三十六

「喂,大明星,終於捨得打黎喇咩?」我一接電話就問。

「彼得,你冇事吖嘛?」意外地,MJ好關切地問。

其實我有小小呆左,因為冇諗過佢接電話既第一句就係咁溫柔咁關心我。

仲諗住佢可能會發下脾氣添。





「冇事呀…我可以有咩事?」不過我就唔係好明點解佢會用呢種語氣:「係冇廁所用麻煩啲啫…一陣屙夜尿都唔知點算好…」

「個窿…好似…好似…」MJ好似諗到啲恐怖既野,所以先吞吞吐吐咁講:「好似…今日晏晝響學校果隻大蜥蜴撞穿左既地方咁…」

所以MJ係睇左幅相之後擔心我既安危,所以即刻打比我?

「唔係呱,哈哈…」老實講,MJ估啱左。

所以我都唔知點兜好…





「妳今日下晝果陣受驚所以先會咁諗啫,無端端點會有隻大蜥蜴衝入黎我屋企?」我扮晒安慰MJ咁講:「今晚好好地休息下喇,最多我應承妳,聽日放學妳排完戲之後,真係陪妳一齊放學喇!」

「…」

「做咩唔出聲?」我問。

「聽日唔駛返學呀,你有冇睇我地班個群組?」MJ道:「同埋老師應該有打電話比家長通知架喎。」

「因為廁所穿窿,啲風吹霖晒啲野…所以我同嬸嬸顧住整牆執屋同清潔呀。」我答:「我返到屋企之後真係忙到咩都冇時間睇。」





「嗯…所以你先冇覆我?」MJ問。

「頭先咪講左囉。」我答。

「嗯…咁你聽日有咩做?」MJ問。

「我?」搵蜥蜴人既下落囉,不過冇理由咁同MJ講:「冇呀…冇乜特別…」

「哼,我要你聽日請我食飯!」MJ語氣突然一轉:「鬼叫你成日放我飛機!」

「吓…第一次咋嘛…」

「我唔理呀!」雖然比我識穿左,但MJ理所當然地唔理我既抗議:「我話有就有喇!咁你請唔請吖?」

「呃…好,是旦喇。」一個Lunch唔會佔我好多時間啫。





「哼,好唔願意咁喎。」MJ扮出個不滿既語氣。

「梗係唔會喇女王大人。」我投降喇。

聽日早啲食完早啲比我去搵蜥蜴人喇。

「哼!算你喇!」MJ道:「你搞左成日個廁所都攰喇,休息下先喇,聽日見。」

「嗯,聽日見。」

*

辛苦左成日,原本我真係想響屋企休息下,但身為孝子既我,最後都係決定去搵蜥蜴人。





不過好可惜,咁樣萬無目的咁搵,真係搵到佢先奇。

再加上佢而家要避開神秘組織既追殺,我諗要搵到佢真係難上加難。

希望我可以響神秘組織搵到佢之前率先搵到佢喇。

天差唔多光,我沿住下水道走返屋企。

「屌,好撚臭。」我件蜘蛛戰衣充滿住下水道果陣怪異既臭味。

梗係喇,又落水又爬天花。

我自己都覺得難頂。

算,恰陣先。





*

「你遲到!」一身街坊裝去到MJ樓下既時候,已經成一點,我比原定時間遲左成粒鐘。

因為我恰到唔知醒起身…

「哦,乜唔係約左一點咩?哈哈哈哈…」我決定詐傻扮懵黎蒙混過關。

成個傻仔咁笑到騎騎聲。

「仲笑!」MJ扮出一副嬲嬲豬既樣,其實幾可愛:「仲有呀,點解你個身好似有陣怪味既?」

「哈哈哈哈…搞左成晚屎渠係咁架喇…哈哈哈哈…」事實上係我去完下水道上黎訓著左唔知醒起身,所以掛住趕出街,連涼都冇時間沖…





MJ嬲爆爆咁望住我。

唔…我又做錯咩呢?

咦…

佢…

好似連對眼都有小小紅埋既?

「唔想同我食咪出聲囉!」MJ突然間大聲地道:「唔駛整到成身怪味又遲到架!」

再轉身離開!

嘩咩料呀!

佢真係發嬲?

好小事咋喎!

「MJ!」意識到事態可能有小小嚴重既我,響MJ轉身離開左之後即刻追上去!

MJ又點會夠我行得快,我轉個頭已經追到佢,捉住我隻手。

「放手呀!」MJ好似個發脾氣既細路女咁:「放開我呀!」

「MJ?發生咩事啫?做咩突然走左去架?」我一路問,但依然冇放開手。

「好痛呀!」MJ終於擰轉頭,竟然有幾滴眼淚流緊出黎:「快啲放手呀!」

屌,唔通我真係捉佢捉得太痛,所以佢痛到喊?

嚇到我即刻放手!

(待續)
已有 0 人追稿