「老實講句,溝女都不外乎三樣野。就係錢,錢,錢,同埋錢。」依架坐喺我對面張大梳化,擔住條蝦條扮雪卡,學古惑仔入面蔣天生講經典對白既醉漢叫小桃。

望住佢個醉貓樣,睇怕佢又係比女飛啦,數數手指,今次已經係佢第五次失戀。每次一失戀,佢就會搵我同另外一個社工Friend啊木,去太子依間清吧,一直飲,飲到醉晒咁不停喊。
雖然小桃佢比女飛左成五次咁多,但係實際上佢絕對唔係咩差既男仔。論內在,佢永遠都係一個廿四孝既好男朋友,無論有女朋友有幾多無理既要求都好,佢都一定會盡量滿足。論外在,佢成個方力申咁,邊有得輸。
唯一既問題就係……

「小桃哥,你每次都拍到無晒自我咁,唔得架。」難得地平時比較忍讓既啊木會有咁大反應,坐喺我隔離既佢怒氣沖沖咁話:「每次我地都嚟聽你點慘點慘,你有無諗過個問題所在啊?」

「咩……咩……咩無自我啊!我不知幾有自我!上次啊Katie佢先讚完我有主見。」面對啊木既反駁,小桃不禁反駁道。



「主見?係因為你講得中個女仔想點想點,所以佢咪讚你有主見囉。」啊木激動地到指住小桃個頭鬧。

眼見如此,我心知不妙,我就捉實左啊木隻手指,拉起啊木,拖左佢入廁所。

我望一望佢塊臉原來都紅晒,我嘆左口氣問佢:「係咪發生左咩事?今日咁燥既?」

我一問完,平時好堅強既啊木都開始眼濕濕,佢話:「我……啊媽佢入左廠,我真係唔知點做好……嗚……」

聽完我都呆左呆,我再問:「佢……無咩野啊?」



「醫生話佢大腸……三期……機會好微……我真係唔知點做好……我本來唔想嚟架……但係我更加無勇氣去見啊媽……」啊木不停喊不停喊。

我唯有掃下佢膊頭等佢好過啲,殊不知電話Whatsapp就響,係我女朋友Kary。

Kary: 你番到屋企未啊?
我: 未啊,仲同同事食緊飯。
我:Sorry不如你訓先啦唔洗等我。
Kary:唔緊要啦,我擔心你啊
我:傻豬嚟既,咁大個人我識照顧自己架啦
Kary:唔緊要啦,我等你


我:你訓先啦
Kary最後覆左一個Emoji係萬惡既笑容。

你地知唔知有一種笑容係可以笑到你心寒?就係依個Emoji

我知道佢嬲緊,其實同同事食飯又好,飲野都好,每過左一定時數,佢就會出現。我唔知佢係掛住我?驚我講大話?定真係擔心我安危?
總之佢就會瘋狂地Whatsapp你直到你番屋企為止。
依個女仔就係我既女朋友Kary,生得唔係特別標誌,但係就好討得我屋企歡心。拍左都差唔多兩年幾,不過佢就仲讀緊書,而我出左嚟做野都有年幾。

喺依個兩難既情況下,我決定!同班兄弟講聲Bye Bye。
我飛快咁放低幾舊水,走出酒吧外面,截左架的士番屋企。
當然番到去我係見唔到Kary架,因為佢住喺香港既南面,而我住既係北面。
佢想我做既只係快啲打番電話比佢。
「DO~DO~DO…………」如是者打左幾次都比佢Cut線後,佢終於Whatsapp番我。



Kary:番到屋企啦
我:係啊
Kary:同同事食飯食到咁夜
我:Sorry
Kary:你知唔知我擔心你架
Kary:你夜媽媽咁又唔知去左邊,又唔知番到屋企未
我:對唔住,拜託你聽番我電話啦
Kary:哼

如是者氹左幾次之後,佢終於肯聽番我電話。依一刻我總算叫做放低左心頭大石,而現在既時間係凌晨兩點,一諗到聽日星期六都仲要番工,我就覺得好攰。不過拍拖就係咁架啦,係咪​?
已有 0 人追稿