十六

「彼得。」哈利叫我。

「唔?」我應佢。

而家係第二日返學既小息時間,我伏左響枱上面,仲為左啲兒女私情既事而煩惱。

「你今日個樣好似有啲苦惱咁,有冇野可以幫下你呀?」哈利問。





唉。

尋晚同阿關既互動,彷彿令我同佢既關係拉近左一大步咁。

只不過…

係以蜘蛛俠既身份。

一個永遠唔會見得光既身份。





而阿關永遠都唔會知果晚將佢由錘頭幫份子手中救出黎既蜘蛛俠,其實係柏彼得…

「冇野呀。」哈利,你都幫唔到我手架喇。

「唔好愁眉苦臉咁喇。」哈利大力拍下我膊頭,向住某個方向指一指:「你睇下,你女神望緊你呀!耶穌顯靈喇今次!」

聽到「女神」呢兩個字,我猛地一抬頭,望向哈利指住既方向。

毫無預兆下,我同阿關四目交投。





我面一紅。

阿關既眼神唔再係鄙視,反而…有小小複雜?

佢唔會估到尋晚係我救佢架下嘛?

阿關突然向我行過黎。

真係向我行緊過黎!

「咦…唔止耶穌顯靈喎…」哈利都有啲吃驚:「簡直係神蹟…」

終於,阿關響我面前停低。

「哈,我唔阻你先喇,彼得仔~」哈利轉身離開,跑得仲快過保○…





「柏彼得。」阿關開口了。

「係…係!」我緊張到好似個傻仔咁。

「一陣…嗯…一齊Lunch?」吓?我有冇聽錯,女神約我一齊lunch?

「吓…」我望一望附近,確認冇其他人響旁邊:「妳…約我Lunch?」

「係呀!」阿關都冇我咁好氣:「唔係你,呢度仲有邊個呀?」

如果係平時,我應該欣喜若狂。

不過,今日既情況有小小複雜…





「好…好呀!」any肥,我最後都係決定狗衝左先。

「咁一陣放Lunch我黎搵埋你一齊出去食喇。」阿關講完就離開:「一陣見。」

至少…佢既語氣…都算幾好…

我征征咁出神。

「柏彼得!」一把聲音將我拉返現實。

「係…係?」我擰轉頭,係MJ。

「啱啱關黛西過黎搵你做咩?!」MJ好似用緊審犯既語氣問我,搞到我有啲莫名其妙。

「佢搵我食飯…」我仲精神好恍惚咁…





「你幾時同佢咁friend架!」MJ眯埋眼控埋黎。

「係囉…我幾時同佢咁friend既呢…」我繼續喃喃自語…

「你係咪想追佢!」MJ突然指住我質問!

「追佢…追佢?」我好似突然間醒返咁:「痴線,咩追佢?」

「咁唔係你做咩同佢食飯?」MJ得勢不饒人。

「我點知喎!」我真係唔知呀!我都想知點解:「佢約我咋嘛,又唔係我約佢!」

「咁梅嬸嬸煮比你個飯盒點算呀?」MJ語氣真係唔係幾好。





「呀,係喎!」梅嬸嬸幫我準備左飯盒。

咁樣可以慳返筆飯錢。

順帶一提,我啲裝備係用之前幾次機械人比賽既冠軍獎金黎整既。

都用得七七八八…

係時候要諗下搵兼職…

唔…

呢個係後話。

而家講返個飯盒先。

「不如,我幫妳加餸吖!個飯盒就比妳食!」一舉兩得!咁咪可以唔駛浪費個飯盒之餘,MJ又有啖好食囉!

梅嬸嬸煮野好好食架!

「哼!死人頭柏彼得!」MJ好嬲咁拍落膊頭度:「唔理你!我今晚再話比梅嬸嬸聽你倒左佢個飯盒!」

MJ唔理我就轉身離開。

「我冇呀!」我叫住MJ:「喂!喂!」

真係「阿崩叫狗,越叫越走」…我越叫,MJ真係越走架喎!

都唔知點解MJ好似好嬲咁…

「今日真係大奇蹟日…」哈利響我隔離一本正經咁點點頭:「我已經聽到晒。」

「嘩屌你!」我比哈利既突然出現嚇親:「你唔係行開左架咩?」

「善哉善哉。」哈利擺出一副得道高僧既樣:「老納難得有機會見證到神蹟,又點會行得咁遠?老納只不過企左響附近一個可以聽到你地講野既地方。」

「食屎啦你!」我扮出一副張○友樣。

「不過施主真係唔係好了解女性呢種生物。」哈利望住遠處既MJ續道。

「你講到你好似好了解咁…」

「老納成日約SYK女書院啲女上我屋企玩吖嘛…」哈利道。

「淫僧!」我指住哈利怒罵。

啲女仔都係睇在你係高官個仔咋!睇你啲錢咋!你試下同我一樣係公屋仔吖!

「施主比心機。」哈利拍下我膊頭:「食飯果陣表現得自然小小,第一印象好重要。」

第一乜鬼印象呀…我同阿關識左三年喇…

「有咩唔明問老納喇…例如你想帶佢去邊度食飯…老納有好推介…」哈利雙掌合十:「阿彌陀佛…」

「食屎喇你。」張○友樣again。

仲有,你推介得果啲根本唔係平民餐廳…

(待續)
已有 0 人追稿