私語施凌: 9. 脆弱嘅兩人

「對...對唔住啊......」我聽到李綺恩嘅喊聲，忍唔住跟住一齊喊。兩個人嘅喊法都有啲誇張，好似喺度鬥大聲咁，但都將各自咁耐以嚟嘅委屈都喊曬出嚟。

保安同街坊姨姨見我哋兩個脆弱嘅女仔抱住對方，喊到驚天地泣鬼神咁，一時間都有啲手足無措，尷尬咁等我哋發洩完。

「你哋係咩學校嘅學生啊？頭先嘅事直頭就係校園欺凌喎。唔洗怕，姨姨聽日幫你哋同學校講！」姨姨見我哋冷靜咗唔少，心痛咁望住李綺恩身上嘅傷痕。

「......」李綺恩依然驚魂未定，表情帶住不安同猶豫不決。

我突然伸手拖住李綺恩，令佢抬起頭望住我。我堅定咁對佢點點頭，俾佢信心。





雖然只係一個小小嘅動作，但我手心傳俾李綺恩嘅溫暖，直達佢嘅內心。

「我送你返去啊。」我一直都好擔心，一直留意住李綺恩嘅情緒波動。

李綺恩身上嘅衫，剛才已經俾陸雨琪佢哋扯到變曬型，就快爛。於是，我將身上嘅外套除落嚟俾佢。

「呃......唔洗啦，你唔凍咩？」李綺恩唔好意思要我嘅外套。

而家係冬天，而我外套裡面只有屋企著嘅短袖T恤。因為急住出門，剛才只係再著一件外套就跑咗出嚟。





「我ok啊，你著啊，遲啲先俾返我。」其實喺除外套嘅一刻，我已經忍唔住打咗個冷震。加上我剛才係跑過嚟，身上嘅汗水都仲未完全乾曬，更加係凍上加凍。

我唔想李綺恩擔心，所以強忍住自己想打冷震嘅欲望。但我講嘢嘅時候，說話帶住輕微嘅震音，已經將自己嘅大話暴露咗。

「施凌......多謝你。」其實李綺恩有好多問題想問我，但最終都係冇問出口。

李綺恩喺被人欺凌之前，都係班裡面比較高人氣嘅女仔嚟。佢同班裡面所有人都可以傾到兩句，做到朋友。唯獨內向自閉嘅獨行俠，施凌。

所以李綺恩萬萬都估唔到，平時喺班裡邊最透明嘅施凌，反而係自己經歷低潮時，俾自己溫暖嘅人。





“唔好同我講多謝......會發生今日嘅事，我多多少少都要負責任。而且我剛才差少少就對你見死不救......”我低下頭，覺得自己完全受唔起李綺恩嘅一句多謝。

「你係咪好憎報夢者啊？佢害你被人打得咁勁，而且又俾某燈仔起埋底......」我心虛咁問李綺恩。

「雖然唔知你信唔信，但我覺得自己反而要多謝佢......」李綺恩嘆咗一口氣。

「點解啊？報夢者累你俾人話，佢哋話你勾人男朋友喎！」我有啲激動咁問，我寧願李綺恩憎我恨我，我嘅良心反而會覺得好過少少。

「如果我......真係搶咗人哋條仔呢？你會唔會覺得我抵死啊？」李綺恩停低腳步，認真咁問我。我可以見到佢表情僵硬，雙眼暴露咗佢內心嘅脆弱。