「喂,今個月三十一日,大概四個禮拜,食飯一千,搭車四百八,零用一千,總共二千四百八,齊頭二千,檯面有千七,剩低三百遲啲畀。」
「多謝。」
我將檯面上面嘅一千零七十蚊擺入銀包,盤算下計埋兼職個四千八,點先儲到五千蚊。搭車四百八冇得慳,重要同佢食一餐五百蚊,每日剩返十一蚊,啱啱好夠買麪食...
我攞起衫褲同埋毛巾準備沖涼,但當我準備入去浴室嗰刻
「喂,我今晚趕著去唱K呀,你等陣先沖涼啦。」
「同邊個呀?」
「關你咩事啫,我係你女朋友唔係呢個奴隸呀。」
「對唔住...」
我唯有行返入書房,打開部電腦做嘢。就喺喱刻,有電話打嚟。
「喂,今個月家用呢?」


「我女朋友遲少少過畀你」
「次次都係咁,上年七月重冇畀,你阿哥個個月都畀二千蚊。你呢?又話要讀大學,讀完大學又話讀埋碩士,足足比少咗五年家用,家用重要得七千蚊」
「媽,我想分手呀。」
「分咩呀?你女朋友幫手煮飯又幫手洗碗,而家邊度有呀?」
「但係...」
「你唔好阻住晒啦,收線先喇。」
「嘟嘟嘟」
我擺低部電話,食咗個麪,沖咗個涼,喺電腦做到凌晨三點就瞓咗。話時話,我女朋友仲未返。

本故事純屬虛構,如有雷同,實屬悲劇


Ps 我都想有料讀碩士
已有 0 人追稿