[星級甜故] 我條仔係 Superstar: 第十四章

Leo 聽倒可可咁講, 跟住就真係停低腳步再轉身行去可可嘅面前,  Leo 正一面唔耐煩咁望住可可, 而可可就比 Leo 呢對咁唔友善嘅眼神嚇到有啲口窒窒咁話, 「仇…生, 你聽日…係唔係…要去深圳……..」
 
可可正甩甩卡卡咁講咗頭先響升降機內聽倒 Tommy 佢哋嘅一番對話比 Leo 知, 但 Leo 聽倒之後就好似無咩反應咁就講咗一句, 「係咁咋!」 可可點一點頭, 但 Leo 就好似無咩特別咁就轉身唔理可可而繼續行去公司大樓方向。
 
可可見 Leo嘅反應係咁冷淡, 跟住就有啲後悔覺得自己好似有啲多事咁, 可可繼續行去些粉買咗盒 Panadol 之後, 跟住自己就快步行去lift 口大堂度搭 lift 上樓。
 
幾日之後, 呢一日下晝, Damon 襯可可一個人響 Pantry 度斟水嘅時候就走埋去同佢講, 「喂可可, 妳今晚妳收工之後有無時間呀? 我想….同妳一齊出去食餐飯呀!」
 
諗番起 Damon 曾經搞過洛儀而又用皮帶打成佢咁, 可可其實對 Damon已經憎恨到極點, 可可正不屑咁同 Damon  講, 「我哋之間好似無咩私人嘢好傾, 但如果係公事嘅我諗響公司呢度講就得架嘞!」
 


Damon 見可可態度係咁決絕同已經無哂希望, 跟住就有啲不忿咁就轉身行番入去自己嘅房內。
 
兩個鐘頭之後, Damon 響房內捧住一大堆 file行出黎到可可嘅枱前放低, 「呢堆 file urgent, 唔該妳響今日之內同我趕起哂佢先好收工!」 可可望住呢堆山咁高嘅 file 正擘大口得個窿。
 
而響身邊嘅 Carrie 就出聲同 Damon 講, 「喂, 玩嘢呀? 而家四點你先攞堆 file 出黎話 urgent!」 洛儀亦跟住講, 「咩事呀? 擺明玩針對啦, 係唔係今日趕唔起哂就要借啲咦炒人咁呀?」
 
Damon 正好嚴肅咁同佢哋講, 「玩咩嘢啫? 咁啲 file 真係 urgent 吖嗎, 但如果可可做唔切嘅咁妳哋咪就幫佢手囉, 得嘅, 妳哋三姊妹夾手夾腳無嘢話會唔掂嘅!」 講完,  Damon 跟住就串串貢咁轉身行番入房內。
 
洛儀同可可講, 「條友求愛不遂, 因愛成恨呀, 可可妳唔好理佢, 一陣五點半夠鐘妳就執嘢走人!」 Carrie 又同可可講, 「條友擺到明就係響度玩嘢啦, Urgent 吖嗎, 咁可可妳咪就 hea 做番比佢囉, 使死呀, 要快吖嗎, 要快咁就自然會做錯同做漏架啦!」
 


但已經激到爆炸嘅可可就同佢哋講, 「我知吖, 所以我都無諗住會同佢傻, 佢今日同我玩得呢一次, 咁聽日咪又會再玩第二次, 得架嘞, 妳哋唔使幫我手架, 等我做得幾多就得幾多, 總之夠鐘我自然就會收工走人架嘞!」
 
到咗臨收工之前兩個字倒, Damon 又再行出黎同可可講, 「喂, 堆 file 妳可以暫時放低先, 但而家妳先趕左呢份 contract 個 draft 黎比我, 因為我聽朝一早就要比 Leo 睇嘅, 無得遲, 總知聽朝番工果陣如果我比唔倒份 draft Leo 睇嘅話, 咁就麻煩唔該妳直接上 30 樓同 Leo 親自解釋吓!」
 
可可聽到已經嬲到核爆, 而洛儀同 Carrie 就齊聲屌 7 Damon 咁話, 「哦, 知我哋唔聽你支笛就搵 Leo 壓落黎, 你條仆街都算陰毒喎!」 Damon 笑住咁講, 「咁妳哋咪就試吓唔做囉, 無嘢架, 到時有事又影響唔倒我嘅, 總知我已經叫咗可可做架嘞!」
 
Damon 行開之後, 可可突然就伸手大喝一聲, 「好, 單嘢擺明就只係針對我, 妳哋唔使幫我手, 總之我搞掂份 contract 之後就會收工走人!」
 
講完, 可可就大大力執開啲 file 就準備做份 contract, 而洛儀就同可可講, 「喂呀妹, 真係唔使我哋幫妳手?」 正眼泛淚光嘅可可就好決絕咁話, 「妳哋走先啦, 份嘢我個零鐘頭倒就搞得掂, 得架嘞, 妳哋唔使理我架!」
 


兩條女聽倒可可咁講, 跟住就唯有掉低可可一個人咁收工走人。
 
已經到咗八點倒, Office 之內嘅人都已經全部走哂, 但可可就正為份 contract 煩惱而飯都唔得閒去食, 「死啦, 仲以為個零鐘頭就搞得掂添, 估唔倒原來有咁多資料要咗搵右搵咁, 睇怕呢次無十二點都搞唔掂份嘢添架!」
 
Office 入口玻璃門外, 有人正靜俏俏咁開門行緊入黎, 跟住好快又再無聲無息咁就到咗可可嘅身後, 有袋飯盒正遞放到響可可嘅枱面之處, 「喂, 食咗飯先啦!」
 
正專心工作緊嘅可可, 就比呢吓咁突然嘅情況嚇到成個人彈起驚叫, 「邊個呀? 唉….嚇死我嘞, 仇生咩係你黎呀!」