當佢見到我望住佢嘅時候,佢就迴避咗我嘅眼神,繼續碌電話。我估佢可能怕醜掛。唔知點解佢依啲行為會令我覺得佢好可愛~正當我sweet緊嗰陣,突然個仆街渣男WhatsApp錄音我,話:

「啱先你阿媽打電話同我say sorry,話你最近都冇咩搵我,叫你多啲搵我喎,你識做啦😏」

依下令我諗返起當初仲同佢一齊嗰時,有次情到濃時,想曳曳。但因為我係一個天主教徒,我唔比佢要,所以佢咁就嬲咗我。因為嗰陣我唔可以冇咗佢,所以我不停氹番佢。雖然佢最後係原諒咗我,但嗰次之後比我發現佢成日偷食,我當下係同佢返面。但佢不停咁求我原諒佢,我一時心軟咁原諒咗佢。但過咗冇耐,又比知道佢偷食,今次仲要3P,當我知道之後成個人就崩潰咗,仲消磨咗好耐。佢依家仲好意思話

「識做啦😏」,

我真係嬲撚到仆街!當我再望下車頭風景諗住消下氣嗰陣,擋風玻璃反光令我睇到個男仔釣魚,過咗陣仲訓埋添。機會嚟喇飛雲!不如一陣問下佢喺邊度落車,然後叫醒佢,可以借依個機會同佢有溝通。我真係太聰明喇!





喺我諗好要點做嗰陣,我就拍一拍佢,跟住佢望一望我。我見佢想講嘢,但係我唔可以比佢有講嘢嘅機會,於是我即刻問佢:

「你喺邊個站落車呀?」

佢即刻答我:

「港澳碼頭lol」

我嗰下個心情可以話係由天堂跌落地獄,我估錯咗呀!我以為佢會喺總站落,其實我咁樣諗真係好On9。但係我依家已經洗濕咗個頭,我依家唯有硬上啦!由於嗰陣心情受咗好大挫折,所以我帶啲失落咁同佢講:





「咁好啦,不如架車出西隧嗰陣我叫醒你啦~」

佢同我微微點頭之後佢就繼續訓。依個時候我個心情居然有啲忐忑,依種忐忑嘅感覺只係喺我初戀嗰陣有出現過。點解會咁㗎。當我仲忐忑緊嘅時候,架車已經出咗西隧,兼到咗港澳碼頭。我拿拿臨走去拍佢,帶啲心急咁同佢講:

「架車到港澳碼頭喇,快啲起身啦!」

佢望咗一下出面,然後無視我咁緊張嘅語氣,同埋半開眼咁望住我講咗句:

「Sorry呀我啱啱唔清醒,其實我係喺總站落先啱呀。」





佢講完之後,我成個人變得開心。可以話係天堂地獄來回折返咁。由於我太開心,於是用帶啲激動嘅語氣同佢講:

「我咁啱又係喺總站落。你繼續瞓啦,到總站嗰陣我會叫你起身㗎啦~」

之後佢繼續合埋眼,而我就不停喺度傻笑。我要冷靜,冷靜。但無論我點樣冷靜,就係控制唔住自己喺度傻笑。笑下笑下就去到總站,我就拍一拍個男仔,佢擘大眼望住我嗰下我即刻捉住佢隻手,拉住佢行落車。我唔可以有機會俾佢講嘢。

E11嗰個車坑好特別,嗰度有一條矮防撞欄。落車之後要跨過去先可以上行人路。雖然係咁,但係依啲矮防撞欄其實唔難跨過去,所以我好靈活咁跨咗過去。但唔知個男仔咩事,佢一跨嗰陣就仆街,仲要推低埋我,搞到我都仆埋。依家我地用緊一種男上女下嘅姿勢對望。依下就真係可以用超近距離咁望住佢。我見到佢塊面冇暗瘡,而且充滿咗青春嘅氣息。加上佢本身個樣唔差,總括嚟講係我見過最靚嘅男仔。嗰刻我真係唔想起身,而且個細路亦都冇想起身嘅意思,我又唔介意佢咁樣做,所以我地就喺公眾地方用咁嘅體位互望咗好耐...
已有 0 人追稿