今日係母親節,我依舊訓到2點先起身。反正人人都有人陪,得我冇㗎啦。起身之後我就㩒開部電話睇下IG,Facebook同Snapchat。喺我睇睇下嗰陣,突然彈咗個WhatsApp出嚟:

「阿仔,今日母親節喎,不如出嚟一齊慶祝呀。等你覆!」

由我6歲開始,佢就再冇同我講過生日快樂。做咩今日會無啦啦搵我呢?我本身就唔係幾想去嘅,但係因為今日係母親節,我啲fd全部都去咗陪屋企人,我約唔到人去街,所以我就覆阿媽WhatsApp:

「好呀,去邊到食,幾點」

我嘅語氣係極之冷淡。我打完幾秒阿媽就覆我話:





「去銅鑼灣食呀~近我地屋企。大約6:30喺Sogo度等啦~」

我睇完之後有d震驚。我阿媽竟然住銅鑼灣嗰邊?佢依10年究竟搞咗啲咩呢?我睇嚟一陣要問清楚。我見依家先3點,不如早啲出去行下啦。於是我就坐車去咗中環度吹風兼食悶煙。我一路食一路諗:

一個10年到冇同我講過生日嘅人點解會無啦啦搵我見面,仲要住喺銅鑼灣嗰邊?

我諗咗好耐。之後攞部電話出嚟睇下。原來已經6:00。於是我即刻狗沖去坐地鐵。去到好彩只係6:15,我見阿媽佢仲未到,所以我走咗去Sogo個超市到買咗枝葡萄適。葡萄適嗰種甜得嚟帶啲攻腦feel真係好正。我買完已經6:30,我行出Sogo門口咁啱見到我阿媽。佢由10年前見佢嘅MK feel變得更MK feel,仲要係摟屌裙。我行過去,同佢講:

「阿媽。」





佢見到我,即刻摸我塊面,好激動咁講:

「阿仔,好耐冇見呀!最近點樣呀?夠唔夠錢用呀?」

我即刻推開佢隻手,話:

「最近幾好,死唔去。就算夠錢用,乜你覺得可以用錢嚟彌補到我童年冇屋企人理嗰種痛苦咩?」

佢聽完露出一種內疚嘅表情。跟住我地就再冇講嘢,突然,有個女人行埋嚟阿媽嗰度。我見到佢,佢有明星咁靚嘅樣再加上model嘅身材,又係着摟屌裙。比我嘅感覺係一啲成日去蒲嘅女仔。佢究竟係邊撚個嚟㗎?正當我R撚哂頭嗰陣,佢開口同我阿媽講:





「Sorry呀,啱啱返咗屋企換衫呀~」

阿媽話:

「我就冇咩所謂嘅。但係要妳個細佬等咁耐你好唔好意思呀!」

之後個女仔將個視線放喺我度。話:

「你就係我細佬呀,Sorry呀要你等咁耐~」

依個唔係我家姐下話?

我問:「妳就係我家姐呀?」

佢笑住咁同我講話:「係呀~」





O shit,我竟然會多咗個家姐!

跟住佢再接住話:「Sorry呀要你等咁耐!」

我微微點頭咁同佢講:

「唔緊要啦,我等慣咗㗎喇。」

家姐話:

「我同你第一次見面就已經遲到,我係好應該同你賠罪嘅~」

跟住佢就走過嚟同我打茄輪。我個下嘅感覺就好似食緊軟雪糕咁。佢同我打完之後就攬住我,再用一種想喊嘅口吻同我講:





「Sorry呀...」

我見佢好似想喊咁,我就拍一拍佢個背脊同佢講:

「冇事冇事,細佬以後會陪住你㗎!」

估唔到我講依句安慰嘅話說會搞到我日後好麻煩。個家姐聽到我咁講之後就即刻開心返哂,同阿媽講:

「我地去食Outback啦~」然後佢就撓住我隻手咁行。我望咗一下阿媽,佢竟然冇異議,任由家姐咁做。去到餐廳,家姐好熱情咁問我依樣嗰樣。又問我平時鐘意做咩,鐘意玩咩game,又問我A幾,仲問我下次跟唔跟佢去LKF飲酒。唔知係佢太熱情定我冇感受過咁嘅溫暖,我係有小小唔慣佢咁樣。但我都照答佢:

「我平時鐘意遊車河。」

「平時玩開pubg。」

「我A3。」





「有機會先啦。」

因為過咗今次可能唔會再見。之後我就同家姐繼續喺度傾,最後我知道佢叫咩名。佢叫劉凱婷,英文名係Amy。今年26歲,係喺中環返HR。我知道喺香港做到HR係唔容易㗎,佢真係好勁!至於阿媽,佢見到我同家姐有講有笑,就喺度開心咁笑。但係就冇同我講過一句嘢。食完之後,家姐同我阿媽講:

「不如叫細佬上去我地屋企呀~」

我阿媽點頭示好。我問家姐:

「妳地...住邊㗎?」

家姐話:

「住跑馬地lol~」





之後繼續撓住我隻手行。我一路行一路喺邊諗:啊媽依10年究竟做咗啲咩搞到咁有錢㗎?諗諗下就已經到咗。上到最高嗰層,我一入門口,真係「嘩」咗一聲,因為真係勁大,仲要望到維港。家姐話:

「唔洗嘩啦,依到3000尺之嘛~」

我聽完就周圍望下,發現成間屋只係得阿媽同家姐2個人。咁奇怪嘅?依個時候,啊媽同我講:

「阿仔,其實我好想照顧返你,接你嚟依度住。但我知道你仲憎緊我,所以我咗叫你家姐去同你一齊住,照顧你。」

阿媽講完之後俾咗一條鎖匙我,話:

「你可以隨時上嚟依到。」

我仲未反應得切嗰陣,我見到家姐已經拖住個行李箱出嚟,同我講:

「我今晚就會過去你度住,你ok嗎?」

我當然可以啦,反正屋企又得我自己住,多個人住又冇壞嘅,於是我微微點頭。跟住家姐好急咁拉住我走,再同我阿媽講88。一落到去,就即刻有㗎的士,加上拎住咁大件行李,所以我地就直接上咗的士。上到的士,我地一句聲都無出。但係家姐一直撓住我隻手。直到落車,上咗樓家姐先講返嘢:

「依度就係你屋企呀?」

我話係。之後佢見到我有兩張床。就問我:

「可唔可以比我同你一齊訓呀?我其實好驚自己一個人訓㗎...」

佢又好似想喊咁。講真,女人喺我面前流眼淚我會心軟,如果唔係之前條女俾帽我戴我仲點會原諒佢。我只可以微微點頭話可以。佢聽到之後就好開心咁去沖涼。當佢仲完之後我就即刻去沖涼。唔知點解今日好眼訓,好想訓覺。沖完之後我就吹乾啲頭髮。家姐喺我吹完之後就拉我入房一齊訓。訓咗一陣,家姐就話:

「知唔知點解媽咪依10年都唔你,係最近先搵返你呀?」

佢一咁講我就即刻望住佢。跟住家姐繼續講:

「當時我16歲,咁啱我老豆喺嗰時識咗你阿媽,於是同我阿媽離婚,再同咗你阿媽一齊。一開始我討厭你阿媽,因為係佢破壞咗我個家庭。但後尾發現佢對我都好好,仲好似當我親生女咁去照顧。當我24歲嗰陣,你啊媽同我講其實佢有個仔,即係你。我即刻問佢:

「點解唔接佢嚟一齊住呀?」

跟住你阿媽喊住咁話:

「我點會冇諗過呀,只係同你老豆講咗之後發哂脾氣咁話唔比。咁我都冇計㗎!於是我每個月寄$50000俾佢當零用錢。我知係好難彌補到比佢,所以有機會我會同佢講當年嘅難處。」

如果唔係最近個老豆去咗,我諗阿媽都未必搵返你。」

我聽完家姐咁講之後我即刻撓住家姐喊,喊到收唔到聲。原來阿媽一直都有苦衷㗎!喊咗好耐,我喊到家姐件衫濕哂。跟住佢摸住我塊面,望住同我講:

「唔好喊喇,聽日一齊再去搵阿媽食飯啦!家姐錫返!」

講完之後再同我打茄輪。我再次feel到軟雪糕嘅感覺。打完之後,我就攰到訓着咗。我隱約見到家姐走去換咗件衫。第二日起身,我同家姐講:

「Sorry呀,尋晚喊到你件衫濕晒...」

佢開心咁話:

「唔緊要啦,最緊要你依家唔好再誤會媽咪就得喇~」

我地梳洗完之後就約咗阿媽去飲茶。一見到阿媽我就即刻攬住佢同佢講:

「Sorry,原來你一直唔接我係有苦衷㗎。」

我又喺度喊。跟住阿媽話:

「唔緊要啦,你依家明白我就得啦。你再喊就唔靚仔啦~」

於是我破涕為笑咁坐低嗌嘢食。自此之後,我每逢得閒都會同家姐去搵媽咪食飯...

最後,願天下母親快樂!
已有 0 人追稿