「喂!死人頭柏彼得!」放學既時候,我執好書包企起身,正想落去搵肥基既時候,我比人拍一拍膊頭。

係MJ。

「點呀?大明星MJ~」我擰轉頭問。

MJ係我地學校戲劇社既成員,只係中三已經擔正做好多戲既女主角。





佢話佢既夢想係做個出色既女演員,不過我就成日笑鳩佢發白日夢。

「你今日做乜好似冇厘神氣咁既?」MJ關切地問。

嗚…

我仲諗緊阿關望住我果陣既眼神…

女神呀!





「冇呀,我諗緊比肥基留我堂好慘咋嘛。」不過我係唔會比MJ知道我鍾意阿關呢個秘密:「一陣都唔知要對住佢幾耐…」

MJ噗哧一笑,道:「唔好苦瓜乾咁既樣喇,時間好快過既啫!難得今日你留堂,不如放學一齊走?」

因為黎緊戲劇社會參加一個聯校既話劇比賽,所以呢排MJ排戲都會排到差唔多六點學校關門先走。

而我基本上就冇參加任何課外活動,係好多時老師都會搵我代表學校參加啲發明比賽呀、機械人比賽咁,但我冇比賽既時候都會好準時咁走。

至於哈利呢?佢係籃球校隊既主將,有時放學會練波,唔駛練波既時候有時會同我一齊走。





我諗左一諗:「都好吖,最近妳開始排戲之後都冇同過妳一齊放學喇。」

MJ甜甜一笑:「好呀!咁一陣我排完戲打比你喇!」

「喂唔好!」我耍手擰頭:「一陣肥基未放我走而妳又咁啱打黎我就死得喇!我打比妳喇,如果妳排完戲又見我太耐都冇打黎妳就走先喇!」

「我等埋你啦!」MJ笑住咁行出課室,唔比機會我回應。

我驚妳等得太耐咋。

唉,都係時候去見肥基。

*

「柏彼得,你同我抄一千次『我以後上堂唔會訓覺。』先好走!」肥基響間課室度同我講。





「係既,係既!」我搓住手,扮到笑笑口咁向肥基回應:「冇問題,冇問題,肥…呀黎sir!」

肥基上上下下咁打量左我一下:「唔好出古惑呀!」

我繼續假笑咁搓住手咁回應:「點敢,點敢。」

我而家個動作十足十古裝劇入面啲店小二咁。

「仲唔快啲抄!?」肥基擺出訓導主任既款,指住我怒吼:「記住,唔好出古惑呀!」然後就坐左響老師枱前面注視住我。

唉,肥基你真得閒。

我拎起筆,用正常速度抄抄抄抄抄…





肥基望左我一陣,見我冇出古惑,於是話:「你抄完拎黎教員室比我!一千次,一次都唔可以少!」

我抬頭露出一臉認真既樣:「係既,係既!」

肥基就咁離開左課室了。

佢一走左,我就運用自己既超能力,開衡turbo咁寫寫寫寫寫~

速度快左十倍都有,不消一刻,已經抄晒一千次。

「唉,咁大個仲罰抄,小學生咩。」我自言自語。

反正已經抄晒個罰抄,我索性拎個電話出黎玩下電話,轉下珠,捉下怪…

不過玩玩下都有啲悶,我突然醒起可以去禮堂睇下MJ排戲,於是就執好晒書包,拎埋份罰抄就向禮堂走去。





我冇入到禮堂(廢事阻到佢地排戲喇),只係響禮堂門口裝入去,見到MJ好投入咁排緊戲。

其實佢認真排戲個樣又真係幾令人心動,可惜我心目中已經有女神,加埋同佢由細玩到大,如果唔係隨時都會比佢吸引到。

不過,佢吸引左好多我以外既男同學就是了。

望左一陣,我就拎埋份罰抄去教員室比肥基了。

「今次就算數,下次上堂再訓覺既話我要你抄一萬次,知唔知!?」肥基一手接過罰抄,一邊兇惡地道。

「係既,係既。」我又擺出一副虛假既笑面,一路係咁搓手。

其實對我黎講抄一萬次都唔係啲乜野大不了既懲罰…





嗯…可能喇…

不過我唔夠膽咁講喇。

「走喇你。」肥基對我抑一抑手。

「Goodbye sir~」我頭也不回咁閃人,之後叮左個WhatsApp比MJ,約佢響學校門口等。

*

等到六點幾,終於等到MJ一邊同劇社既同學道別,一邊出黎…

「咁耐架大明星~」我扮出不耐煩既樣。

「咩喎!overrun左小小咋嘛~」MJ擺出一個無辜樣。

「講下笑啫~」我道:「快啲行返去喇!」

「嗯!」MJ甜甜一笑:「好耐都冇一齊返學放學喇!」

「係妳掛住排戲啫~妳知我都冇乜野做既~」不過…之後就唔同喇…

我要做英雄!

我地一路行一路傾計。

同MJ相處就係咁自然。

「喂,彼得。」MJ叫我。

「係,係,咩事呢,大明星?」我擰轉頭笑笑口咁望住佢。

「喂呀,唔好再咁叫我啦!」MJ好大力咁拍一拍我膊頭。

「係,係。MJ,有咩事呢?」我再摸一摸膊頭,扮晒野咁講:「好痛呀!」

「唔好扮野喎!」MJ話鋒一轉:「下下個月…學校咪參加左個戲劇比賽既?」

我點點頭。

「你會黎睇架呵?」

噢,我又冇特別諗過喎。

不過…

「如果大明星叫到既,我呢啲小粉絲點敢唔黎呀?」我扮晒個小粉絲咁。

「咁約定你架喇喎!」MJ笑得好甜好燦爛好開心:「遲啲比飛你喇!」

「急不及待!」我笑住咁回應。

(待續)
已有 0 人追稿