我行埋去鐵欄邊,認真一睇,原來係楊竣暉,仲有麥瑞刑,兩個人跑嚟跑去,喺度練波
我望一望錶,都成9點啦,仲練緊波,可能因為比賽延期,所以加緊時間練習掛
「嗨~」我同楊竣暉恰好對上眼,佢同我say hi
「嗨~」我一臉尷尬咁同佢揮手
我行落樓梯
「你咁晏仲喺度嘅?」麥瑞刑問我
我稍稍遞一遞手,比佢睇到手上嘅M記
「咁好買埋嘢比我食囉?」佢笑咗一笑
「你想食咩?」我問佢
「你唔好阻住人地番屋企啦!」楊竣暉行咗過嚟


「佢先唔驚呀!我要食呀!」麥瑞刑講完就跑上嚟看台坐低喺地下,然後伸手拎咗我個M記
我都坐低咗,坐咗喺看台嘅石級上面,麥瑞刑坐喺地下,看台嘅石級變咗佢張枱咁
「暉!上嚟食嘢啦!個衰妹食唔晒㗎!」麥瑞刑向住楊竣暉叫道
楊竣暉上嚟坐喺M記紙袋嘅另一邊
「食啦!唔洗客氣啦!」麥瑞刑講完就拎起薯條放入口
楊竣暉都拎起薯條放入口,呢個時候,麥再刑突然企起身行去佢個袋嗰度拎咗件外套出嚟,然後行番過嚟
「喂!披住啦!」佢將件外套扔過嚟我度,「你件衫咁鬼死薄!」
我將件外套披住,楊竣暉稍稍望咗我同麥瑞刑一眼
「你唔好咁嘅眼神呀楊竣暉!」麥瑞刑留意到佢個眼神
「只係覺得你兩個睇落去好似情侶啫。」楊竣暉話


「好多人一開始都係咁講,因為我同佢friend嘛,不過我同佢就只係friend啫,冇其他嘅關係可以發展。」麥瑞刑一邊搣開個甜酸醬一邊講
我點點頭表示同意
「下星期有籃球比賽呀!嚟睇呀!」麥瑞刑同我講
「有令翠兒喺度,我就好難唔嚟睇嘅~」我無奈咁笑咗一笑
麥瑞刑突然靜咗咁望住我同楊竣暉
「原來你兩個都幾襯㗎喎。」佢一開口就咁講
「我高攀唔起學校嘅草草神。」我搖搖頭,聳聳肩,然後拎起我個魚柳包咬咗一啖
「草草神?」楊竣暉一臉疑惑咁笑咗一笑,然後望住我
「校草,男神,校草男神,簡稱草草神。」我解釋比佢聽
「okok~」佢笑咗一笑


「唔洗理佢,佢唔正常。」麥瑞刑望住才竣暉,但手指指住我
「你先唔正常!」我打佢隻手
「邊有人見到我地學校咁shining嘅草草神都冇反應,仲要坐喺度食魚柳包㗎!」麥瑞刑指一指楊竣暉,然後再指一指我
「呀!好shining呀!」我望咗楊竣暉一眼,然後用手遮住雙眼向後靠,瞓咗喺個石級度
「凍呀!」麥瑞刑拉起我
「你兩個識咗好耐㗎啦?」楊竣暉突然問起
「都算係嘅...」麥瑞刑一臉猶疑咁答佢,「我小學就識佢啦!」
「都好耐喎...」楊竣暉諗咗一下
「下星期就比賽啦!」麥瑞刑同我講
「我知,我睇到籃球場外面嗰張紙。」我無奈咗一下,「你又會嚟呢度練波嘅?陣間又要搭車番去。」
「要陪阿暉嘛,佢喺呢頭住,咁我咪過嚟陪佢練波囉。」麥瑞刑抬一抬頭,話我知因為楊竣暉所以過嚟
「慘豬豬,天寒地凍仲要練波。」我笑住咁講
「落去打多陣先,阿暉你食完先落嚟啦!」麥瑞刑企咗起身,由看台跑番落去球場打波
看台上面得番我同楊竣暉,有D尷尬...
唔知講咩好,畢竟大家都唔熟


我低頭㩒電話
「你同佢真係好friend。」楊竣暉開口講,大概係想打破尷尬嘅氣氛
「還好啦,我同佢識咗至少有10年咁耐,都好難唔friend嘅~」我抬頭望一望麥瑞刑
「如果佢一拍拖,你同佢嘅距離咪會遠咗。」楊竣暉話
「嘻...我又冇諗過呢樣嘢,不過佢拍拖都係遲早嘅事嚟嘅~到時先諗都唔遲呀~」我笑咗一笑,然後再低頭望手機
「佢嘅籃球比賽你唔係次次都有嚟咩?同另一個女仔一齊嚟。」佢問我,佢口中嘅另一個女仔,大概係指翠兒
「我陪我個friend嚟㗎咋!」我笑起嚟,然後望住楊竣暉,「陪佢去睇佢男神。」
佢好似瞬間明白我嘅意思,然後露出咗淡淡嘅笑容
「咩男神呀...D女仔都係睇樣㗎啫!冇樣嘅話,有才華又有咩用呀~」佢好似喺度自嘲咁
「都唔係嘅...」我諗咗一諗,「女仔有時都唔係話睇樣嘅~有時都會睇下對方有冇才華,可能係對方嘅才華吸引到啫。」
「或者啦,暫時...未有...」佢嘅面上帶着一點點嘅失望,然後苦笑
「好似麥瑞刑咁,佢都唔係好靚仔,對我嚟講嘅話,但都有幾多嘅女仔中意佢呀~」我指住喺籃球場上跑嚟跑去嘅麥瑞刑
「你知都同佢咁friend,唔怕比其他女仔話你呀?」佢望向麥瑞刑
「唔怕喎~我要慶幸佢同我做friend添呀!」我笑咗一笑
「係咩...」佢笑咗一笑,然後合埋眼,低下頭


「喂!」麥瑞刑跑上嚟,「仲打唔打呀?」
「唔啦,有D攰...」楊竣暉搖搖頭
「你要番去啦!好晏啦!」麥瑞刑望向我
「知啦知啦!唔知因為邊個搞到我仲未番到屋企呢可!」我指住麥瑞刑
去到籃球場個閘口嗰度嘅時候
「我陪你番去啦!」麥瑞刑同我講
「唔洗啦!」我搖搖頭
「吓,宜家咁晏!」麥瑞刑一臉擔心咁講
「得啦!你番去啦!我ok呀!」我話
「咁...好啦...」麥瑞刑一臉唔放心,但都點點頭,「阿暉你陪佢行番去啦!」
「ok。」楊竣暉點點頭
就係咁,尷尬嘅時間又開始啦...

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLSfh2mVp-9AOAwN_vs01VotPY44QKkBNUfr8uengj4DTahz6MQ/viewform?usp=pp_url
已有 0 人追稿