當我見到佢都係望住我嗰陣,我因為怕醜而迴避佢嘅眼神,繼續望住部電話,扮冇事發生。跟住我就開咗Facebook睇下d On9嘢。睇睇下我開始喺到釣魚,我坐車從來都唔會釣魚㗎喎,今日做咩事呢?但我唔諗咁多,決定訓一陣。

反正我都係坐到總站㗎啦,唔怕嘅~於是我直接挨住個椅背訓覺。訓咗唔知幾耐,我feel到有人拍我。我望一望隔離,原來係嗰個女仔拍我。當我想問佢嘅時候,佢問我:

「你喺邊個站落車呀?」

由於當時我未係太清醒,所以我諗都冇諗咁求其答佢:

「港澳碼頭lol。」





我隱約見到佢嘅眼神有啲失落,之後佢帶點失落咁話:

「咁好啦,架車出西隧嗰陣我叫你啦...」

我同佢微微點頭之後我就繼續訓。又唔知過咗幾耐,我又feel到有人拍我。我再望去隔離,原來又係嗰姐姐拍我。跟住佢好心急咁話:

「架車到港澳碼頭喇,快啲起身喇!」

我望咗一下出面。咦,真係到咗港澳碼頭喇喎。但係我無視個姐姐咁緊張嘅語氣,開小小眼咁望住同佢講咗句:





「Sorry呀我啱啱唔清醒,其實我喺係總站落先啱呀。」

我講完之後,我隱約見到佢個眼神變得好開心,跟住有啲激動咁同我講:

「我咁啱又係喺總站落。你繼續訓啦,到總站嗰陣我會叫你起身㗎喇~」

於是我繼續合埋眼。但之後我反而訓唔著,仲周不時開小小眼望下佢。我發現佢喺度不斷喺度傻笑。我心諗:

雖然我可以喺上環或者銅鑼灣落,但係點解我喺上環同銅鑼灣落佢嘅反應會差咁遠嘅?





我諗咗好耐都諗唔到。諗下諗下,我再開小小眼望下我去到邊。原來已經去到熱鬧嘅銅鑼灣。跟住我繼續合埋眼,一直去到總站。去到總站嗰陣,我feel到有人捉住我。我一開眼嗰陣,原來係嗰姐姐捉住我隻手。我嘢都未嚟得切講,個姐姐已經拉住我行落車。

E11嗰個車坑好特別,嗰度有一條矮防撞欄。落車之後要跨過去先可以上行人路。由於我當時啱啱先開眼,所以有啲睇唔清前面,搞到我跨嘅時候就仆街,仲推低埋個姐姐,搞到佢都仆埋。依家我地用緊一種男上女下嘅姿勢對望。依下真係可以用超近距離咁望住佢。佢真係好靚,完全冇暗瘡,仲一直散發出一種好香但不明嘅氣體,應該係仙氣掛,我只可以用仙女下凡嚟形容佢。嗰刻我真係唔想起身,而且個女仔都冇要推開我嘅意思,所以我地就喺公眾地方用咁嘅體位互望咗好耐...
已有 0 人追稿