[星級甜故] 我條仔係 Superstar: 第七章

 
餐廳之內, 可可問住 Michael, 「喂, 你同你老婆而家幾好嗎?」 但 Michael 就再講, 「我地上個月已經離咗婚嘞!」
 
一個幾驚訝嘅回覆, 令到可可諗番起幾年前因為轉工同其他原因而同 Michael 分手過後。
 
諗起當年仲未定性嘅佢, 可可除左鍾意玩 phone sex 同四圍識男仔之外, 但對於感情之事就抱住玩玩吓嘅態度, 但人始終都會長大嘅, 而今日嘅可可就已經唔會再好似當年咁, 咁容易對一個男仔立亂付出真感情同咁態度放任嘅。
 
仲記得同 Michael 分手之後第二年, 一日 Michael 突然約左可可出黎派帖比佢, 「可可, 我要結婚嘞!」
 
但當時可可聽到呢個消息之後居然表現得好豁達咁, 「Congratulation, 喂, 做咩咁快就搞埋哂啲咁嘅嘢架?」 Michael 苦笑地講, 「唉, 咪就係搞大左人哋個肚而被迫結婚囉……..」


 
餐廳內, 侍應擺低左兩份 set dinner 之後, 可可跟住就再問住 Michael, 「喂, 咁而家你係唔係仲響 Edmond 間公司度做事呀?」 Michael 聽到之後就微微點一點頭。
 
可可跟住又再問, 「喂, 咩事搞到結婚幾年就要同老婆離婚咁大件事呀?」 Michael 縮一縮膊再好輕描淡寫咁講, 「性格不合, 而佢猜忌心又重, 兩個人成日都嗌交, 所以最後咪就一致決定要分開囉!」
 
哦, 可可聽到之後心諗原來婚姻真係可以咁化學嘅, 但正當二人繼續講番 Michael 個老婆同舊公司啲是非之際, Michael 突然就問住可可, 「喂, 今晚搵妳出黎, 我除左係想同妳聚吓舊之外, 其實我係有一樣嘢想聽吓妳意見嘅…….!」
 
可可見 Michael 突然好似咁認真咁, 跟住即時就好緊張咁同 Michael 講, 「你唔係想同我再……?」
 
Michael 笑住口再搖住頭黎話, 「唔係……, 妳咪諗咗果啲嘢先啦, 我同妳係唔會再有嘢架嘞, 不過我只係想講, 最近我識咗一個女仔, 而個女仔又好好同好 like 我咁…..」


 
可可聽到之後知道自己會錯意, 所以跟住就笑笑口咁同 Michael講, 「咁你有無好似以前同我去澳門咁, 一日同佢做足四次咁多呀?」
 
Michael 無料到可可會咁樣問, 跟住見佢紅都面哂咁口窒窒再講, 「吓…哦….唏, 妳估而家我仲後生咩? 一日仲可以黎四次, 而家四日先一次就差唔多!」 可可聽到之後正哈哈大笑住起黎。
 
Michael 再講, 「妳咪笑到個口咁大住先啦, 喂, 嗱, 認真嘅, 我想問吓妳, 如果我女朋友話想同我結婚, 但我同佢又只係識左幾個月左右, 咁唔知我好唔好應承佢咁呢?」
 
可可勉強地收起笑容黎話, 「唓, 有咩話識咗幾耐啫, 咁你覺得佢啱嘅咪就比佢嫁入門囉!」 但 Michael 跟住好快就再講, 「但佢而家係有 Cancer 過喎!」
 
可可聽倒咁, 即時收起輕挑笑容咁呆左響度。


 
二人對望左一陣之後, 可可跟住就先開口問 Michael, 「但你響之前知唔知知佢係有呢啲事架?」
 
Michael 點一點頭, 跟住見佢靜咗一陣先識得再開口講, 「唉, 雖然我知佢係有病, 但講真, 同佢一齊我真係覺得開心左好多, 而佢亦從來唔會響我面前表現到有事咁樣, 再加上我好欣賞佢做人嘅態度, 所以……我哋就係咁就響埋左一齊!」
 
可可突然發覺響佢眼前嘅 Michael 真係好偉大, 可可再同 Michael 講, 「咁而家你打算點做呀?」 Michael 唔吓個咀黎講, 「我想應承佢, 况且醫生亦同佢講過, 佢背脊嘅腫瘤雖然係惡性, 但尚幸發現得早而未有抗散嘅跡象, 所以手術後嘅康復成功機會率都會幾高吓咁!」
 
飯後, 可可同Michael 兩個繼續響街度閒談漫步住, Michael 見可可好似心情咁沉重咁, 跟住就反過黎再安慰番住可可咁話, 「喂, 咪咁啦, 我女朋友會無事過喎, 而且我都已經決定會娶佢架嘞, 嗱, 妳係咪應該要戥我開心咁先呢?」
 
可可苦笑住咁揼左 Michael 個膊頭一吓, 「知道嘞, 其實我都應該戥你同你女朋友高興至真嘅!」 講完, 可可就上前攬住 Michael 黎講, 「恭喜哂, 到時結婚記得要請埋我飲至好呀!」
 
兩個人繼續向住尖沙咀方向行去, 途經九龍公園嘅時候, 可可突然同 Michael 講, 「喂, 入去以前我地個私家位度坐一陣至走咯!」
 
Michael 無咩異議, 二人跟住就走入公園之內。