簡介

故事主人翁,志強。佢喺中三嘅時候識左坐喺佢隔離嘅女仔,本身只係想借助呢個女仔去接近佢心儀嘅對象,點知比呢個女仔嘅一舉一動感染左,令佢放低佢心儀對象之餘,更加慢慢愛上左呢個女仔。但志強的被動同小心眼,令到呢段關係過左中學之後無疾而終,唔知仲有冇機會追翻呢個好女仔。 故事不定期更新。如有雷同,恭喜你,實屬巧合。 是真是假,誰人知曉。



今日係九月一號,意味住暑假又完左。各位莘莘學子又要拖住疲累嘅身軀,再次踏入學校呢個鬼地獄。

介紹翻先,我叫林志強,英文名叫Jacky。今年升中三,係一個一百七十磅嘅肥仔。由細都大,屋企人同親戚朋友除左嗌我肥強,就係嗌我強仔。我唔係特別鍾意食嘢,但細個果陣呀嫲永遠塞嘢比我食,再加上個人比較hea,先搞到自己肥到隻豬咁。好彩,我好鐘意球類運動,基本上除左籃球樣樣都啱,所以除左個肚腩之外,都唔係顯得特別肥。但係,我只係十四歲,頭髮嘅髮量分分鐘少過一個五十四歲嘅呀叔,呢一點令我有少少自卑。仲有,我好鐘意聽廣東歌,基本上由八十年代到依家新出嘅歌都會聽一餐,我啲朋友同兄弟成日笑我老餅,但佢地梗本唔知乜嘢係品味。其實,我由中一開始已經鐘意左隔離班一個女仔,我地去camp識嘅。唔知點解第一眼我就睇上佢,但係佢派我好人卡之餘仲要夾埋其他人玩翻轉頭,仲要比我班兄弟笑到我依家。不過,我到呢一刻都仲有少少鐘意佢。講到呢度,都介紹得自己八八九九喇,係時候入翻正題。

今年嘅分班八月已經出左,所以我一早知會同邊個同班,今年好少少,睇完啲名有一部分都算係熟嘅,就算冇同過班,都會因為唔同嘅活動識嘅。兩個班主任都係女嘅,一個係教PE嘅Miss Chan,另一個係教英文嘅Miss Lee。Miss Chan由創校教到依家,佢比學生做嘅「訓練」,相信個個都印象深刻,表面係好無聊,但其實係塞緊錢入你袋。而Miss Lee我就唔算話特別熟,因為佢只係第二年入黎教,但佢個樣幾靚,同埋都幾好人嘅。

一翻到去,因為未編坐位表,所以都係順學號坐住先。我地學號係用先男後女,然後再用姓氏黎分,所以呢一刻坐埋一齊嘅係全男班。「喂,死肥仔,做曬功課未?」一聽到呢把咁嘅聲,我就知道係我兄弟Samuel。「屌你梗係未啦,反正聽日先交,今晚一晚搞掂啦」我咁樣應翻佢,爭在未晨早流流問候呀伯母。點解我哋可以咁樣溝通?因為實在太熟啦,我哋由中一同班到而家,大家都係鐘意踢波、飲飲食食同埋打牌,所以成個暑假裏面起碼有一半時間對住呢班兄弟。講講下又夠鐘,呢個時候,兩位班主任都入左班房。「各位同學,今年由我同Miss Lee做你哋嘅班主任,你哋好好享受我為你哋精心設計嘅訓練,希望大家都開開心心過呢一年,揀到自己心儀嘅科目。」Miss Chan話。「各位同學,我同Miss Chan已經為大家精心設計左坐位表,而家請你地坐翻啱自己個坐位表。」今次到Miss Lee話。

大家調完位之後,我前面係我兄弟Samuel,左邊係我幼稚園到中學都係同一間嘅Ken,我同佢同Samuel都係一齊踢波嘅。而左面係一個唔係好熟嘅女仔,佢叫Hailey。雖然唔係話熟,但係我知佢好姊妹就係我心儀果個女仔Cherry,要由佢身上入手簡直係易如指掌。咁嘅坐法,睇黎今年日日都保持歡樂唔會係一件太難嘅事。
已有 0 人追稿