你既使者。」



「下！？」

「2013年12月之前既野你記唔記得？」

「我....12月嗰陣咪入左醫院？但之前既野......我唔記得....」比Samantha提一提，我好似真係對12月之前既記憶完全冇印象！

「嗰一日，你因為喺天橋掉落黎，咁啱有人救左你條命，令你只係失憶，冇死到。」Samantha好認真咁講。

「嗰個人，就係啊明。」



「咁即係話....」

「咁即係話，第一個為你捨命既人已經出現左，嗰個人就係阿明。」

「你....你唔好玩我啦....你叫我以後點面對阿明啊！」我竟然鍾意左.....一個我殺過既人！

我突然有種內疚感，明明同自己講無論如何都要學識愛人，愛阿明，但而家Samantha就話我聽我已經殺過阿明一次....我聽到呢度已經開始冷靜唔到，個頭已經唔敢在向前望，雙手不知不覺變得冰冷。我既淚水流過不停，個腦不斷重覆住一句:「係我對唔住阿明....」。

「你冷靜D，聽我講埋先～」



「雖然我係監察你既使者，但我確實係你既好姊妹啊～嗰陣時，我知道你已經唔想殺阿明。無可奈何，當時你打算了結生命以作解決問題既時候，阿明救左你。我仲記得嗰陣偷偷監察你，你正想跳落去既時候，阿明就黎阻止你。但你同佢一路糾纏既時候，搞到大家都跌左落去.....但因為阿明落地先，而你跌左喺佢身上，所以冇傷得咁重。」

「又話係我好姊妹，但點解你唔阻止我啊！？」

「監察者唔可以干擾任何你既行動....對唔住。」Samantha搖搖頭，一副愛莫能助既失望表情，我都已經冇再怪責落去。

「但係照道理，點解你啱啱話偷偷監察我？你唔係同我地一齊咩？如果唔係點解你會有我地張相？」我稍微冷靜下諗諗成件事。但同樣唔敢抬起頭。

「呢個問題好簡單，因為我當時費事阻住你地二人世界，所以就話有事走先，然後偷偷監察住你。」Samantha好爽快咁回答我。

咁即係話，阿明之所以條天橋有懼怕感，就係因為我。我仲講咩陪佢黎！我根本就冇資格！我既內疚感有增無減....

「要害多啊明一次，變返做人。定係方向唔變，繼續學習「愛」。就睇你自己點揀啦。無人幫到你，自己認真咁諗下啦。」

「你叫我點面對佢...」呢一句，正正係我既問題既核心。



「紙包唔住火，遲早佢都會從監察者身上得知呢件事。要瞞住佢一時，定係向佢坦白，我諗你心中都有一個答案。」Samantha用返輕鬆既語氣同我講野，但我都已經輕鬆唔到啦～

「作為你既姊妹，其實真係估都估唔到可以透過阿明同你做返朋友架～」Samantha顯露出真誠既微笑，我感受到佢真係覺得開心。

「多謝你將呢間事話我聽，姊妹。」我雖然冇露出笑容，但同樣係真心真意向Samantha道謝。

過左無耐，阿明都出返黎。

但我真係冇面再面向住阿明，我覺得自己根本就冇資格面向住佢。

「唔好意思啊阿明，我有少少事，我走先啦。」講完，我就即刻跑出餐廳外，翻左屋企。

我而家連抬起頭既勇氣同資格都冇，我覺得自己已經冇資格再同阿明一齊，就連愛佢既資格都冇。究竟我,應該點做好.....



(即將完結)