我照舊去坐E23A入機場,用咗個半鐘嘅時間終於嚟到機場。當我搭入一號客運大樓時,見到有好多人喺度送機。我諗佢地係去外國讀書掛?佢哋互相喺度攬住喊。睇到依度我隻眼不由自主咁流咗d淚水出嚟。我自小就父母離異,法官將我判咗比老豆。老豆經常唔喺屋企,出去蒲。阿媽見到我咁,其實好想接我走。奈何當時佢冇任何經濟能力照顧我。我仲記得有一次同阿媽見面嗰陣,佢話:

「如果我將來搵到錢,我一定會接你走!」

當時天真嘅我相信咗阿媽講嘅嘢。後來一次偶然嘅機會,我阿媽發咗達。我知道咗之後好開心。心諗:

阿媽終於嚟接我喇!

但最後換嚟嘅只係失望。佢之後只係喺每個月比$50000我做零用錢就算,同埋比我繼續同個老豆住。最近個仲老豆娶咗個新老婆,直接搬走埋。不過佢走唔走都係咁㗎啦,橫掂我一直都冇屋企人埋。而且我本身都唔鐘意宅喺屋企,不如索性去遊車河算啦。





諗下諗下,我已經嚟到E11個巴士站。咁橋有㗎E11入站,我手忙腳亂咁喺銀包度拎咗$21出嚟。成功分散咗我嘅注意力,令我唔再諗啲傷心嘢。上車後我照舊坐喺車頭嘅最前排。上咗車一陣,我就開咗個手機睇下d網上新聞。

「萬人反修訂《逃犯條例》,創佔中後新高」

「《逃犯條例》市民「憤」起上街,政府有看在眼內?」

我睇到之後其實好無奈。點解依家香港會變成咁㗎?睇睇下再下望咗下擋風玻璃,發現我已經嚟到東涌。睇嚟我睇得太入神。今日明明係星期五,照計出港島嘅人會唔多㗎,點解今日咁奇怪嘅?上客都上咗3分鐘。喺開車嗰陣,有個女仔坐咗喺我隔離。喺我嘅好奇心驅使下,我望下佢,諗住睇下佢靚唔靚女。

一係唔望,一望就覺得依個女仔點解會咁熟口面嘅?我諗咗一陣...我醒起喇!依個咪就係我喺3個月之前喺中環見到嗰個失戀嘅女仔!?我望佢嘅同時,亦都睇到佢喺度望住我...
已有 0 人追稿