二十九

我個心跳得好快好快…

我既初吻…即將來臨?

正當我同阿關就快去到面貼面,四片咀唇就快要雙疊既時候…

「嘩!」課室出面突然傳來一陣騷動聲。





而呢一陣既騷動聲就好似驚醒左我同阿關咁,我地兩個都突然縮返開,然後阿關扮到若無其事咁問:「唔知發生咩事呢?」

不過佢塊面仲係好紅扑扑咁,好可愛。

雖然我諗我塊面都不遑多讓…

我企起身,向課室門口走過去,同樣扮作若其事咁講:「唔知呢?等我過去望一望先。」

其實心入面我諗緊果句係:「屌,邊個阻住我既初吻呀?」





我打開課室度門,探頭出去望一望…

個騷動比我想像之中更大,好多同學爭先恐後咁衝緊過去後樓梯果面…

而且每個同學面上都帶住恐慌既神情…

唔對路…

我擰轉頭同阿關對望,似乎打開門之後佢都聽得出啲騷動聲唔係幾正常…





我求其捉住其中一個走緊既同學仔,問:「發生咩事,點解咁多同學咁驚咁走既?」

同學仔扯返我轉頭:「走呀!有隻識講野同雙腳行既巨型蜥蜴!周圍整爛晒啲野!好似想搵野咁!」

「巨型蜥蜴?」唔通係…班叔叔…?但點解佢會響學校出現既…?

我思考緊既同時,同學仔以為我唔信,一邊反手推開我逃走,一邊向我大嗌:「我唔係講笑架!你唔走我走!」

「隻野響邊度?」

「去緊禮堂…唔好過去呀!真係有呢隻野架!一拳就打爛左成幅牆!」同學仔轉身逃走…

禮堂…?

係MJ排劇既地方!





阿關聽到我地既對話,都走埋黎:「會唔會係班叔叔?」

我既表情有啲複雜,心情可以話係又喜又驚又急。喜既當然係班叔叔原來仲未死,但驚既係變左蜥蜴人之後既班叔叔暴戾成性,唔知會唔會攻擊其他同學,而急既就係班叔叔過緊禮堂,即係MJ可能有危險!

果日MJ發完脾氣之後都冇正正經經咁同佢相處過…如果…如果…佢有乜野不測既話…

「我去睇下。」我即刻返埋位,為左以防萬一,響書包度拎左蛛網發射器帶上手,之後急急腳咁向門外走去。

我冇拎到蜘蛛戰衣,一來情況緊急,穿著需時;二來我都驚有人會留意到班房入面既情況,令我身份暴露。

至於救班叔叔既血清?

響屋企雪櫃呀Hi。





就響我就快離開班房既時候,一隻柔軟潤滑既小手捉住我右臂。

係阿關。

佢一面關切咁同我講:「你要小心呀。」

我心中一甜,點點頭:「妳都快啲離開學校喇。」

阿關點點頭。

我之後即刻急急腳咁向禮堂方向同人羣逆流而上,心急到一見到左右無人既時候即刻射出蜘蛛絲作快速移動之用,全速fing下fing下咁前往禮堂。

*

不消一刻,我已經去到禮堂門口。





響未入去之前,我已經知道自己黎啱左地方,因為我響門口已經聽到蜥蜴人班叔叔既怒吼。

「吼!吼!吼!」

仲有一班學生既驚叫聲。

聽到班同學既驚叫聲,我即刻好擔心MJ既安全,諗都唔諗由禮堂既正門衝入去!

「MJ!」我一入到去禮堂即刻大吼!

「彼得…?」MJ既聲音來源係黎自一班比一隻人型蜥蜴逼埋牆角既學生入面…

好彩佢冇事!





呢個時候隻蜥蜴人都擰轉身黎望住我,冇錯,係班叔叔!

「彼…得…?」蜥蜴人轉頭望住我喃喃地道。

「Hi,蜥蜴仔~」我故作輕鬆分散蜥蜴人既注意力:「係時候喇,MJ你地快啲離開呢度!」我對住人堆大嗌,一方面仲戒備住蜥蜴人會唔會突然有乜野動作…

「哇!」成班學生都鳥散而去。

除左MJ。

「走呀!MJ!」妳唔走我唔可以做正經野!

MJ聽罷好猶豫咁行左幾步,之後回頭對住我大叫:「彼得,你唔走,我都唔走!」

「妳唔走,我引開隻蜥蜴既注意仲有咩意思!?」我急道:「妳仲唔快啲走!?」

MJ聽完我講之後把心一橫,向住禮堂大門衝出去!

好,我可以專心應付接住落黎既事!

不過意外地,蜥蜴人除左望住我之外,就乜野動作都冇…

就響呢個時候,MJ突然響門口對住我大叫:「彼得,你唔走我都唔走!」

哎呀,妳做乜彈出又彈入架!

(待續)
已有 0 人追稿