四十一

就響呢個生死存亡既關頭,突然有一股唔知乜野既有泡液體由電魔後面既方位激射而至。

電魔應該冇諗過會有人響後面偷襲佢,所以一個唔小心就被擊中左,而佢被擊中既果一刻,右手都鬆開左。

電魔雖然比啲泡沫射中,但完全毫無損傷,不過就比左我一個逃脫既好機會!

縱然我全身仍然係好麻好痺,但我啱啱先由生死關頭脫險,知道呢個係唯一既機會去脫離電魔既攻擊範圍,所以我出盡九牛二虎之力,向後打左幾個筋斗。





我一落地擺好架式諗住再迎戰既時候,先睇清楚啱啱電光石火之間發生左咩事…

係阿關!

佢拎住支滅火筒,好勇敢地向住電魔起勢咁射!

我估佢其實好驚,因為離遠我都見到佢對腳有啲震!

但如果唔係阿關及時出現,可能我已經去左同父母團聚…





我雖然想擺好個架勢,但其實全身都仲係好痛、好麻痺,全身乏力,忍唔住單膝跪左響度。

就響呢個時候,阿關手上支滅火筒已經噴完!

電魔已經擰轉左身,舉起左隻右手,緩緩地道:「普通人呀…落地獄懺悔吧…」就要向阿關下毒手!

「喂!光頭電妖,你既對手響度呀!」郁呀!手手腳腳!比啲力!比啲掙扎!

阿關呢個時候將手上面果支用完既滅火筒向電魔掟過去!





但本身阿關並唔大力,所以支滅火筒掟落電魔身上可謂不痛不癢!

「愚蠢…」電魔道。

阿關嚇到退後左兩步,但依然一臉倔強,一言不發地望住電魔,同電魔對峙。

電魔右手開始匯聚電流…

今次真係打柒電魔,刻不容緩!

見到阿關有危險,我唔知邊度黎既力氣,掙扎住企返起身,電光火石間已經跳左上電魔背脊,四肢從背面捉到佢實,再用右手拼命拉低返佢既右手,一時間搞到電魔都好狼狽。

「哼…送死…」電魔說畢突然全身再次發電!

「嗚…」頂住…頂住呀!我係唔會放手既!一放手阿關就…





「彼…蜘蛛俠!」好似見到…阿關掩咀大叫…

嗚…頂住!我唔可以響度倒下!如果唔係…阿關都會…

「呀!呀!」我唔知邊度黎既力氣,隨手響我件蜘蛛衣既暗格入面拎左支野出黎,諗都唔諗就將支液體打左落電魔條頸度!

冇錯,呢支係本來諗住將班叔叔變返做人類而隨身攜帶既血清!

呢個時候為左救阿關,我諗都唔諗就拎佢出黎打落電魔度!

其實我都唔知會有咩後果,畢竟呢支血清本身應該係為左將蜥蜴人變返做人類而發明,而唔係針對電魔…

有可能冇效之餘仲反而會增強佢既力量!





但電光石火之間唔理得咁多!

「嗚呀!」今次係電魔大叫,而同一時間佢全身既電流都消失得無影無蹤…

似乎…湊效了…

我由佢身上跌左落地…成身散晒…

未得…我唔可以響呢度倒下…

至少…我要將電魔打低先!

我掙扎住企返起身,望住電魔啲電流消失、望住電魔既皮膚由藍色變返做肉色、望住佢不斷痛苦咁大叫…

睇黎…佢終於變返做人類…





係時候喇!

我谷起最後一啖氣,跳到去電魔旁邊,再不斷向佢射出蜘蛛絲,將佢響原地五花大綁…

「Adios,光頭電妖…」我出儘全力講埋呢句。

電魔被困住響蜘蛛網入面,完全出唔到聲…

定係…已經失去左意識?

總之…似乎係我贏左?

我好似隱約聽到人羣既歡呼聲…





我好似見到阿關向我跑過黎…

但我真係頂唔順了…

一時之間好頭暈,周圍既環境好似天旋地轉咁…

啱啱仲用到力同電魔對打既四肢突然間變得泛力…

我再頂唔住,成個人倒在地上面,然後眼前一黑,乜都見唔到…

(待續)
已有 0 人追稿