我不停喺度諗啱啱阿媽講嗰句:

「佢喺一個好男仔嚟㗎!」

我其實應唔應該同阿媽講我已經同個渣男分咗手好呢?我覺得如果我同阿媽講個渣男出軌之後,佢一定會喺度話:

「情侶之間總有啲鬧交嘅時候,你將就下啦。當年你老豆都係咁啦!」

Come on!如果我另一半背住我偷食我梗係唔會原諒佢啦,因為我覺得太污糟,接受唔到。雖然我曾經好On9咁原諒過佢一次。Btw,但我依家只係拍拖階段姐,唔一定要俾佢綁死㗎嘛!我越諗越煩。諗下諗下我就已經行到去巴士站。今日唔係星期五咩,點解咁多人過海㗎?我諗條隊都有20米咁長。我停低之後就繼續諗返啱啱個問題。





當我繼續煩緊嘅時候,後面有㗎E11準備入站,我打開我個手袋拎我張八達通出嚟。㗎E11終於入到站,於是我喺隊尾咁慢慢行上車。我從來都冇試過上車要上成3分鐘。

上車之後,我行上上層。我發現得翻最前排嘅左邊係有位坐,我唔細心諗就咁坐落去。我坐低放翻好張八達通之後望咗一下坐我隔離嗰個會係咩人。一係唔望,一望我就有啲控制唔住自己想大叫「Yeah~」坐我隔離嗰個竟然係之前喺中環安慰我嗰個男仔!我望緊佢嗰陣亦發現佢喺度望住我...
已有 0 人追稿