三十三

我帶住滿腹既疑惑觀察左一陣…

雖然之前睇黨鐵既CCTV同勇闖研究室之後都已經推測到七成,但到左呢一刻我更加敢肯定…

呢個劉澤基同埋研究所個神秘組織,一定同政府有所關連!

另外,除左全副武裝既黑警之外,仲有個著住白色大袍,但係袍上面連埋頂帽,遮住佢成身同埋個樣既龐然大物…仲好似有盔甲著住左…





照睇應該唔似係人類?

會唔會係上次響地下研究所見到既文獻入面所記載既其中一項計劃入面既實驗體?

雖然我好想求證一下,但係下面咁多敵人響度做緊大搜查,我貿然落去完全係不智,所以我唯有打消呢個念頭。

觀察左一陣之後都冇咩特別收獲,亦唔見果隻龐然大物有咩動作,於是我沿住假天花通去既冷氣槽慢慢咁撤退…

*





我換返衫去到學校門口,發現有好多黑警、白車同埋記者聚集。

當然最多既仲有零零碎碎周圍企既同學仔。

我周圍搵緊阿關同MJ,而正當我諗緊佢地會唔會已經走左既時候,我發現有一班救護員響度幫同學仔包紮緊,又或者安慰緊佢地,於是我行過去睇下佢地係咪響度,想睇下佢地傷成點,同埋嚴唔嚴重。

我慢慢行到過去,都未企定,已經感覺到有個人飛撲過黎攬住我。

「彼得!」我擰轉頭一望,見到MJ淚流滿面咁望住我:「你冇事…你冇事!嗚…你冇事…」





我拍一拍MJ個頭:「傻妹,可以有咩事呢?」再望一望佢:「妳呢?又有冇事呀?」

MJ抹一抹眼淚,輕輕咁搖一搖頭:「冇呀…係走果陣…扭親下啫…」

我心念一動,再觀察下周圍同學仔既傷勢。

差唔多全部都係自己扭傷、撞傷,又或者係受到驚嚇。



「MJ,阿關呢?」我搵到MJ,仲有阿關未搵到。

「我響度呀,彼得。」阿關把聲響我旁邊出現。

我雙掌推開MJ,轉過面對阿關講:「啱啱真係唔該妳。妳冇事嗎?」





冷不防我既背脊被啱啱比我推開既MJ一野雙龍出海推落我度:「死人頭柏彼得!」之後繼上次之再次氣沖沖咁走左去…

好彩我有蜘蛛感應啫,如果唔係一定企唔穩…

有人話女人係世界上最善變既動物,真係冇錯…

明明上一秒仲係歡天喜地…

「搞咩呀…」我摸一摸自己既背脊,一邊喃喃自語…

「你啱啱咁樣雙掌推開華同學佢梗係嬲喇。」阿關望向MJ走既方向,對我講:「你去同佢say聲sorry先喇。」

「吓,我地由細都係咁玩到大架喇…」我冇察覺咁樣推佢有咩問題,反正由細到大我地對大家都係咁直接架喇…





「你去搵左佢先喇。」佢望住已經坐埋左一邊既MJ果副好似有啲難過既樣,低頭諗左一諗,然後再向我甜甜一笑:「快啲喇,我響度等你,唔會走左去架。」

既然阿關都咁講,我就唯有行過去MJ度道個歉喇…

「喂,大明星。」我撩一撩佢。

MJ擰轉頭唔睬我。

「做咩啫。」我輕輕推一推佢膊頭。

「…」MJ都係唔睬我。

「Sorry呀,啱啱推開妳。」其實我又覺得推黎推去呢個玩法,以我同MJ既關係黎講應該冇乜所謂,不過阿關叫我道歉我就道喇。

真係唔知點解MJ會嬲。





「…」

「唔好咁喇…」我好無奈…「再唔睬我我就走架喇。」

「…好痛呀…死人頭!」MJ突然擰返轉面對住我叫道。

嘩,嚇死咩。

「你啱啱推我好大力呀!」MJ個樣發晒脾氣咁。

哦,可能真係力度既問題,我變左蜘蛛俠之後真係大力左好多既。

而MJ又唔知我變左蜘蛛俠…





唔…

不過我啱啱好大力咩?

「比妳推返喇!」我即刻扮死狗:「比妳推大力啲都得!」

「哼!唔夠!」

「比次機會我喇大明星…」我雙掌合十作無辜狀…

「你一陣要陪我返屋企!」

「咁咋吓嘛…」我鬆一口氣:「冇問題喇梗係…」

我再諗左一諗,道:「嗯,好似都好耐冇同妳一齊返過我屋企喇。」

MJ突然望到我實一實,再問:「你副眼鏡呢?」

我響書包拎返副爛眼鏡出黎:「冇呀,啱啱走佬果陣整爛左。」

MJ低下頭:「Sorry,你係為左我先…」啲語氣轉得咁快既?

「冇野喎傻妹,我仲睇到野喎,況且唔帶眼鏡咪仲靚仔,哈哈!」

「嗯。」

「我過去搵阿關傾埋小小野,轉頭再黎搵妳喇!」我準備轉身離去:「等我一陣呀!」

「嗯!」MJ點點頭,終於露出甜美既笑容。

(待續)
已有 0 人追稿