轉換視線—林徳添 Tim

凝望著她的眼眸,我終於回想起失憶前所經歷的一切一切,將「上輩子」與「今輩子」的自己融合起來。

我好想把以往一切都告訴你。

我把承諾都兌現了。

我開腔道:「呃......隻狗幾可愛啊,小姐有咩可以幫到你?」



她趕緊拭乾眼淚,擠出笑容:「你......你唔記得我?」

「你識我?我嚟到呢度無耐就失憶,我已經記唔起以前嘅事,既然你記得我,可以講下我以前係點嘅人?」

「你以前?嗯......你係一個好有義氣嘅人,我有事嘅時候,你永遠都會係我身邊支持我,做我最強後盾。」她的眼睛微笑成一條彎線,像是回憶起愉快的往事。

幸好,我在你心目中,還佔有一些位置。

「過咗咁耐,多謝你肯去記住我。」



楚瑩抿嘴一笑,「係呢,點解你會係度嘅?到底呢度係咩地方。」

「呢間係幫人遺忘記憶嘅中心,係我自行研發嘅成果,不過公佈天下嘅話應該會被人濫用技術,始終我都係唔敢過於相信人。」我簡單介紹。

「哦......咁幾好啊,我走先啦。」她向我揮手道別 ,連忙轉身離開。

我也向她揮手,「再見,多謝你將Bobo照顧得咁好。」

「Byebye,唔洗多謝,我一早當咗Bobo係我個仔咁湊。」



中心的大門關上,我又一次目睹楚瑩的離開。

//

中心門外,

楚瑩注視着手機螢幕,Facebook的當年今日的通知,不厭其煩地提醒着她於5年前的今天前往觀賞流星雨。

Facebook的共同回憶功能彷佛在提點著自己,
我和你,都只剩下回憶而已。

「傻瓜,明明記得都要扮失憶,我當時講下嘅記憶回收中心,你真係研究到個技術......

明明,你係鐘意我。」



楚瑩沒有遺忘在中心與Tim的對話,相反,她比任何人記得還要清楚,同時,她也明白,Tim對自己說謊的原因。

「喂?我同Bobo散完步,行緊翻嚟啦。相親?媽咪啊,都話咗緣份嘅事無得急㗎,如果真係有緣,唔洗特登去揾都會自動出現。」她趕緊擦乾眼淚,拖著Bobo回家。
已有 0 人追稿