可可見倒係 Leo 放低袋飯盒響佢枱面之後, 「仇生, 點解你會黎呢度嘅?」 Leo 正笑笑口同可可講, 「無, 我聽 Ronald 講話妳今晚要一個人響度 OT, 所以我咪就特登買兩個飯盒上黎搵妳陪我食飯囉, 中環鏞記燒鵝飯啱唔啱呀?」
 
可可仲係有啲大感不惑咁, 「但仇生….」 「妳叫番我做 Leo 得嘞!」
 
Leo 開始攞緊啲飯盒出黎, 「喂, 幫手啦, 盒飯妳都有份架!」 可可仲係皺住眉頭唔敢相信眼前嘅事實, 「Leo…..」 「仲講, 妳係咪要餓死我呀, 食咗飯先講啦!」 Leo 攞咗盒飯出黎之後, 跟住就坐住響可可隔離張枱度自顧地食緊, 而可可就有啲怪怪感覺咁亦開始坐低食住個飯盒。
 
嘩, 貴嘢果然真係零舍好味啲咁喎, 已經餓到飛起嘅可可正食到津津有味嘅時候, Leo 突然就問住可可, 「做緊份咩要搞到咁夜呀?」 可可含住啖飯黎同 Leo 講, 「咪就係要趕聽朝比你果份羅氐集團嘅 contract 囉!」
 
Leo 聽倒之後定咗一陣跟住就再同可可講, 「Damon 尋日咪已經比咗我囉, 咩羅氐仲有第二份 contract 要做嘅咩? 妳比份 contract 我睇吓!」 可可 print out 咗份未完成嘅 contract 出黎比 Leo 睇, 但 Leo 望咗一陣之後就話, 「Damon 咩事呀? 呢份 contract 咪已經搞掂咗囉, 做咩佢又要你再做多次呀?」
 


可可聽倒之後無出到聲, 但 Leo 就同可可講, 「妳食埋盒飯就可以收工先, 聽朝我會問 Damon點解要妳咁樣做!」 可可聽到之後即時如釋重負咁成個人鬆哂落黎。
 
既然唔使再做嘢, 咁可可就可以繼續輕鬆地嘆埋個飯盒, 「係呢 Leo, 盒飯幾多錢呀? 等我比番錢你吖!」 Leo 聽倒之後咀角翹咗一吓就話, 「好呀, 計埋我揸車去買飯盒啲車錢, 咁妳就比番一千蚊我啦!」
 
可可聽倒之後就皺住眉頭, 但見佢又真係響銀包入面攞咗一千蚊出黎遞比 Leo, 「嗱, 盒飯啲錢呀!」 Leo 望住可可個認真樣, 跟住就笑住咁同佢講, 「我唔收 cash 架, 啲錢就響妳今個月嘅人工度扣啦!」 可可聽到之後就扁哂咀咁自言自語, 「唓咁貴, 早知我自己叫外賣食好過啦!」
 
食完飯之後, 可可起身幫 Leo 執埋個盒入袋度之後, 但 Leo 就同可可講, 「妳住邊架? 等我車埋妳番屋企嘞!」 可可呆望住 Leo 黎講, 「唔使嘞, 你啲車錢咁貴, 我都無咩幾多人工可以比你扣, 我都係自己搭地鐵番屋企就得架嘞!」
 
Leo 跟住就再笑笑口同可可講, 「好呀, 不過我份人就好恩怨分明嘅, 果日有個女仔響街度提醒我, 佢話比我聽叫我唔好收購何標深圳間廠, 之後我就聽咗佢話, 到後尾我先知原來佢講嘅嘢係啱嘅, 嘿, 比著係第二啲人, 我睇佢唔屈我一百都要收番我幾十個嘅小道消息費嘞!」
 


可可無出到聲, 但Leo 就再同可可講,「嗱, 妳幫過我, 咁我就一定唔會虧待妳嘅, 而家我比妳開個價, 妳想要幾多就即管開聲, 十萬? 定抑或二十萬? 點呀? 夠唔夠吖?」 可可突然覺得 Leo咁講係好侮辱同反感。
 
可可搖住頭講, 「唔使嘞仇生, 頭先果個一千蚊飯盒已經夠嘞, 但如果無咩事嘅話我睇都係要走先嘞!」 講完, 可可就拎埋袋食完嘅飯盒就向住門口方向行去走人, Leo 望住可可離去嘅背影, 跟住就開始覺得可可有性格之餘, 仲開始對呢個女仔有啲另眼相看。
 
第二朝, Damon 一早就比 Leo 嗌咗上去照肺, 而可可亦同洛儀 Carrie 講咗尋晚嘅事出黎, 洛儀同可可講, 「咩妳咁蠢架, 比著我聽倒佢話廿萬咪就照收囉!」 Carrie 又講, 「唏, 妳估個個都好似妳咁貪錢嘅咩, 不過可可妳都要小心啲 Leo 呀, 聽人講比佢睇中嘅女都無好下場, 總知一切就要小心啲啦!」
 
門外突然見 Damon 正死哂狗咁行緊入黎, 跟住無幾耐之後又有幾個實 Q 行咗入 Damon 間房度, 眾人見倒咁正竊竊細語, 三條女亦同樣正圍埋一齊開住會。
 
Carrie 先講, 「喂, 條友好似比人炒咁喎!」
 


洛儀又講, 「扺死啦, 緊係 Leo 知道佢玩可可, 所以咪比 Leo 炒囉!」
 
最後輪到可可講, 「會唔會唔關我事呀? 定係佢自己做錯嘢比公司炒咋呱?」