我同Sindy拖住手,行緊海邊。係呢個咁sweet嘅時候,突然一個巨浪冚過嚟,將Sindy沖走咗。我大叫:「Sindy!!!!唔好呀呀呀呀呀呀呀呀!!!!!」

:「呀呀呀呀呀呀呀呀呀呀呀呀」

我嚇醒咗。我打開眼,見到Sindy。我即刻攬住佢。我話

:「BB,我發夢見到你俾巨浪沖走咗呀…」

Sindy話





:「傻豬嚟嘅,喺你未死之前我都唔會死㗎」

跟住佢咀咗我一下

咀完之後就推開我,話

:「係喎你隻豬,你尋晚等等下我瞓着咗,冇去沖涼喎!」

我話





:「係啵,我即刻去沖個涼先!」

講完我就走咗去沖涼。沖涼嗰度我喺度諗一陣入去長洲應該要玩啲咩好。

我沖完涼出去,我當堂「嘩」咗一聲。Sindy喺我沖涼呢十分鐘內執好晒一陣去玩要用到嘅野,例如防晒、黑超、泳衣。咪住,泳衣?唔同Sindy想落水?我冇即時問佢,我估九成九都會係咁。Sindy話

:「BB,仲唔去換杉?時間已經唔早喇~」

我即刻趕去換杉,雖然上環過去中環碼頭好近,但都係早啲會好啲。我換完杉就同Sindy落咗去港澳碼頭坐2號,因為2號可以直接喺碼頭落車。如果坐電車/5B/10/962/969…之類嗰啲都會行好遠。好彩落到去都趕到班2號,走咗嘅話又要有排等。上咗2號幾分鐘已經到咗碼頭。落咗車之後Sindy就一直橋住我隻手行。喺行嘅途中我發現有好多人係咁望住我地,唔講仲以為自己變咗明星。我地入咗閘之後就搵咗個位坐低,坐低之後Sindy就打開IG,搵咗啲沙灘照。佢隊俾我睇,問





:「啲女咁樣影好唔好睇?」

係好睇嘅,但我好驚講錯一句就變咗得罪佢。我就婉轉地講

:「條女啲氣質襯唔起個沙灘,你去影嘅話一定靚爆鏡!」

Sindy甜笑咁講

:「真嘅?咁我一陣就要靚爆佢!」

我feel到佢講呢句係開心嘅,如果我頭先講錯好肯定就會喺 十萬個激嬲女友的原因 嗰度見。

等咗一陣,船到咗,Sindy橋住我手咁同我一齊行上船。
已有 0 人追稿